الدىمەن اقىننىڭ قازاق رۋحانياتىنا قوسقان مول ەڭبەگى جان-جاقتى سارالانىپ كورسەتىلدى. ش.قۇسايىنوۆ اتىنداعى اقمولا وبلىستىق قازاق مۋزىكالىق-دراما تەاترىنىڭ ۇجىمى ازاماتتىڭ تابيعي تالانتىن تولايىم قامتىعان ليريكالىق كومپوزيتسيانى تىڭدارمان قاۋىم نازارىنا ۇسىندى. جاس اقىن نۇرعيسا ەلەش ۇلى اعاسىنا ارناۋ جولداپ, جىردان شاشۋ شاشتى.
– بيىل قازاقستاننىڭ حالىق اقىنى كوكەن شاكەەۆتىڭ تۋعانىنا 100 جىل تولىپ وتىر. ايتۋلى اقىننىڭ شاكىرتى قۇدايبەرلى راقىمبەك ۇلى دا الپىستىڭ اسقارىنا شىقتى, – دەدى وبلىس اكىمى مارات احمەتجانوۆ, – ۇستاز بەن شاكىرتتىڭ ءبىر-بىرىنە جالعاسا كەلگەن تويى رۋحاني جان دۇنيەمىزدى كەمەلدەندىرۋدە.
شىعارماشىلىق كەشتە اقىننىڭ سوزىنە جازىلعان «باياناۋىل كوكتەمى», «ايتىس» اندەرىمەن قاتار, ءسوزىن دە, ءانىن دە ءوزى جازعان «اششىلى-جەكەبوياق», «اكەنى اڭساۋ», «قىزىل الما» اندەرى شىرقالدى.
كەشكە ارنايى شاقىرىلعان, اقىنداردىڭ كوشىن باستاعان جىرشى-تەرمەشىلەردىڭ حالىقارالىق وداعىنىڭ باسقارما توراعاسى, اقىن ءجۇرسىن ەرمان, قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى, بەلگىلى جۋرناليست-اقىن جاناربەك ءاشىمجانوۆ, تانىمال ايتىس اقىنى امانجول التاەۆ, بەلگىلى اقىن قورعانبەك امانجولدار توي يەسىن قۇتتىقتاپ, جالىنداعان جىرلارىن وقىپ, قوشەمەت كورسەتتى.
كەش كورىگىن قىزدىرعان – ايتىسكەر اقىن مۇحتار نيازوۆ پەن اقمولالىق اقىن ەرلان داۋلەتتىڭ ءسوز قاعىستىرۋى بولدى. كوپشىلىك قوس اقىننىڭ تاۋىپ ايتقان تاماشا سوزدەرىنە قايتا-قايتا قول سوعىپ, ريزاشىلىق سەزىمدەرىن ءبىلدىرىپ وتىردى. كوكشەنىڭ باۋرايىنداعى تويعا جەتىسۋدان الىپ-ۇشىپ جەتكەن ايتاقىن بۇلعاقوۆ پەن شىعىس قازاقستان وبلىسىنان جەتكەن سەرىك قۇسانباەۆتىڭ ايتىسى كوپشىلىكتى ءتانتى ەتتى.
تاياۋدا عانا كوكشەتاۋ قالالىق ءماسليحاتىنىڭ شەشىمىمەن قۇدايبەرلى مىرزابەككە كوكشەتاۋ قالاسىنىڭ قۇرمەتتى ازاماتى اتاعى بەرىلگەنى دە جۇرتشىلىققا ءمالىم بولدى. اقىنىن ارداقتاعان ەلدىڭ ەڭسەسى قاشان دا بيىك.
كوكشەتاۋ
