كوميتەت توراعاسى اسحات ايماعامبەتوۆ جەتەكشىلىك ەتكەن وتىرىسقا دەپۋتاتتارمەن قاتار ءبىلىم سالاسى ماماندارى, ساراپشىلار, مەملەكەتتىك ورگان وكىلدەرى قاتىستى. باسقوسۋدا وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ توراعاسى قانىبەك جۇماشەۆ ءار 5-7 جىل سايىن وقۋ باعدارلامالارىن قايتا قاراۋ كەرەكتىگىن, بۇل ءبىلىم بەرۋ جۇيەسىنىڭ قوعامنىڭ ۋاقىتى مەن قاجەتتىلىگىنە دەر كەزىندە جاۋاپ بەرۋىنە ىقپال ەتەتىنىن اتاپ ءوتتى.
– جاڭا مەملەكەتتىك ستاندارتتاردى ەنگىزۋ ءبىلىم بەرۋ ساياساتىنداعى جاھاندىق ترەندتەردى كورسەتەدى. ياعني سىني ويلاۋ, اناليتيكالىق داعدىلار جانە پروبلەمالاردى شەشۋگە يننوۆاتسيالىق كوزقاراس سەكىلدى قۇزىرەتتەردى دامىتۋعا باعىتتالعان. وقۋ باعدارلامالارىن قايتا قاراۋدا وتاندىق جانە حالىقارالىق ۇردىستەر ەسكەرىلەدى. بۇل وقۋشىلاردىڭ اكادەميالىق ءبىلىمىن عانا ەمەس, فۋنكتسيونالدىق ساۋاتىن, اقپاراتتىق-كوممۋنيكاتسيالىق تەحنولوگيالاردى جوعارى دەڭگەيدە مەڭگەرۋىن قالىپتاستىرۋعا ارنالعان. ءبىلىم ستاندارتتارى شەڭبەرىندە وقۋ ۇدەرىسىنە تسيفرلىق تەحنولوگيالاردى ەنگىزۋگە ەرەكشە كوڭىل ءبولىنىپ كەلەدى. ءار وقۋشى باستاۋىش ءبىلىم بەرۋ كەزەڭىندە مەڭگەرۋى كەرەك بىلىمگە, بىلىككە جانە داعدىلارعا قويىلاتىن تالاپقا ساي قامتىلعان. بۇعان ءتىل جانە ادەبيەت, ماتەماتيكا, ينفورماتيكا, جاراتىلىستانۋ, تەحنولوگيا جانە ونەر, دەنەشىنىقتىرۋ سياقتى نەگىزگى وقۋ پاندەرى بويىنشا پاندىك قۇزىرەتتىلىكتى دامىتۋ كىرەدى. بۇل ءتاسىل وقۋشىلاردىڭ اكادەميالىق جانە ومىرلىك داعدىلارىن جۇيەلى قالىپتاستىرۋعا مۇمكىندىك بەرەدى, – دەدى ق.جۇماشەۆ.
ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى جۇلدىز سۇلەيمەنوۆا وقۋ-اعارتۋ مينيسترلىگى ى.التىنسارين اتىنداعى ۇلتتىق ءبىلىم اكادەمياسىمەن بىرلەسىپ وقۋ باعدارلامالارىنىڭ جاڭا ستاندارتىن جاساۋعا كىرىسكەنىمەن ءالى ناتيجە بايقالماي وتىرعانىنا توقتالدى.
– 2015 جىلى جاڭا ستاندارت ەنگىزىلىپ, 2016 جىلى مەكتەپتەرىمىز سول نەگىزدە وقي باستادى. مەنىڭشە, ءبىلىم ساپاسىنىڭ كۇرت تومەندەپ كەتۋى قۇندىلىقتارىمىزدىڭ ءبىلىم سالاسىندا ءبىرتۇتاس ۇيىسپاۋىنان بولىپ وتىر. سونىمەن قاتار قازىرگى تاڭدا اۋىل مەكتەپتەرى مەن قالا مەكتەپتەرىنىڭ ءبىلىم ساپاسىنداعى ايىرماشىلىق تەرەڭدەپ بارا جاتىر. بىزدە 500-دەن اسا يننوۆاتسيالىق مەكتەپ بار, بۇل – زياتكەرلىك مەكتەپتەر, ءبىلىم يننوۆاتسيا ليتسەيلەرى, Binom مەكتەپتەرى. وندا بالالار وتە جاقسى ءبىلىم الادى. بىراق كوپشىلىگى وقۋعا شەتەلگە كەتەدى. قازاقستانعا كەلىپ, ەڭبەك نارىعىنا جۇمىس ىستەيتىن – اۋىل مەكتەبىنىڭ بالالارى. ال جاي مەكتەپتەر مەن وسى يننوۆاتسيالىق مەكتەپتەردىڭ ءبىلىم باعدارلامالارىن سالىستىراتىن بولساق, وتە ۇلكەن الشاقتىق بار, – دەدى ج.سۇلەيمەنوۆا.
وتىرىسقا قاتىسۋشىلار جاڭا ءبىلىم ستاندارتىن جەتىلدىرۋگە قاتىستى ساۋالدارىن ورتاعا سالىپ, تاربيە جۇمىستارىن ۇيىمداستىرۋ, باستاۋىش مەكتەپ وقۋشىلارىنا ورىس ءتىلى ءپانىنىڭ باعدارلاماسىن جەڭىلدەتۋ, قازاق ءتىلى گرامماتيكاسىن بىرىزدەندىرۋ, كىتاپتاردىڭ كولەمىن ءبىر ستاندارتقا كەلتىرۋ, بالالاردىڭ جاسىنا لايىق تاپسىرمالار بەرۋ, وقۋشىلاردىڭ لوگيكالىق, تسيفرلىق داعدىلارىن جەتىلدىرۋ جانە باسقا دا ماسەلەلەردى جان-جاقتى تالقىلادى.
