دزيۋدودان الەم چەمپيوناتى ەلىمىزدە وتەدى

جوعارىداعى جاڭا­لىقتى بارشا قازاق جانكۇيەرلەرى جىلى قابىلدادى. سەبەبى, بۇل جارىس وليمپيا ويىندارى قارساڭىندا وتەدى. ياعني تورتجىلدىقتىڭ باس­تى دوداسىنا قاتىساتىن دزيۋدو كۇرەسىنىڭ حاس شەبەرلەرىنىڭ باسىم بولىگى ءدال وسى بايراقتى باسەكە بارىسىندا انىقتالادى. بۇل جاعداي ءبىزدىڭ كومانداعا 2028 جىلى لوس-اندجەلەستە الاۋى تۇتاناتىن جا­رىسقا تولىق قۇرامدا اتتانۋعا تاماشا مۇمكىندىك تۋىنداتىپ وتىر.

2015 جىلدىڭ تامىز ايى­نىڭ سوڭعى كۇندەرى الەم چەمپيونا­تىنىڭ استانادا دۇركىرەپ وتكەنى ءالى ەسىمىزدە. سول كەزگە دەيىن ەلىمىزدىڭ دزيۋدوشىلارى دۇنيە­جۇزىلىك دودادا نەبارى بەس جۇلدە عانا العان ەدى. تارقاتىپ ايتساق, 2001 جىلى ميۋنحەندەگى مايداندا قوس اسحات – جيتكەەۆ پەن شاحاروۆ قولا مەدالدى مويىندارىنا ءىلدى. 2009 جىلى روتتەردامدا ماكسيم راكوۆ التىن السا, 2011 جىلى پاريجدە كۇمىسپەن كۇپتەلدى. 2013 جىلى ريو-دە-جانەيرودا ازامات مۇقانوۆ فينالعا دەيىن القىنباي جەتىپ, فينالدا جا­پو­نيانىڭ داڭقتى بالۋانى ما­ساشي ەيۋنيماعا ەسە جىبەردى.

استاناداعى جارىستا اسا جەڭىل سالماقتا كۇرەسكەن قازاقتىڭ ەكى بىردەي التىن اسىقتاي ازاماتى – ەلدوس سمەتوۆ پەن رۋستام ىبىراەۆ باس جۇلدەنى ءوزارا ساراپقا سالدى. بۇل تارتىس ەلدوستىڭ پايداسىنا شەشى­لىپ, ول الەم چەمپيونى اتانسا, رۋس­تام كۇمىس مەدالدى قا­ناعات تۇتتى. بۇرىن-سوڭدى جاھان­دىق جارىستىڭ فينالىندا قان­داستارىمىز ءبىر-بىرىمەن بەلدەسكەن ەمەس. سول كەزدە جەڭىس تۇعىرىندا قوس قازاقتىڭ قاتار تۇرعانىن كورگەندە, قۋانباعان, شاتتانباعان, مارقايماعان, كەۋدەسىن ماقتانىش سەزىمى كەرنەمەگەن جانكۇيەر جوق شىعار, ءسىرا!

ەلىمىزدە وتكەن الەم چەمپيو­ناتى ەل دزيۋدوسىنىڭ دامۋىنا تىڭ سەرپىن بەردى. تاتاميدەگى تابىسىمىز ەسەلەنىپ, كوپتەگەن ءدۇبىرلى دودادا ولجاعا كەنەلدىك. سودان بەرگى توعىز جىل ارالىعىندا وتگونتسەتسەگ گالبادراح (2017, 2018 جىلدارى قولا), ەرلان سەرىكجانوۆ (2018 جىلى كۇمىس), ەلدوس سمەتوۆ (2019, 2022 جىلدارى قولا), عۇسمان قىرعىزباەۆ (2021 جىلى كۇمىس), ءابيبا ابۋجاقىنوۆا (2022, 2024 جىلدارى قولا) الەم چەمپيوناتىندا جۇلدەلى ورىنداردى يەلەندى. وعان وليمپيا ويىن­دارداعى تابىستارىمىزدى قو­سىڭىز. ءسال ەرتەرەكتە, 2008 جىلى بەيجىڭدەگى باسەكەدە اسحات جيت­كەەۆ كۇمىسكە قول جەتكىزسە, 2016 جىلى ريو-دە-جانەيرودا ەلدوس كۇمىس, وتگونتسەتسەگ قولا مەدالعا يە بولدى. 2021 جىلى توكيودا سمەتوۆ قولا مەدالدى قورجىنعا سالدى. ال بيىل پاريجدە ەلدوس تاريحتا قالاتىنداي تاعى ءبىر ۇلكەن ءىس تىندىردى. تارازدىڭ تارلانى ەلدىڭ دزيۋدوشىلارى اراسىنان شىق­قان تۇڭعىش وليمپيادا چەمپيونى رەتىندە ءوز ەسىمىن سپورتتىق شە­جىرەگە التىن ارىپتەرمەن جازدى. عۇسمان قولا جۇلدەنى ولجالادى. ناتيجەسىندە جەرلەستەرىمىز جالپى كوماندالىق ەسەپتە جەتىنشى ورىنعا تابان تىرەدى.

مىنە, ەندى 2027 جىلى تورتكۇل دۇنيەنىڭ دزيۋدوشىلارى قايتا قازاق توپىراعىندا باس قوسقالى جاتىر. اتالعان جارىس قاي قالادا وتەتىنى ءالى ناقتىلانعان جوق. استا­نا ما, الدە الماتى ما؟ بىراق ول ما­ڭىزدى ەمەس. ەڭ باستىسى, دزيۋدو دەسە دەلەبەسى قوزىپ, قانى قىزاتىن مىڭداعان قازاق جان­كۇيەرىنە وسى كەرەمەت سپورتتىق شارانى كورۋگە تاماشا مۇمكىندىك تۋىنداپ وتىر.

بۇل كۇندەرى الماس السەنوۆ ەسىمدى قازاقتىڭ ىسكەر جىگىتى حالىق­ارالىق دزيۋدو فەدەراتسيا­سىندا لاۋازىمدى قىزمەت اتقارادى. ول «IJF» پرەزيدەنتىنىڭ كەڭەسشىسى. ياعني ماريۋس ۆيزەردىڭ وڭ قولى دەپ ايتساق تا بولادى. الماستىڭ ءوزى دە كەزىندە جاقسى كۇرەسكەن. بىرقاتار حالىقارالىق جارىستا جەڭىس تۇ­عىرىنا كوتە­رىلىپ, ەلىمىزدىڭ ۇلت­تىق قۇرا­ماسى ساپىندا ونەر كورسەتتى. كەيىن­نەن قازاقستان دزيۋدو فە­دەراتسياسىنىڭ ۆيتسە-پرەزيدەنتى, ازيا دزيۋدو وداعىنىڭ ماركەتينگ جونىندەگى ديرەكتورى, ەۋروپا دزيۋدو وداعى پرەزيدەنتىنىڭ كەڭەسشىسى قىزمەتتەرىن ابىرويمەن اتقاردى. بۇگىندە ول «IJF»-تا ەڭ­­بەك ەتەدى. ال­سەنوۆتىڭ وسىنداي بەلدى ۇيىمدا باس­شىلىق قىزمەت اتقارعانىنىڭ پايداسى پاريج وليمپياداسى بارىسىندا انىق بايقالدى. جانى ءار كەز ادىل­دىكتى قالايتىن قانداسىمىز تورت­جىلدىقتىڭ باستى دوداسىندا وتاندىق دزيۋدوشىلارىمىزدىڭ بىردە-بىرەۋىنە قيانات جاسالۋىنا جول بەرمەدى. مىنە, ەندى الماس جەڭىس ۇلى الەم چەمپيوناتىنىڭ قايتا قازاق توپىراعىنا ورالۋى­نا سۇبەلى ۇلەس قوسىپ وتىر.

جوعارىدا ايتىلعان جاعىمدى جاڭالىقتى ەستىگەن بەتتە بۇل كۇندەرى شۆەيتساريادا تۇرىپ جات­قان «IJF» پرەزيدەنتىنىڭ كەڭەس­شىسىمەن حابارلاستىق. «الەم چەم­­پيوناتىنىڭ ەلىمىزدە ۇيىم­داستىرىلۋى وتە ماڭىزدى وقيعا. ونىڭ ۇستىنە, بۇل جارىستىڭ جالاۋى وليمپيا ويىندارى قارسا­ڭىندا جەلبىرەيدى. سونىمەن قاتار ەلىمىزدە حالىقارالىق دزيۋدو اكا­دەمياسىنىڭ (IJF Acadey) فيليالىن اشۋ جونىندە كەلىسىمگە قول قويدىق. ول جەردە بالۋانداردىڭ ەش الاڭسىز دايارلانۋعا بارلىق جاع­داي جاسالۋىمەن قاتار, عىلىم مەن مەديتسينانى دا قاتار الىپ ءجۇرۋ كوزدەلىپ وتىر. وعان دا اي­رىقشا ءمان بەرىلەدى. سەمينارلار مەن ترەنينگتەر ءوتىپ, تورەشىلەر مەن باپكەرلەردىڭ بىلىكتىلىگىن ارتتىرۋعا ارنالعان ارنايى كۋرستار ۇيىم­داستىرىلادى. باسقا دا تولىپ جاتقان شارۋالار بار. سونىڭ بارلىعى دا اكادەميادا جۇزەگە اسىرىلادى. وسى ءىس-شا­رالار مەملەكەت باسشىسى قاسىم-جومارت توقاەۆتىڭ سپورت سالا­سىندا جۇيەلى وزگەرىستەر ەنگىزۋ جونىندەگى تاپسىرماسىمەن تولىقتاي ۇيلەسەدى. بۇل جوبا – سپورتتىق ينفرا­قۇرىلىمداردى مودەرنيزاتسيالاۋ, جوعارى دارە­جەلى مامانداردى دايارلاۋ تۋرالى باعدارلامانى ورىنداۋدىڭ بىردەن-ءبىر جولى. ءسوز ورايى كەلگەندە, وسى جوبامىزدى قولداعان تۋريزم جانە سپورت ءمينيسترى ەربول مىرزابوسىنوۆ مىر­زاعا زور العىسىمدى بىلدىرگىم كەلەدى», – دەيدى الماس السەنوۆ.