فوتو: اقمولا وبلىسىنىڭ اكىمدىگى
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا نىسانداردىڭ قۇرىلىسىنا بيۋدجەتتەن 10 ميلليارد تەڭگەگە جۋىق قاراجات بولىنگەن. 43 مىڭنان استام اۋىل تۇرعىندارى مەديتسينالىق قىزمەتكە قول جەتكىزەدى دەپ جوسپارلانعان.
العاشقىلاردىڭ ءبىرى بولىپ ەگىندىكول اۋدانى, باۋمانسكوە اۋىلىندا جاڭا فەلدشەرلىك-اكۋشەرلىك پۋنكت اشىلعان. ونىڭ قۇرىلىسىنا بيۋدجەتتەن 246 ميلليون تەڭگە بولىنگەن. فاپ كۇنىنە 40 ناۋقاستى قابىلداي الاتىنى اتاپ ءوتىلدى.
«قازىر باسقا دا مەديتسينالىق نىسانداردىڭ قۇرىلىسى ءجۇرىپ جاتىر, ولار جىل سوڭىنا دەيىن كەزەڭ-كەزەڭىمەن اشىلادى. بارلىق مساك اۋرۋحانالارى شالعاي اۋىلدىق ەلدى مەكەندەردە سالىنىپ جاتىر, بۇل اۋىل تۇرعىندارىنىڭ مەديتسينالىق كومەككە قولجەتىمدىلىگىن ايتارلىقتاي جاقسارتادى. بۇل رەتتە 20-دان استام دەنساۋلىق ساقتاۋ نىسانىندا كۇردەلى جوندەۋ جۇمىستارى جۇرگىزىلىپ جاتىر. بۇل ءۇشىن بيۋدجەتتەن 3 ميلليارد تەڭگەگە جۋىق قارجى بولىنگەن. بۇل مەديتسينالىق ينفراقۇرىلىمنىڭ توزۋىن ازايتىپ, مەديتسينالىق قىزمەت كورسەتۋ ساپاسىن ارتتىرۋعا سەپتىگىن تيگىزەدى», دەدى وبلىس اكىمىنىڭ ورىنباسارى.
ايتا كەتەيىك, فەلدشەرلىك-اكۋشەرلىك پۋنكت 800-گە جۋىق ادامدى قۇرايتىن باۋمانسكوە جانە قورجىنكول اۋىلدارىنىڭ تۇرعىندارىنا قىزمەت كورسەتەدى. ول ءارتۇرلى مەديتسينالىق كومەك كورسەتۋگە ارنالعان ارنايى كابينەتتەرمەن جابدىقتالعان.
