وزىق شەتەلدىك پراكتيكانى ەسكەرە وتىرىپ, قر سوت اكىمشىلىگىن دامىتۋ ستراتەگياسىنىڭ جوباسى ازىرلەنگەن. ونى «دوڭگەلەك ۇستەلدە» تالقىلاۋعا پارلامەنت دەپۋتاتتارى, مەملەكەتتىك ورگاندار, حالىقارالىق ۇيىمدار, ادۆوكاتتار قاۋىمداستىعى وكىلدەرى, زاڭگەرلەر جينالعان.
قر پرەزيدەنتىنىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ, حساق (ماسا) پرەزيدەنتى لۋيس پالما جانە سوت تورەلىگىنىڭ تيىمدىلىگى جونىندەگى ەۋروپالىق كوميسسيانىڭ (CEPEJ) پرەزيدەنتى فرانچەسكو دەپاسكۋال قازاقستاننىڭ سوت مەنەدجمەنتى مودەلىنىڭ پروگرەسسيۆتىلىگىن جانە سوتتاردىڭ IT-ونىمدەرىن اتاپ ءوتتى.
ايتا كەتەيىك, حالىقارالىق سوت ۇيىمدارىنىڭ قىزىعۋشىلىعى - قر سوت اكىمشىلىگى سالاسىنداعى كوشباسشىلاردىڭ ءبىرى رەتىندە بەدەلىن تانۋ.
استاناداعى ەقىۇ باعدارلامالار ءوفيسىنىڭ باسشىسى فولكەر فروبارت قر اۆتونوميالىق ءسا-ءنىڭ قۇرىلۋى ونىڭ باسقا مەملەكەتتىك جانە سوت ورگاندارىمەن ءوزارا ءىس-قيمىلىن ودان ءارى زاڭنامالىق تۇرعىدان رەتتەۋدى تالاپ ەتەتىن باتىل قادام ەكەنىن انىقتاعان.
ستراتەگيا, ەڭ الدىمەن, مەملەكەت باسشىسىنىڭ سوت اكىمشىلىگى سالاسىنداعى مەملەكەتتىك ساياساتتى قالىپتاستىرۋ, سوت تورەلىگىن تاۋەلسىز جۇزەگە اسىرۋ ءۇشىن جاعداي جاساۋ جانە سوت جۇيەسى مەن سوتتاردىڭ قىزمەتىن جەتىلدىرۋ بويىنشا جۇيەلى رەفورمالاردى ازىرلەۋ جونىندە العا قويعان مىندەتتەردى ساپالى ورىنداۋعا ارنالعان.
بۇل تۋرالى ءوز سوزىندە قر ءسا باسشىسى ن.احمەتزاكيروۆ ءسا-ءنىڭ قىزمەتى سوت جۇيەسىنە دەگەن سەنىمدى ارتتىرۋعا جانە ۇزاق مەرزىمدى كەلەشەكتە «سوتتار بولاشاعىنا» وتۋگە جاعداي جاساۋعا باعىتتالعانىن اتاپ ءوتتى.
ستراتەگيالىق باعىتتار رەتىندە ءتيىمدى سوت مەنەدجمەنتى, سوتتاردى ساپالى قامتاماسىز ەتۋ جانە جۇيەلى دامۋ ايقىندالعان. مۇنىڭ ءبارى سوتتاردىڭ تاۋەلسىزدىگىن نىعايتۋعا جانە زاڭ ۇستەمدىگى قاعيداتىن جۇزەگە اسىرۋدى قامتاماسىز ەتۋگە مۇمكىندىك بەرەدى.
سىندارلى پىكىرتالاسقا قاتىسۋشىلار الداعى ۋاقىتتا بىرلەسكەن جۇمىس ءۇشىن بىرقاتار ناقتى ءىس-شارالاردى بەلگىلەگەن.
ەسكە سالا كەتەيىك, بۇعان دەيىن مەملەكەت باسشىسىنىڭ SEPEJ پرەزيدەنتى فرانچەسكو دەپاسكۋالەمەن جانە MASA پرەزيدەنتى لۋيس پالمامەن كەزدەسۋىندە سوت اكىمشىلىگىن دامىتۋ ماسەلەلەرى تالقىلانعان ەدى.
