سۋرەتتەردى تۇسىرگەن – جانگەلدى ابدىعالىم
ايماق تۇرعىندارىن قارا وتىنمەن قامتاماسىز ەتۋگە ارنالعان 740 مىڭ توننادان استام كومىر قورى بار. بۇگىندە 55 ساتۋ نۇكتەسىندە ساۋدا قىزۋ. ونىڭ 41-ءى تەمىرجول تۇيىعىندا, ال 14-ءى قويمادان ساتىلىپ جاتىر.
قازىرگى ۋاقىتتا ايماق تۇرعىندارى كومىردى ساتىپ الۋدا بەلسەندىلىك تانىتىپ وتىر. ساتۋ نۇكتەلەرىندە جۇمىس شتاتتىق تارتىپپەن ۇيىمداستىرىلادى. كۇن ىزعارلانعان سايىن سۇرانىس تا ارتىپ كەلەدى. بۇل ىسكە جاۋاپتى ماماندار كومىر قورىنىڭ جەتكىلىكتى ەكەنىن ايتادى.
– قازىر قوردا 43 مىڭ توننا كومىر بار. ونىڭ 17 مىڭ تونناسى – قاراعاندى قالاسىندا. ءوڭىردى كومىرمەن قامتاماسىز ەتۋدە ەشقانداي ماسەلە جوق. شۇباركول كومىرىنىڭ تونناسى ورتا ەسەپپەن 19 مىڭ تەڭگەدەن. ماسەلەن, پريشاحتينسكىدەگى ساتۋ نۇكتەسىندەگى باعا – 14 750 تەڭگە. ايتا كەتەيىك, كومىر باعاسىنىڭ وزگەرۋىنە تاسىمالداۋ نۇكتەلەرىنىڭ قاشىقتىعى دا اسەر ەتەدى, – دەيدى ونەركاسىپ جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى اقديدار رىمبەك.
جىلىنا 150 مىڭ توننا ءونىم وندىرەتىن «راپيد» كومىر شاحتاسىندا جۇمىس قىزۋ. بۇل كومىردىڭ ءتۇرى باسقالاردىكىندەي ەمەس, جەراستى ادىسىمەن وندىرىلەدى. سايكەسىنشە, باعاسى دا جوعارى. اتاپ ايتساق, ءبىر توننانىڭ باعاسى 24 مىڭ تەڭگەدەن باستالادى. سوعان قاراماستان كۇنىنە 15 جۇك كولىگى تيەلىپ, جەتكىزىلىپ جاتىر.
– بۇل كومىر شاحتاسى سوناۋ وتكەن عاسىردىڭ 20-30 جىلدارى جۇمىس ىستەپ تۇرىپ, 1968 جىلى جابىلىپ قالعان. 2001 جىلى ۇكىمەتپەن كەلىسىمشارت جاساسىپ, 2032 جىلعا دەيىن جالعا الدىق. ءارى قاراي جالعا الۋ ۋاقىتىن سوزۋ مۇمكىندىگى دە بار. ول جىلدارى تەحنيكا دامىماعان. ءتىپتى ارنايى كومىر وندىرۋگە ارنالعان قۇرالدار دا بولماعان. اتا-بابالارىمىز وسى شاحتادان مۇمكىندىگىنشە قاجەتتى كومىر قورىن يگەرىپ, جاۋىپ كەتكەن. قازىر ءبىز سول كىسىلەردەن قالعان قوردى ارنايى تەحنيكانىڭ كومەگىمەن ءوندىرىپ جاتىرمىز. سول سەبەپتى ءبىزدىڭ جىلدىق مولشەرىمىز از ءارى قىمبات, – دەدى «راپيد» جشس ديرەكتورى اندرەي بەلوۆ.
ال پريشاحتينسكىدەگى «تەپلو ۆ دوم» كومىر قويماسىندا تەك شۇباركول كومىرى ساتىلادى. قويمادان ءبىر توننا كومىر الاتىن بولساڭىز – 19 مىڭ تەڭگە. ءدال وسى كومىر ءتۇرىن «شۇباركول كومىر» اق رازرەزىنىڭ وزىنەن بارىپ ساتىپ الساڭىز, ونداعى باعا 8 790 تەڭگەگە شىعادى. ال قاراعاندىداعى ساتۋ نۇكتەلەرىندەگى باعا – 14 750 تەڭگە. ياعني باعا وزگەرگەنىمەن, بەكىتىلگەن شەكتى سومادان اسپايدى.
– كۇنىنە قويماعا 24 ۆاگون كومىر تۇسەدى, 30-50 جۇك كولىگى كەلىپ كومىر تيەپ الىپ شىعادى. ەشقانداي ماسەلە تۋىنداپ جاتقان جوق. كۇنى-ءتۇنى جاتىپ كەزەك كۇتەتىندەر جوق ازىرگە. قويما قىزمەتكەرلەرى جاقسى قىزمەت كورسەتەدى. سوڭعى تۇتىنۋشىعا دەيىن ۇزدىكسىز جۇمىس ىستەپ جاتىر. قاربالاس ءالى الدا. بىلتىر ەلدىڭ ءبارى سوڭىنان الىپ ەدى. سول كەزدە كەزەك كۇتىپ قالعان جۇك كولىكتەرى كوپ بولعان. بيىل دا سول جاعداي قايتالاناتىن سىڭايلى. سوندىقتان ايماق تۇرعىندارىن ەرتەرەك قام جاساۋعا شاقىرامىن, – دەيدى «پسۆ86» جشس كومىر قويماسىنىڭ ديرەكتورى نيكيتا انوسوۆ.
قاراعاندىدا قارا وتىننىڭ قورى جەتكىلىكتى. الاڭداۋعا نەگىز جوق. ال باعاعا اكىمدىك تاراپىنان تۇراقتى مونيتورينگ جۇرگىزىلىپ وتىر.
قاراعاندى وبلىسى
