«ەرتىس گيدرومەتاللۋرگيالىق كومبيناتى» جشس – «Solidcore Resources» (بۇرىنعى اتاۋى – «Polymetal») حالىقارالىق التىن وندىرەتىن كومپانيانىڭ بولاشاققا باعىتتالعان جوباسى. ونىڭ اياسىندا اۆتوكلاۆتى توتىقسىزداندىرۋدى قولدانۋ ارقىلى ايرىقشا ءتوزىمدى, قۇرامىندا التىنى بار كونتسەنتراتتاردى قايتا وڭدەۋ بويىنشا امبەباپ كەشەندى سالۋ مۇمكىندىگى قاراستىرىلىپ وتىر. وڭدەۋ ۇدەرىسىنىڭ قورىتىندى كەزەڭى – دورە قورىتپاسى. ماماندار بولاشاق كومبينات ورتالىق ازيادا بالاماسى جوق بىرەگەي گيدرومەتاللۋرگيالىق وندىرىسكە اينالادى دەپ بولجايدى.
«نەگىزى دورە قورىتپاسىن الۋ وتە كۇردەلى تاسىلدەردەن تۇرادى. كونتسەنتراتتاردى ايىرىپ الۋدى قاراپايىم تىلمەن ءتۇسىندىرىپ كورەيىن. ء«توزىمدى» كەندەردە, كونتسەنتراتتاردا ميكروندى التىن سۋلفيدتارعا (مينەرالدار — پيريت پەن ارسەنوپيريتكە) كاپسۋلدانعان. مۇنداي التىن ۇساقتاۋ ۇدەرىسىن قانشا جۇرگىزسەڭىز دە, ناشار ايىرىلادى. قۇرامىندا كومىرتەك بار قوسىمشا زاتتارعا قاتىستى «ەكى مارتە ءتوزىمدى» تەرمينىن قولدانامىز. سەبەبى بۇل جاعدايدا التىن كومىرتەكپەن ۇستالىپ قالۋى مۇمكىن. سونداي-اق بۇل التىندى ايىرىپ الۋ كەزىندە ونىڭ ۇلەسىنىڭ تومەندەۋىنە اكەلەدى. ءبىزدىڭ كومبيناتتىڭ جوبالىق تسەحى ءسۋلفيدتى مينەرالداردى جوعارى تەمپەراتۋرادا جانە قىسىمدا وتتەگىمەن بۇزۋعا نەگىزدەلگەن, ياعني اۆتوكلاۆتى توتىقسىزداندىرۋ جانە ءسىڭدىرىپ, سىلتىسىزدەندىرۋدىڭ گيدرومەتاللۋرگيالىق تەحنولوگياسى تاڭدالدى. تەحنولوگيا قورشاعان ورتاعا اسەردى تومەندەتە وتىرىپ, ءارتۇرلى زاتتىق قۇرامداعى ءسۋلفيدتى ماتەريالدارمەن جۇمىس ىستەۋگە, جوعارى ءوندىرۋ دەڭگەيى بار ءارتۇرلى كەن ورىندارىنان الىنعان جوعارى كومىرتەكتى «ەكى مارتە ءتوزىمدى» ءسۋلفيدتى كونتسەنتراتتاردى ءتيىمدى قايتا وڭدەۋگە مۇمكىندىك بەرەتىن امبەباپ ەرەكشەلىكتەردى قامتيدى. ال اۆتوكلاۆتى توتىقسىزداندىرۋ – ءتوزىمدى كەندەردى قايتا وڭدەۋگە ارنالعان الەمدەگى ەكولوگيالىق تۇرعىدان ەڭ قاۋىپسىز تەحنولوگيا. جوبا ينۆەستورى – «Solidcore Resources», ينۆەستيتسيا سوماسى شامامەن 800 ملن دوللار», دەيدى «ەرتىس گيدرومەتاللۋرگيا كومبيناتى» جشس باس ديرەكتورى ارمان بەيسەمبينوۆ.
ءوندىرىس ورنى «پاۆلودار» ارنايى ەكونوميكالىق ايماعىندا ورنالاسادى. كەلەشەكتە وبلىس ەكونوميكاسىنا ەلەۋلى پايدا اكەلەدى دەپ كۇتىلەدى.
«زاماناۋي جوعارى تەحنولوگيالىق ءوندىرىس شامامەن 500 جۇمىس ورنىن قۇرۋعا مۇمكىندىك بەرەدى. بۇدان بولەك, كومبيناتتاعى بىرقاتار ۇدەرىستى قامتاماسىز ەتۋگە مەردىگەرلىك ۇيىمداردى تارتۋ جوسپارلانعان. ال بۇل ءوز كەزەگىندە قوسىمشا جۇمىس ورىندارىن اشۋعا جاعداي تۋدىرادى. «Solidcore Resources» كومپانياسى ءوزى ورنالاسقان اۋماقتىڭ الەۋمەتتىك تۇراقتىلىعىن قولداۋ ماقساتىندا ينۆەستيتسيا قۇيۋعا دا ءاردايىم ىنتالى. توپتىڭ قوستاناي مەن اباي وبلىستارىنداعى كاسىپورىندارى بىرنەشە جىل بويى ايماقتاردىڭ الەۋمەتتىك-ەكونوميكالىق دەڭگەيىن جاقسارتۋ جۇمىسى ناتيجەلى جۇرگىزىپ كەلە جاتىر. جاڭا سپورت زالدارى اشىلدى, كوپبالالى وتباسىلارعا باسپانالار ساتىپ الىندى, مەديتسينالىق جابدىقتار مەن مەديكامەنتتەر ساتىپ اپەرىلدى. ەلدى مەكەندەردەگى باقتار اباتتاندىرىلىپ, شالعايداعى اۋىلدار ينتەرنەتپەن قامتاماسىز ەتىلدى. وسى تاراپتا ەرتىس-بايان ءوڭىرى دە نازاردان تىس قالمايتىنى انىق. «Solidcore Resources» الەۋمەتتىك سالاداعى وڭ تاجىريبەسىن جالعاستىرۋدى كوزدەپ وتىر», دەدى ا.بەيسەمبينوۆ.
قازىر «پاۆلودار» ارنايى ەكونوميكالىق ايماعىندا كومپانيانىڭ اتىنا جەر پايدالانۋ قۇقىعى رەسىمدەلگەن. اۆتوكلاۆتى جەتكىزۋ ءىس-شارالارى باستالىپ, ەلەكترمەن, سۋمەن جابدىقتاۋ تەحنيكالىق شارتتارى الىندى. كومبينات وكىلدەرى ينجەنەرلىك ينفراقۇرىلىم مەن جۇرەتىن جولدار ءۇشىن قوسىمشا جەر ۋچاسكەلەرىن رەسىمدەۋ جۇمىسى جۇرگىزىلىپ جاتقانىن ايتادى. تسەحتىڭ ناقتى قاشان سالىنىپ بىتەتىنى ازىرشە بەيمالىم.
ارنايى ەكونوميكالىق ايماقتا جۇمىسىن باستاعان وندىرىستەر م ۇلىك, جەر سالىعىنان, كەدەن باجىنان, سونداي-اق كورپوراتيۆتى تابىس سالىعى مەن قوسىمشا قۇن سالىعىنان بوساتىلادى.
پاۆلودار وبلىسى
