فوتو: اشىق دەرەككوز
دارىگەرلەر ناۋقاسقا «سوزىلمالى برونحيت پەن پنەۆمونيا» دياگنوزىن قويىپ, تەراپيا بولىمىنە جاتقىزعان. ەم ناتيجە بەرمەي, ناۋقاستىڭ جاعدايى ناشارلاعان. كومپيۋتەرلىك توموگرافيا زەينەتكەردە «پلەۆريت» بولۋى مۇمكىن ەكەنىن كورسەتكەن. 4 اپتادان كەيىن ناۋقاستىڭ جاعدايى ودان سايىن ناشارلاپ, وبلىستىق اۋرۋحاناعا جەتكىزىلگەن. 76 جاستاعى ايەل ادام سول جەردە جان تاپسىرعان.
قايتىس بولعان ايەلدىڭ ۇلى دەنساۋلىق ساقتاۋ باسقارماسىنا شاعىمدانىپ, دارىگەرلەر سالعىرتتىق تانىتىپ, ءتيىستى ەمدەۋ شارالارىن جۇرگىزبەگەنىن جەتكىزگەن. تەكسەرۋ بارىسىندا اۋرۋحانا تاراپىنان زاڭ بۇزۋشىلىقتار انىقتالعان.
تەكسەرۋ ماتەريالدارى باتىس قازاقستان وبلىستىق پوليتسيا دەپارتامەنتىنە جولدانىپ, قىلمىستىق ءىس قوزعالدى, قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى ءىس بىرنەشە رەت توقتاتىلىپ, پروكۋراتۋرا كۇشىن جويعان.
دەنساۋلىق ساقتاۋ باسقارماسى قالالىق اۋرۋحانانىڭ قارسىلىعىن قابىلداماعاندىقتان, مارقۇمنىڭ ۇلى اۋرۋحانادان مورالدىق شىعىندى وتەۋ تۋرالى ورال قالاسىنىڭ №2 سوتىنا شاعىم تۇسىرگەن.
ول اناسىنىڭ ولىمىنە ساپاسىز مەديتسينالىق كومەك پەن قالالىق اۋرۋحانا دارىگەرلەرىنىڭ ارەكەتسىزدىگى سەبەپ بولعانىن اتاپ وتكەن. سونداي-اق تالاپ قويۋشىنىڭ اناسى ەمدەلىپ جاتقان اۋرۋحانانىڭ تەراپيا بولىمىندە جالپى پراكتيكالىق دارىگەردىڭ كۋالىگى بار مامان جۇمىس ىستەگەنى, وعان قۇقىعى جوق ەكەنى انىقتالدى.
ساراپشى ناۋقاسقا ونىڭ جاسى مەن وندا بار سوزىلمالى اۋرۋلارى, سونىڭ ىشىندە, بۇيرەكتىڭ جەدەل زاقىمدانۋىن تۋدىرعان انتيبيوتيكتەر ەسكەرىلمەي, ءدارى-دارمەك تاعايىندالعانىن انىقتادى. ءتيىستى باكتەرياعا قارسى پرەپاراتتار مەن گەمودياليزدى ەنگىزۋ ناۋقاستىڭ ءومىرىن ۇزارتۋى مۇمكىن ەدى.
سوت مەديتسينالىق قۇجاتتاردى, ساراپشىلىق قورىتىندىلاردى جانە تەكسەرۋ اكتىسىن ەسكەرە وتىرىپ, دەر كەزىندە قايتالاما سىناقتار وتكىزبەۋ, ناۋقاستىڭ جاعدايىن دۇرىس باعالاماۋ, ەمدەۋدى كەش تۇزەتۋ, نەفرولوگ كەڭەسىنىڭ ۋاقىتىندا بولماۋى مەن كونسيليۋمنىڭ كەش جۇرگىزىلۋى اۋرۋدىڭ ناتيجەسىنە اسەر ەتكەنىن جانە ولىمگە اكەلىپ سوققانىن انىقتادى.
جوعارىدا ايتىلعانداردىڭ نەگىزىندە تالاپ قويۋ ءىشىنارا قاناعاتتاندىرىلدى, تالاپ قويۋشىنىڭ پايداسىنا اۋرۋحانادان 2 ملن تەڭگە مورالدىق شىعىن ءوندىرىلدى.
شەشىم زاڭدى كۇشىنە ەنگەن جوق.
