اۋداندىق سوتتىڭ سۋديالارى مەن قىزمەتكەرلەرى جارتى عاسىر بۇرىن سالىنعان اپاتتى عيماراتتان 1,2 مىڭ شارشى مەترلىك ەكى قاباتتى جاڭا عيماراتقا كوشتى.
جاڭا عيماراتتىڭ اشىلۋ راسىمىنە سوت اكىمشىلىگىنىڭ باسشىسى نايل احمەتزاكيروۆ پەن سولتۇستىك قازاقستان وبلىستىق سوتىنىڭ ەكس-توراعاسى, وتستاۆكاداعى سۋديا ەربول جانعازين قاتىستى.
شاراعا جەرگىلىكتى اتقارۋشى جانە قۇقىق قورعاۋ ورگاندارىنىڭ وكىلدەرى, اۋدان تۇرعىندارى دا كۋا بولدى.
قونىس تويىمەن قۇتتىقتاعان ن.احمەتزاكيروۆ عيمارات زاماناۋي ستيلدە, سوت تورەلىگىن جۇزەگە اسىرۋ تالاپتارىنا ساي سالىنعانىن جانە اۋداننىڭ باسقا دا اكىمشىلىك عيماراتتارى مەن سكۆەرىنە جاقىن ورنالاسقانىن اتاپ ءوتتى.
بۇل سوتقا كەلۋشىلەر, سۋديالار مەن سوت قىزمەتكەرلەرى ءۇشىن قولايلى بولماق.
وبلىستىق سوتتىڭ القا توراعاسى الماز يبراەۆ, وبلىس اكىمى اپپاراتىنىڭ باسشىسى رۋسلان الىشەۆ جانە وبلىستىق سوتتىڭ بۇرىنعى توراعاسى ەربول جانعازين جاڭا عيمارات اۋدان ورتالىعىنىڭ ساۋلەتتىك كوركىنە اينالعانىنا ەرەكشە ءمان بەرىپ, بۇل قونىس تويدى ماڭىزدى وقيعا دەپ باعالادى.
ولاردىڭ ايتۋىنشا, جاڭا عيماراتتا سوت پروتسەسىنە قاتىسۋعا, سوت اقپاراتىن جىلدام ءارى تولىق الۋعا بارلىق جاعداي جاسالعان.
سولتۇستىك قازاقستان وبلىسى بويىنشا سوت اكىمشىلىگى دەپارتامەنتىنىڭ باسشىسى ماناس بوراشەۆ قوناقتارعا سوت ۇجىمىن تانىستىرىپ, عيماراتقا ەكسكۋرسيا جۇرگىزدى.
ءىس-شاراعا قاتىسۋشىلار سوتتىڭ فرونت-ءوفيسىن, سوت وتىرىسى وتەتىن زالداردى, كونفەرەنتس-زالدى, سۋديالار مەن ماماندار جۇمىس ىستەيىن كابينەتتەردى ارالاپ كوردى.
ايتا كەتەيىك, عيماراتقا كۇزەت جانە دابىل جۇيەلەرى, كابەلدىك جانە تەلەكوممۋنيكاتسيالىق جەلى, بەينەباقىلاۋ ورناتىلعان.
مۇمكىندىگى شەكتەۋلى ازاماتتاردىڭ دا عيماراتقا كەدەرگىسىز كىرۋى ءۇشىن ارنايى ورىندار جابدىقتالعان.
