فوتولار: Oqu-agartu ministrligi
وقۋ-اعارتۋ مينيسترلىگىنىڭ ءباسپاسوز قىزمەتى ءمالىم ەتكەندەي, بيىل اتالعان تۋرنيرگە قالالىق جانە وبلىستىق كەزەڭدەردەن جەڭىمپاز بولىپ تانىلعان 180 وقۋشى قاتىستى.
ءار وڭىردەن قازاق, اعىلشىن, ورىس ليگالارى بويىنشا 9 وقۋشى جولداما الدى. تۋرنير پىكىرسايىستىڭ دۇنيەجۇزىلىك مەكتەپ فورماتى (WSDC) بويىنشا ءوتتى. قاتىسۋشىلار ىرىكتەۋ جانە قورىتىندى ويىنداردا باق سىنادى.
كوشباسشىلىق قابىلەت پەن سىني ويلاۋدى قالىپتاستىرۋ تۇرعىسىندا پىكىرسايىستىڭ الاتىن ورنى ەرەكشە ەكەنىن اتاپ وتكەن مينيستر عاني بەيسەمباەۆ وڭىرلىك كەزەڭگە 81 مىڭنان استام وقۋشى قاتىسقانىن, بۇل بىلتىرعى جىلمەن سالىستىرعاندا 30 مىڭعا ارتىق ەكەنىن تىلگە تيەك ەتتى.
«پىكىرسايىس – تەك جارىس الاڭى عانا ەمەس, بۇل ءوز ويىن ەركىن ءبىلدىرۋدىڭ, پىكىر الماسۋدىڭ تاماشا قۇرالى. سىزدەر ءوز بىلىمدەرىڭىزدى دالەلدەپ قانا قويماي, سونداي-اق كوماندادا جۇمىس ىستەۋ, وزگەلەردىڭ پىكىرىنە قۇلاق قويۋ, مامىلەگە كەلۋ سەكىلدى ومىرلىك ماڭىزدى داعدىلاردى مەڭگەردىڭىزدەر. سىزدەردى قۇتتىقتاي وتىرىپ, وسى الاڭدا العان تاجىريبەلەرىڭىز الداعى ۋاقىتتا بيىك ماقساتقا ۇمتىلۋلارىڭىزدىڭ العىشارتى بولسىن دەپ تىلەيمىن», دەدى مينيستر.
ەكى كۇنگە سوزىلعان بايقاۋ ناتيجەسىندە ءىىى ورىنعا اقتوبە, قاراعاندى وبلىستارى تابان تىرەسە, ءىى ورىندى الماتى وبلىسى, شىمكەنت, الماتى قالالارى ءوزارا ءبولىستى. ال ءى ورىنعا استانا, الماتى قالالارى جانە قاراعاندى وبلىسى لايىق دەپ تانىلدى.
«ۇزدىك سپيكەر» نوميناتسياسى: ءاليحان ايتباەۆ – استانا, اياجان ولجاگەلدى – قاراعاندى وبلىسى, دانا ايتقاليەۆا – اباي وبلىسى.
«ۇزدىك وراتور» نوميناتسياسى: جىبەك مەلس – الماتى قالاسى, سوفيا مالىشەۆا – پاۆلودار وبلىسى, كامشات ەركىنبەك – جەتىسۋ وبلىسى.
ايتا كەتسەك, قازىرگى ۋاقىتتا ەلىمىزدە 7684 پىكىرسايىس كلۋبى جۇمىس ىستەيدى, ونىڭ 6963-ءى - مەكتەپ كلۋبتارى.
