ۋنيۆەرسيتەتتە 7 700 جاس ءبىلىم الادى
قازىرگى كەزدە قازاق-بريتان تەحنيكالىق ۋنيۆەرسيتەتى ورنالاسقان عيماراتتىڭ ىرگەتاسى 1957 جىلى قالانعان. تاريحي عيمارات قالاداعى كورنەكتى ارحيتەكتۋرالىق ەسكەرتكىش سانالادى. كەزىندە قازاق كسر ۇكىمەت ءۇيى بولعان عيماراتتا 1990 جىلى ەگەمەندىك دەكلاراتسياسى قابىلدانعان بولسا, قازىرگى كەزدە حالىقارالىق ستاندارتقا ساي بىلىكتى كادرلار دايارلانىپ كەلەدى.
«قبتۋ ماماندارى تاريحي عيماراتتا جۇمىس ىستەيتىنىن ماقتان ەتىپ, NNEF قورىنىڭ قولداۋىمەن وسىناۋ ەرەكشە نىساندى دامىتۋعا مۇمكىندىك الىپ وتىرعانىن ۇلكەن مارتەبە سانايدى. قوردىڭ قولداۋى ناتيجەسىندە ءبىلىم باعدارلامالارى 16-دان 68-گە دەيىن ارتتى, 35-تەن استام زەرتحانا اشىلدى. وسى ينۆەستيتسيالار ۋنيۆەرسيتەتتى جاڭا دەڭگەيگە كوتەردى. قبتۋ كوشباسشىلاردى دايارلاۋعا جول اشتى. ۇرپاقتار ساباقتاستىعىنىڭ ءرامىزىن كورسەتە وتىرىپ, تاريحي مۇرالار مەن زاماناۋي تەحنولوگيالاردى ءتيىمدى ۇشتاستىرۋدىڭ ۇلگىسىنە اينالدى», دەپ اتاپ ءوتتى قبتۋ رەكتورى ماراتبەك عابدۋللين.
قبتۋ عىلىم جانە يننوۆاتسيالار جونىندەگى پرورەكتورى ديدار باترىشەۆ اتاپ وتكەندەي, ستۋدەنتتەر زاماناۋي جابدىقتالعان عيماراتتا ساپالى ءبىلىم الۋمەن قاتار, ايتۋلى تۇلعا, مەملەكەت جانە قوعام قايراتكەرى د.قوناەۆتىڭ جانە تاۋەلسىزدىكتىڭ العاشقى جىلدارىندا ەل دامۋىنا سۇبەلى ۇلەس قوسقان تۇلعالار ومىربايانىمەن تانىسىپ, ءوز ەلىنىڭ وتكەنى مەن بۇگىنىن ساباقتاستىرا وتىرىپ, جاڭا تەحنولوگيالى سالالاردى يگەرۋدە بىلىمدىلەر ۇدەسىنەن شىعۋ مۇمكىندىگى جوعارى.
قبتۋ الەۋمەتتىك جانە تاربيە جونىندەگى پرورەكتورى ەكاتەرينا سمولياكوۆا ءباسپاسوز تۋرى اياسىندا قاتىسۋشىلاردى كۇردەلى جوندەۋدەن كەيىنگى ۋنيۆەرسيتەت اۋديتوريالارىمەن تانىستىرىپ, عيماراتتىڭ تاريحي كەزەڭىنە شولۋ جاسادى. قازىرگى كەزدە قبتۋ-دا باكالاۆريات, ماگيستراتۋرا مەن دوكتورانتۋرادا 7 700 جاس وقىپ جاتىر. ستۋدەنتتەردىڭ 82 پايىزى – مەملەكەتتىك گرانت يەگەرلەرى.
بىلىكتى كادرلار دايارلايدى
ۋنيۆەرسيتەتتەگى وقۋ زالدارى, زەرتحانالار زاماناۋي قۇرالدارمەن جابدىقتالعان. ستۋدەنتتەر وسى مۇمكىندىكتەردى پايدالانا وتىرىپ, ءبىلىمنىڭ وزىق ۇلگىسىن يگەرىپ, حالىقارالىق كەڭىستىكتە باسەكەگە قابىلەتتىلىك قاعيداتتارىنا تولىققاندى جاۋاپ بەرىپ كەلەدى.
«Smaty field Airankol» جوباسى – ستۋدەنتتەر ءۇشىن «Airankol» كەن ورنىنىڭ ناقتى دەرەكتەرىنە قول جەتكىزە الاتىن ايرىقشا زەرتحانا. مۇندا تەوريالىق ءبىلىمدى پراكتيكالىق ءىس-ارەكەتپەن ۇشتاستىرۋعا تولىققاندى جاعداي جاسالعان.
ەنەرگەتيكا جانە مۇناي-گاز يندۋسترياسى مەكتەبىنىڭ دەكانى ابدۋلاحات يسمايلوۆتىڭ ايتۋىنشا, اتىراۋداعى «Airankol» كەن ورنى قازىرگى كەزدە تولىعىمەن اۆتوماتتاندىرىلعان. زەرتحانادا ستۋدەنتتەر كەن ورنىنىڭ جۇمىسىمەن تانىسىپ, ۇڭعىلاردى, بۇرعىلاۋ جۇمىستارىن ءموبيلدى كارتا ارقىلى كورىپ وتىرادى. ستۋدەنتتەر مۇنىمەن قوسا «الاتاۋ» ەركىن ەكونوميكالىق ايماعىندا ورنالاسقان بەس ۇڭعىلاۋ وندىرىستىك وقۋ الاڭىندا تاجىريبەدەن وتەدى. ۋنيۆەرسيتەتتەگى يندۋستريالىق كوميتەتتە ەلىمىزدەگى كاسىپورىندار, كومپانيالاردىڭ وكىلدەرى جىلىنا ەكى رەت جينالىپ, تاجىريبەسىن ءبولىسىپ وتىرۋى داستۇرگە اينالعان. بۇل ءداستۇر اياسىندا جاڭا ادىستەر مەن تەحنولوگيالاردى وندىرىسكە ەنگىزۋدىڭ مودۋلدىك كۋرستارى وتكىزىلىپ تۇرادى.
«Shneider Elektric» ونەركاسىپتىك اۆتوماتتاندىرۋ زەرتحاناسىندا ستۋدەنتتەر ونەركاسىپتىك ۇدەرىستەردى اۆتوماتتاندىرۋدى وقىپ-ۇيرەنىپ, تەحنولوگيالىق باسقارۋدىڭ مەيلىنشە جاڭا جۇيەلەرىن مەڭگەرەدى.
«Halil Akademy» كيبەرقاۋىپسىزدىك زەرتحاناسى – ستۋدەنتتەرگە اقپاراتتىق قاۋىپسىزدىك پەن ەتيكالىق حاكەرلىك ادىستەردى زەرتتەۋگە مۇمكىندىك بەرەتىن زاماناۋي جابدىقتار مەن باعدارلامالىق قوسىمشالارمەن جابدىقتالعان وقىتۋ پلاتفورماسى.
بالامالى ەنەرگەتيكا مەن نانوتەحنولوگيالار زەرتحاناسى – جەل, كۇن ەنەرگەتيكاسى, جۇقا پلەنكالار سينتەزى سالاسىنداعى زەرتتەۋلەردى قامتيتىن عىلىمي قىزمەتتەگى جەتەكشى باعىتتىڭ ءبىرى.
«Honeywell» زەرتحاناسى – قبتۋ 2018 جىلى «Honeywell International Inc.» كومپانياسىمەن مەموراندۋمعا قول قويىپ, ناتيجەسىندە اۆتوماتتاندىرۋ ورتالىعى قۇرىلعان بولاتىن. زەرتحانادا ستۋدەنتتەر زاۋىتتىڭ تسيفرلىق نەگىزدەرىن جاساۋعا مۇمكىندىك بەرەتىن ۇدەرىستەردى يگەرەدى. زاۋىتتى باسقارۋ باعدارلاماسىن مەڭگەرگەن تۇلەكتەر وندىرىسكە جىلدام بەيىمدەلەدى.
قازاقستان تەڭىز اكادەمياسى – ەلىمىزدىڭ تەڭىز سالاسىنا حالىقارالىق تالاپقا ساي كادرلار دايارلايتىن بىردەن-ءبىر فاكۋلتەت. «2012 جىلدان باستاپ كاسپي ءوڭىرىنىڭ تەڭىز يندۋسترياسىنا كادرلار دايارلاۋدىڭ جاڭا ستاندارتتارى بەكىتىلدى. بۇگىندە ءبىزدىڭ تۇلەكتەر ءۇشىن تەڭىز كەڭىستىگىنە اشىلعان مۇمكىندىك كوپ. وقۋدى بىتىرگەننەن كەيىن «قازاقتەڭىزكولىكفلوتى», «NCOC», «COC», «Topaz Marine», «تشو» سياقتى جانە باسقا دا ءىرى كورپوراتسيالارعا بارلىق تالاپقا ساي ماماندار وسى اكادەميادا دايىندالادى», دەپ اتاپ ءوتتى فاكۋلتەت دەكانى راميل بيكتاشەۆ. مۇندا اعىلشىن تىلىندە وقي ءجۇرىپ, ستۋدەنتتەر ءتۇرلى تەڭىز زەرتحانالارى مەن ترەناجەرلارىن, سونداي-اق حالىقارالىق تەڭىز تاجىريبەسىن يگەرەدى. اكادەميادا گەرمانيا, ومان, اقش جانە نيدەرلاندتا دايىندالعان بىلىكتى وقىتۋشىلار ءدارىس بەرەدى.
يننوۆاتسيالار مەن حالىقارالىق ىنتىماقتاستىق
قبتۋ-دا ۇلىبريتانيا, نورۆەگيا, باسقا ەلدەردىڭ جەتەكشى جوعارى وقۋ ورىندارىمەن ىنتىماقتاستىق جولعا قويىلعان. ناتيجەسىندە, ستۋدەنتتەر حالىقارالىق جوبالار مەن ستۋدەنت الماسۋ باعدارلامالارىنا قاتىسىپ, جاھاندىق ەڭبەك نارىعىندا باسەكەگە قابىلەتتىلىگىن دالەلدەپ كەلەدى. اقپاراتتىق تەحنولوگيالار جانە ينجەنەريا مەكتەبىنىڭ دەكانى ازامات يمانباەۆتىڭ ايتۋىنشا, ۋنيۆەرسيتەتتە ستۋدەنتتەرگە يدەيالارىن جۇزەگە اسىرىپ, جاڭا تەحنولوگيالاردى قولدانا الاتىن, بولاشاقتا ناقتى ماسەلەلەردى شەشە الاتىنداي جاعداي جاسالعان. حالىقارالىق سەرىكتەستەرمەن ىنتىماقتاستىق ستۋدەنتتەرگە تەوريالىق جانە پراكتيكادا مول ءىس-تاجىريبە جيناقتاۋعا جاعداي جاسايدى.
قازىرگى كەزدە اقپاراتتىق تەحنولوگيالار جانە ينجەنەريا مەكتەبىنىڭ ستۋدەنتتەرى جاساندى ينتەللەكت, روبوتتەحنيكا سالاسىنداعى زاماناۋي ءبىلىمدى يگەرىپ, الەممەن ىقپالداستىقتا دامىپ كەلەدى. ستۋدەنتتەر قۇراستىرعان روبوتتار ادام جۇمىسىن جەڭىلدەتىپ, قاۋىپسىزدىك سالاسىندا, قولجەتىمسىز كەڭىستىكتە جاڭا تەحنولوگيالاردىڭ مۇمكىنشىلىگى جوعارى ەكەنىن كورسەتىپ وتىر. ستۋدەنتتەر تەحنولوگيالاردىڭ كومەگىمەن جاڭا ازىرلەمەلەر جاساپ, ولاردىڭ ءپروتوتيپىن قۇراستىرۋمەن اينالىسىپ جاتىر. ءموبيلدى روبوتتار, دروندار, يندۋستريالدى روبوتتار زەرتحانادا ءىرى زاۋىتتارداعى اۆتوماتتاندىرۋ, ەلەكترونيكا قۇرىلعىلارىمەن كەشەندى جۇمىستاردى ۇيرەنۋگە مۇمكىندىك بەرەدى.
ۇرپاقتار ساباقتاستىعى جانە تاريحي مۇرالاردى ساقتاۋ
پرەسس-تۋر باعدارلاماسى كۇنى بۇگىنگە دەيىن تاريحي باستاپقى قالپى ساقتالىپ كەلگەن, كەزىندە اكادەميك د.قوناەۆ وتىرعان كابينەتتى كورۋمەن جالعاستى. مۇندا ءاربىر بۇيىم, سۋرەتتەر, جيھازدار ەل تاريحىنىڭ كەشەگىسىنەن سىر شەرتىپ قانا قويماي, وسكەلەڭ ۇرپاققا جاڭا زامان تەحنولوگياسىن ۇيرەنە وتىرىپ, ءبىلىم مەن عىلىم كەڭىستىگىن يگەرۋگە ۇلكەن جاۋاپكەرشىلىك جۇكتەپ تۇرعانداي اسەر بەرەدى. مۇندا ستۋدەنتتەر كۇندەلىكتى لەكتسيا تىڭداپ, ەل تاريحىنا قاتىستى قۇندى مالىمەتتەردى زەردەلەيدى.
ۋنيۆەرسيتەتتىڭ 20 جىلدىعىنا وراي ءارى قبتۋ-دىڭ كەلەشەك ستۋدەنتتەر بۋىنىنا ارنالىپ سالىنعان ۋاقىت كاپسۋلاسى جوباسى – وقۋ ورنى باسشىلىعىنىڭ ءبىلىم بەرۋ ۇردىسىندە جىلدامدىق پەن تەرەڭ ءبىلىمدى باستى قاعيدات ەتىپ ۇستايتىنىنىڭ دالەلى.
قبتۋ ستۋدەنتتەرىنە تاۋلىك بويى ءبىلىم الۋعا قولايلى جاعداي جاسالعان. مۇندا زاماناۋي جابدىقتالعان عىلىمي كىتاپحانادا 200 مىڭنان استام كىتاپ قورى بار. سونىڭ 100 مىڭنان كوبىن ەلەكتروندى فورماتتاعى ادەبيەتتەر قۇرايدى. بيىل قوردى تولىقتىرۋ ءۇشىن 24 ملن تەڭگە قاراستىرىلىپتى. كىتاپحانانىڭ كىرەبەرىسىندە ستۋدەنتتەر ازىرلەگەن Face ID قولدانىستا. اۆتوماتتاندىرىلعان كىتاپحانا پورتالى ينكليۋزيۆتى جۇيەمەن دە ستۋدەنتتەردىڭ ءبىلىم الۋىن جەڭىلدەتىپ وتىر. قبتۋ-دا ستۋدەنتتەرگە جاسالعان تولىققاندى جاعداي ولاردىڭ الەمدىك ءبىلىم ءۇردىسىنىڭ ءبىر بولشەگى رەتىندە قارقىندى دامىپ جاتقانىن ايعاقتايدى.
ءباسپاسوز تۋرى اياسىندا وتكەن بريفينگتە ۋنيۆەرسيتەت وكىلدەرى جۋرناليستەر مەن بلوگەرلەردىڭ سۇراقتارىنا جاۋاپ بەردى. وقۋ ورنى باسشىلىعى قالا تۇرعىندارى مەن قوناقتارىنا تۇراقتى ەكسكۋرسيالار ۇيىمداستىرۋ جوسپارلارى تۋرالى بايانداپ, سونداي-اق تاريحي عيماراتتاردى ساقتاۋ جانە دامىتۋ ماسەلەلەرى بويىنشا قالانىڭ قوعامدىق كەڭەسىنىڭ كوشپەلى كەڭەسىن وتكىزۋگە ۇسىنىس جاسادى.
الماتى
