ءان دوداسىنىڭ شىمىلدىعى «سارىجايلاۋ» كينوتەارىندا اشىلدى. تورەلىك ەتۋگە كەلگەن حالىق ءارتىسى, مەملەكەتتىك سىيلىقتىڭ لاۋرەاتى, پروفەسسور قايرات بايبوسىنوۆ:
– مەن – جۇسىپبەك ەلەبەكوۆتىڭ العاشقى شاكىرتىنىڭ ءبىرىمىن. جانىبەك كارمەنوۆ, قازىر وسىندا وتىرعان عالىم مۇحامەدين دە – ءتول شاكىرتى. كومپوزيتور تۇرسىنعازى راحىموۆ ءسال كەيىندەۋ كەلدى. جۇسەكەڭ ءومىر بويى جيناعان اندەرىن بىزگە ۇيرەتتى. ءبىز ءبارىن مۇقيات بويىمىزعا سىڭىردىك. ول كىسىنىڭ ءبىر كەرەمەتى ءبارىمىزدىڭ بولاشاعىمىزدى بولجاپ كەتتى. كىمنىڭ ءانشى بولاتىن, بولمايتىنىن ءدوپ ايتاتىن. قازىر سول الماتىداعى ەسترادا ستۋدياسى ج.ەلەبەكوۆ اتىنداعى ەسترادا-تسيرك كوللەدجى دەپ اتالادى, – دەدى بايقاۋ الدىنداعى ءباسپاسوز ءماسليحاتىندا.
ءداستۇرلى ءان دوداسىندا استانا, الماتى, شىمكەنت, تاراز قالالارىنان, جەتىسۋ, باتىس قازاقستان, اقتوبە, سولتۇستىك قازاقستان, پاۆلودار, اباي, اقمولا وڭىرلەرىنەن ونەرپازدار كەلىپ, باق سىنادى. ءار وڭىردەن ىرىكتەلىپ كەلگەن كىل مىقتى تالانتىن كورسەتىپ, جۇلدىزىن جاعۋعا تالپىندى.
سونىمەن, ءان الىبى قايرات بايبوسىنوۆ باستاپ, قازاقستاننىڭ ەڭبەك سىڭىرگەن ءارتىسى عالىم مۇحامەدين, قازاقستاننىڭ ەڭبەك سىڭىرگەن قايراتكەرى جاقسىگەلدى كەمالوۆ, جۇسىپبەك ەلەبەكوۆتىڭ ۇلى ەستاي ەلەبەكوۆ, مادەنيەت سالاسىنىڭ ۇزدىگى تالعات ابۋعازين, «قۇرمەت» وردەنىنىڭ يەگەرى قايرات كاكىموۆ, مادەنيەت قايراتكەرى ابىلاي قارمىسوۆ, «قۇرمەت» وردەنىنىڭ يەگەرى سەرجان مۇسايىن سىندى ازاماتتار قازىلىق قىلىپ, باعاسىن بەردى.
ماراپاتتاۋ ءراسىمى كەزىندە وبلىس اكىمىنىڭ ورىنباسارى الىبەك الدەنەي جۇلدەگەرلەردى قۇتتىقتادى.
سونىمەن, قازاق ۇلتتىق ۋنيۆەرسيتەتىنىڭ ستۋدەنتى داريا بەكپەنبەتوۆا, قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى ماديار ومىرعالي, قازاق ۇلتتىق ونەر ۋنيۆەرسيتەتىنىڭ ستۋدەنتى شەرحان تۇياق, جەتىسۋ وبلىسىنان كەلگەن ءسابينۇر قاھارمان, نۇرمۇحان ءجانتورين اتىنداعى اتىراۋ وبلىستىق فيلارمونياسىنىڭ ءانشىسى اليدا حۋانوۆا بايقاۋدىڭ ديپلوماتتارى اتاندى.
مەيىرحان ادامبەكوۆ اتىنداعى ارنايى سىيلىققا تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتى باقتيار ورال لايىق دەپ تانىلدى. ۇكىلى ىبىراي اتىنداعى اقمولا وبلىستىق فيلارمونياسىنىڭ ءانشىسى ومىرحاق شەشحان ماناربەك ەرجانوۆ اتىنداعى ارنايى سىيلىقتىڭ يەگەرى اتاندى. عابباس ايتباەۆ اتىنداعى ارنايى سىيلىق قازاق ۇلتتىق كونسەرۆاتورياسىنىڭ ستۋدەنتى نۇردانا سالىمحانعا, قالي بايجانوۆ اتىنداعى جۇلدە قازاق ۇلتتىق كونسەرۆاتورياسىنىڭ ستۋدەنتى ايبەك تاتتىمبەككە بۇيىردى. يگىلىك وماروۆ اتىنداعى ارنايى سىيلىق قازاق ۇلتتىق ونەر ۋنيۆەرسيتەتىنىڭ ستۋدەنتى اقنيەت سەرعازيناعا, رىمتاي بودەسوۆ اتىنداعى ارنايى سىيلىق قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى ۇلجان ابىلحاسيموۆاعا تابىستالدى.
جۇلدەلى ءۇشىنشى ورىنعا تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتى ارۋجان ساعىندىق, بۇقار جىراۋ اۋدانىنان قاتىسقان قۋاندىق توكەنوۆ, قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى ساۋلەت امانعازين لايىق دەپ تانىلدى. ال ەكىنشى ورىندى تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتى ايدا سرايل, نۇرمۇحان ءجانتورين اتىنداعى اتىراۋ وبلىستىق فيلارمونياسىنىڭ ءانشىسى جاسۇلان بازارباەۆ الدى. ءبىرىنشى ورىن قازاق ۇلتتىق ۋنيۆەرسيتەتىنەن كەلگەن كامال مايدانوۆقا بۇيىردى. ال ايتۋلى ءان بايقاۋىنىڭ باس جۇلدەسىن قازاق ۇلتتىق ونەر ۋنيۆەرسيتەتىنىڭ ستۋدەنتى بەك مىڭباي جەڭىپ الدى.
قاراعاندى وبلىسى
