فوتو: ۇكىمەتتىڭ ءباسپاسوز قىزمەتى
كۇن تارتىبىندە ءۇش ماسەلە: كەلەسى جىلعى سۋ تاسقىنى قاۋپى بار كەزەڭگە دايىندىق, جەكە سەكتورداعى جىلۋ بەرۋ ماۋسىمى, كوممۋنالدىق جانە جول قىزمەتتەرىنىڭ قىسقى كەزەڭگە دايىندىعى قارالدى.
ۆيتسە-پرەمەر قانات بوزىمباەۆتىڭ تاپسىرماسى بويىنشا وڭىرلەردىڭ 2025 جىلعى سۋ تاسقىنى قاۋپى بار كەزەڭگە دايىندىعىنا تەكسەرۋ جۇرگىزىلگەن.
بۇگىنگى تاڭدا وڭىرلەردە 122,6 شاقىرىم درەناج جۇيەسى سالىنىپ, جوندەلگەن. 1545 سۋ وتكىزۋ قۇرىلىسى ورناتىلىپ, اۋىستىرىلعان. 1270 شاقىرىم كانال مەن 21 069 شاقىرىم ارىق تازارتىلىپ, 101 گيدروتەحنيكالىق قۇرىلىسقا اعىمداعى جوندەۋ جۇرگىزىلگەن.
سونىمەن قاتار تەكسەرۋ ناتيجەلەرى بىرقاتار وبلىستا وزەن ارناسى جاعالاۋىن نىعايتۋ جانە ءتۇبىن تەرەڭدەتۋ بويىنشا جۇمىستار ءالى اياقتالماعانىن كورسەتتى. اقمولا, اقتوبە, باتىس قازاقستان, پاۆلودار, سولتۇستىك قازاقستان جانە قوستاناي وبلىستارىنىڭ 84 ەلدى مەكەنىندە كۇردەلى قۇرىلىس, قورعانىس بوگەتتەرىن قالپىنا كەلتىرۋ جانە نىعايتۋ جۇمىستارى جۇرگىزىلىپ جاتىر.
ء«وڭىر اكىمدەرى كۇزدىڭ سوڭىنا دەيىن ەلدى مەكەندەردىڭ اينالاسىنا توپىراق ءۇيۋ, سۋ بۇرۋ ارنالارىن تازارتۋ جانە وزەندەردى قالىپقا كەلتىرۋ جۇمىستارىن اياقتاۋ كەرەك. سۋ رەسۋرستارى جانە يرريگاتسيا مينيسترلىگى گيدروتەحنيكالىق قۇرىلىستاردى رەكونسترۋكتسيالاۋ جانە جاڭعىرتۋ جۇمىستارىن جەدەلدەتۋى قاجەت», دەپ تاپسىردى پرەمەر-ءمينيستردىڭ ورىنباسارى.
تۇرعىن ءۇي سەكتورىندا جىلۋ بەرۋ ماۋسىمىن وتكىزۋگە دايىندىق بارىسى تۋرالى ەسەپتەر تىڭدالدى.
تۇرعىن ۇيلەر مەن وزگە دە نىسانداردىڭ ىشىندە ورناتىلعان اۆتونومدى جىلىتۋ جۇيەلەرى ۇلكەن الاڭداۋشىلىق تۋدىرىپ وتىر. وسىلايشا, ەلىمىز بويىنشا ەرەجە بۇزىپ, اۆتونومدى جىلىتقىشتى 641 عيمارات ءالى دە پايدالانىپ وتىر.
«توتەنشە جاعدايلار مينيسترلىگىنە مەملەكەتتىك ورگاندارمەن جانە اكىمدىكتەرمەن بىرلەسىپ, تۇرعىن ءۇي سەكتورىندا ءورت قاۋىپسىزدىگى ايلىعىن وتكىزۋدى تاپسىرامىن. گاز ينسپەكتسياسىن ىسكە قوسىڭىزدار. پەش جاعاتىن ۇيلەردى, ءبىرىنشى كەزەكتە حالىقتىڭ الەۋمەتتىك وسال توپتارىن ەسەپكە الۋ قاجەت. ونداي ۇيلەردىڭ بارلىعىندا ءيىستى انىقتايتىن گاز داتچيكتەرى ورناتىلۋى ءتيىس», دەدى قانات بوزىمباەۆ.
قىس مەزگىلىندە جولدارداعى قىزمەت كورسەتۋ ساپاسى تۋرالى كولىك مينيسترلىگى ەسەپ بەردى.
وتىرىستا اقتوبە وبلىسىنداعى «سامارا-شىمكەنت» تاسجولى ۋچاسكەسىنە جانە جامبىل وبلىسى قورداي اۋدانىنداعى جولدارعا ەرەكشە نازار اۋدارىلدى.
ىشكى ىستەر مينيسترلىگىنە بوران كەزىندە ءتيىستى قىزمەتتەردىڭ حابارلامالارىن ەلەمەيتىن جۇرگىزۋشىلەرگە جاۋاپكەرشىلىكتى كۇشەيتۋ ماسەلەسىن پىسىقتاۋ تاپسىرىلدى.
«الداعى "قىس-2024" وقۋ-جاتتىعۋى شەڭبەرىندە جولداردا مۇز قاتىپ, كولىكتەردىڭ قوزعالۋىنا قيىندىق تۋىنداعان جاعدايدا ۋاكىلەتتى ورگانداردىڭ ءىس-قيمىل الگوريتمىن پىسىقتاۋ كەرەك. توتەنشە جاعدايلار مينيسترلىگىنە وقۋ-جاتتىعۋعا ءتيىستى دايىندىق جۇمىستارىن قامتاماسىز ەتۋدى, ماسەلەلەردى شەشۋ بويىنشا قابىلدانىپ جاتقان شارالاردى تەكسەرۋدى تاپسىرامىن. ءبىز قىس مەزگىلىنىڭ قاۋىپسىز ءوتۋىن قامتاماسىز ەتۋىمىز قاجەت», دەپ اتاپ ءوتتى ۆيتسە-پرەمەر.
