رەفەرەندۋم كەزىندە 664 كوميسسيا, ونىڭ ىشىندە وبلىستىق, اۋماقتىق جانە ۋچاسكەلىك كوميسسيا قۇرامىنىڭ دا ەڭبەگىن ايتا كەتكەن ءجون. داۋىس بەرۋ ۇدەرىسىن تاۋەلسىز باقىلاۋشىلار – قوعامدىق بىرلەستىكتەردىڭ وكىلدەرى قاداعالاپ شىقتى.
رەفەرەندۋم اشىقتىعىن باقىلايتىن حالىقارالىق بايقاۋشىلار توبى دا ءوز جۇمىسىن تىڭعىلىقتى اتقاردى. بايقاۋشىلاردى قاراعاندىداعى كەنشىلەر مادەنيەت سارايىندا ورنالاسقان №17 رەفەرەندۋم ۋچاسكەسىندە كەزىكتىرىپ قالدىق. تمد بايقاۋشىلار كوميسسياسىنىڭ مۇشەسى دميتري ميحايلوۆ رەفەرەندۋمدا ەشقانداي زاڭ بۇزۋشىلىق تىركەلمەگەنىن باسا ايتتى.
ء«بىز ءتۇس اۋعانشا التى ۋچاسكەدە بولدىق. ەشقانداي ەسكەرتۋ جاساعان جوقپىز. ءبارى زاڭ اياسىندا ءوتىپ جاتىر. ءبىز اۋىلدىق جانە قالالىق جەرلەرگە باقىلاۋ جۇرگىزدىك. تاڭداۋ جاساۋشىلاردىڭ قاتارى قالىڭ. كوڭىل كۇيى دە تاماشا. جاس ەرەكشەلىكتەرى ارقيلى», دەدى بايقاۋشى.
اۋدان, اۋىلداعى رەفەرەندۋم ۋچاسكەلەرى دە تالاپقا ساي جۇمىسىن اتقارىپ, ەلىنىڭ ەرتەڭىنە بەيجاي قارامايتىنىن تانىتىپ, حالىق بەلسەندىلىگىن كورسەتتى. اسىرەسە ناۋقاننىڭ تاڭعى ۋاقىتىندا شەت اۋدانىنىڭ داۋىس بەرۋشىلەرى وق بويى وزىق بولدى.
«ەلىمىز ءۇشىن ماڭىزدى شەشىم قابىلداۋ ماقساتىندا اۋدان تۇرعىندارى ەرتە تۇردى. ونى داۋىس بەرۋگە كەلگەن ادامداردان اڭعارۋعا بولادى. اۋداندا 51 رەفەرەندۋم ۋچاسكەسى بار. بارلىعى تالاپقا ساي جابدىقتالىپ, كوميسسيا قۇرامى بەكىتىلگەن», دەيدى شەت اۋداندىق رەفەرەندۋم كوميسسياسىنىڭ توراعاسى بەرىكبول داۋلەت ۇلى.
سونداي-اق نۇرا اۋدانىنداعى №615 رەفەرەندۋم ۋچاسكەسىنە كيمەشەك كيىپ بارعان «اق اجەلەر» حورى تاڭداۋ جاساپ, مەرەكەلىك قۋانىش سىيلادى. داۋىس بەرۋگە كەلگەندەر كەلىستى اجەلەرمەن سۋرەتكە ءتۇستى.
ايتپاقشى, قاراعاندىداعى №41 رەفەرەندۋم ۋچاسكەسىنە دينوزاۆر بولىپ كيىنىپ كەلگەن داۋىس بەرۋشى جۇرتتى ءسۇيسىندىردى. ونىڭ قيمىل-قوزعالىسى, اسىرەسە داۋىس بەرۋ ايماعىنا بويى سىيماي, سوندا دا تالپىنىپ كىرگەن ءساتى ۋچاسكەدەگىلەردىڭ جۇزىنە كۇلكى ءۇيىرىپ, ءبىر كوتەرىڭكى كوڭىل كۇي سىيلادى. سويتسەك, داۋىس بەرۋ قۇقىنا العاش يە بولعان ەرنار ەسىمدى قاراعاندى تۇرعىنى ەكەن.
سونداي-اق بالقاش قالاسىندا وتباسى قۇرعان جاس جۇبايلار ەرنار ەربولات ۇلى مەن ارۋجان شايمەردەن ازاماتتىق مىندەتىن ورىنداۋعا №192 رەفەرەندۋم ۋچاسكەسىنە كەلىپ, داۋىسىن بەردى. ەرلى-زايىپتى ەكەۋ تاريحي كۇنى نەكەسىن قيىپ قانا قويماي, ءبىراۋىزدان ساياسي ناۋقاننان قالىس قالماۋعا شەشىم قابىلداعان. ويتكەنى وزدەرىنىڭ بولاشاعى ءبىز بەرگەن داۋىسقا دا بايلانىستى دەيدى.
قاراعاندى وبلىسى
