ابدەن قۇرعاپ-قۋراپ تۇرعان دالا ءشوبى بوي بەرمەي جانىپ جاتىر. قاتتى ەكپىندى جەل, تاۋلى جەرلەر ءورتتى سوندىرۋدە قيىندىق تۋدىرىپ تۇر. وكىنىشكە قاراي, ءورتتىڭ سالدارىنان قازا تاپقان, زارداپ شەككەندەر بار.
ءورت ءسوندىرۋ بارىسىندا تجد ءورت ءسوندىرۋ جانە اپاتتىق-قۇتقارۋ قىزمەتىنىڭ بىرنەشە قىزمەتكەرى مەن ەرىكتىلەردىڭ ءبىرىن كۇيىك شالىپ, ولار اۋداندىق اۋرۋحاناعا جەتكىزىلدى. تاعى ءبىر زارداپ شەككەن ءورت ءسوندىرۋشى تىكۇشاقپەن قاراعاندىعا اپاردى.
ءورت ءارى كۇشەيە ءتۇسىپ, ەكىنشى كۇنگە اۋعاندا پاۆلودار وبلىسىنا قاراستى باياناۋىل اۋدانىنىڭ اۋماعىن دا شارپىدى. ءورت سوندىرۋگە «قازاۆياقۇتقارۋ» اق-نىڭ تىكۇشاقتارى كومەككە كەلدى.
سونداي-اق ءورتتى سوندىرۋگە قاراعاندى وبلىسى تجد مەن جەرگىلىكتى اتقارۋشى ورگاندارىنىڭ كۇشتەرىنەن 386 ادام, 64 تەحنيكا, تجم مەن قورعانىس مينيسترلىگىنىڭ اسكەري قىزمەتكەرلەرى مەن اۋە كەمەلەرى جۇمىلدىرىلدى.
قارقارالى اۋدانىندا 2 جىلجىمالى تاماقتانۋ پۋنكتى جاساقتالدى, ولار ازىق-ت ۇلىك, زاتتاي جاراقتارمەن قامتاماسىز ەتىلدى. سونىمەن قاتار قاراعاندى وبلىسى تجد 8 721 2 51 72 23 جەدەل جەلى تەلەفونى جۇمىس ىستەپ تۇر.
قاراعاندى, پاۆلودار وبلىستارىنىڭ شەكارا اۋماعىنداعى ءورتتىڭ جالپى اۋدانى 45 مىڭ گا قۇرادى. ءورت وشاعىنا جاقىن باياناۋىل اۋدانىنا قاراستى جەلتاۋ اۋىلىنان 18 ادام قاۋىپسىز جەرگە كوشىرىلدى, ونىڭ سەگىزى – بالا.
توتەنشە جاعدايلار مينيسترلىگىنىڭ كوماندالىق ورتالىعىندا وسى جاعدايعا بايلانىستى ارنايى شتاب قۇرىلدى. ءورت اۋماعىنا توتەنشە جاعدايلار ۆيتسە-ءمينيسترى ەرلان نۇرپەيىسوۆ پەن قاراعاندى وبلىسىنىڭ اكىمى ەرماعامبەت بولەكپاەۆ باردى.
ءورت كەزىندە ازاماتتىق قورعانىس قىزمەتىنىڭ سەرجانتى, 1991 جىلى تۋعان قايرات حالي قازا تاپتى. ونىڭ ارىپتەستەرى 1994 جىلى تۋعان سايان كۇمىسباەۆ, 2000 جىلى تۋعان ولجاس ءالىمحان, 1996 جىلى تۋعان سەرىكباي اقمەديچ تە زارداپ شەكتى. كۇيىك شالىپ, زارداپ شەككەندەر شۇعىل تۇردە ەمدەۋ ورىندارىنا جەتكىزىلدى.
قاراعاندى وبلىسىنىڭ اكىمى ەرماعانبەت بولەكپاەۆ, ونىڭ ورىنباسارى الىبەك الدەنەي, ساران قالاسىنىڭ اكىمى ەركىن باۋلىقوۆ قازا تاپقان ءورت ءسوندىرۋشىنىڭ جاقىندارىنا كوڭىل ايتىپ, مارقۇمنىڭ وتباسىنا جەرلەۋ ءىس-شارالارىن وتكىزۋگە بارلىق قاجەتتى كومەك كورسەتىلەتىنىن حابارلادى.
قاراعاندى وبلىسى
