فوتو: ەرلان ومار
مەملەكەت باسشىسى قاسىم-جومارت توقاەۆ وسىدان ەكى جىل بۇرىن ۇلتتىق قۇرىلتايدا سويلەگەن سوزىندە رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىنىپ, جىل سايىن ەگەمەندىك كۇنىن ەلىمىزدىڭ باستى مەرەكەسى رەتىندە اتاپ ءوتۋىمىز كەرەك ەكەنىن ايتتى. سودان كەيىن «قازاقستان رەسپۋبليكاسىنداعى مەرەكەلەر تۋرالى» زاڭعا وزگەرىستەر ەنگىزىلىپ, 25 قازان ۇلتتىق مەرەكە – رەسپۋبليكا كۇنى, 16 جەلتوقسان مەملەكەتتىك مەرەكە – تاۋەلسىزدىك كۇنى بولىپ بەكىتىلدى. دوڭگەلەك ۇستەلگە جينالعان ساراپشىلار ەڭ اۋەلى حالىققا ۇعىنىقتى بولۋى ءۇشىن ۇلتتىق مەرەكەنىڭ مەملەكەتتىك مەرەكەدەن ايىرماشىلىعى تۋرالى ويىن ورتاعا سالدى.
ورالباي ابدىكارىموۆتىڭ ايتۋىنشا, رەسپۋبليكا كۇنىن ءتيىستى دەڭگەيدە قايتادان اتاپ ءوتۋ تۋرالى مالىمدەمە – مەملەكەتتىڭ تاراپىنان ۋاقىتىندا ايتىلعان شەشىم.
«بۇل مەرەكە جاستار ساناسىندا بەرىك ورناۋى ءتيىس. سول سەبەپتى بارلىق وقۋ ورىندارىندا بۇل مەرەكەنىڭ ماڭىزى مەن مارتەبەسىن كوتەرۋ كەرەك. ەڭ باستى مەرەكە رەتىندە اتالىپ ءوتۋى ءتيىس», دەدى ول.
بەرىك بەكجانوۆ بولسا, 1990 جىلى قابىلدانعان دەكلاراتسياعا سايكەس رەسپۋبليكا كۇنىنىڭ 25 قازاندا مەرەكەلەنۋى زاڭدى شەشىم ەكەنىن جەتكىزدى. ال ساپارباي جۇباەۆ بۇل مەرەكەنى تاۋەلسىزدىك كۇنىمەن مازمۇنداستىرىپ الماس ءۇشىن, ونى «قازاقستان كۇنى» دەپ اتاۋدى ۇسىندى.
مەرەكەنىڭ حالىقتىق دەڭگەيدە تويلانۋى ءۇشىن ونىڭ ءمان-ماعىناسى سيمۆوليكالىق سيپاتتا تولىقتىرىلۋى كەرەك. بۇل تۋرالى نۇربەك ماتجاني وي تارقاتتى.
«ناۋرىزدى تويلاعاندا كيىز ءۇي تىگىلەدى, ۇلتتىق ويىندار ويناتىلادى, ناۋرىز كوجە دايىندالادى. بۇل – مەرەكەنىڭ عاسىرلار سۇزگىسىنەن وتكەن, ەل ساناسىندا ابدەن قالىپتاسقان اتريبۋتتار. ال رەسپۋبليكا كۇنىندە حالىق ءبىر-بىرىنە قانداي سىيلىق جاساۋ كەرەك؟ مىنە, وسى ماسەلەنى الدىڭعى ورىنعا شىعارۋ كەرەك», دەدى ول.
سونىمەن قاتار ساراپشىلار رەسپۋبليكا كۇنىنە ەرەكشە ءمان بەرەتىن مەملەكەتتەردىڭ وزىق تاجىريبەسىن تالقىعا سالىپ, مۇنىڭ ەل بولاشاعى – بالالاردىڭ دا قۋانىشتى مەرەكەسى بولۋ كەرەكتىگىن اتاپ ءوتتى.
