فوتو: مۇرات قاپان ۇلى
بەلگىلى بولعانداي, قاراعاندى جاقتان كەلگەن ءورت باياناۋىل اۋدانى كۇركەلى اۋىلدىق وكرۋگىنە قارايتىن جەلتاۋ بولىمشەسى مەن باينەكە قىستاعىنىڭ اۋماعىنا كىرگەن. قاتتى جەل ءورتتى اۋىزدىقتاۋ جۇمىستارىن قيىنداتا ءتۇستى.
«6 قازاندا قاراعاندى وبلىسى قارقارالى اۋدانى قوياندى اۋىلىنىڭ ماڭىندا قۇرعاق ءشوپتىڭ جانىپ كەتتى. ءورت ورنىنا ورمان شارۋاشىلىعىنىڭ, تجد كۇشتەرى مەن قۇرالدارى جانە ەرىكتى ورتكە قارسى قۇرالىمدار دەرەۋ جىبەرىلدى. الدىن الا 40 گەكتار القاپتا جانۋ بايقالدى. ءورتتى ءسوندىرۋ بارىسىندا وڭىرلىك تجد ەكى قىزمەتكەرى جانە ەرىكتى ورتكە قارسى قۇرىلىمنىڭ ءبىر قىزمەتكەرى كۇيىك الدى. ولار اۋداندىق اۋرۋحاناعا جەتكىزىلىپ, دارىگەرلەر العاشقى مەديتسينالىق كومەك كورسەتتى. كەيىن «قازاۆياقۇتقارۋ» اق تىكۇشاعىندا ورتتەن زارداپ شەككەن تاعى ءبىر تۇرعىندى قاراعاندى قالاسىنىڭ اۋرۋحاناسىنا جەتكىزدى. الدىن الا مالىمەتتەر بويىنشا, ول جەڭىل كۇيىك العان», دەپ حابارلادى قر توتەنشە جاعدايلار مينيسترلىگىنىڭ ءباسپاسوز قىزمەتى.
كۇندىز دالا ءورتى پاۆلودار وبلىسىنىڭ شەكاراسىنان «باياناۋىل مەملەكەتتىك ۇلتتىق تابيعي پاركىنىڭ» ورمانسىز اۋماعىنا كوشكەن. ءورت ورنىنا «قازاۆياقۇتقارۋ» تىكۇشاقتارى باردى. تىكۇشاق سۋدى شالقاركول كولىنەن قارماپ الىپ, ساعات 17:00-دەگى جاعداي بويىنشا ءورت وشاقتارىنا 6 رەت جالپى كولەمى 18 توننا سۋ توگىلگەن.
سونداي-اق اەروۆيزۋالدى بارلاۋ بارىسىندا جەلتاۋ اۋىلىنىڭ تۇرعىندارىن الدىن الا ەۆاكۋاتسيالاۋ تۋرالى شەشىم قابىلدانعان. قاۋىپسىز جەرگە 18 ادام (8-ءى بالا) ەۆاكۋاتسيالاندى.
«تج ۆيتسە-ءمينيسترى ەرلان نۇرپەيىسوۆ ءورت ورنىندا ءجۇر. قاراعاندى وبلىسىنىڭ اكىمى دە وقيعا ورنىنا باردى. قۇتقارۋشىلار توبى قوسىمشا كۇشتەر مەن قۇرالدارمەن تولىقتىرىلدى. ءورت ورنىندا قاراعاندى جانە پاۆلودار وبلىستارىنان تجد, جاو, ەترم كۇشتەرى جۇمىلدىرىلدى: جەكە قۇرامنان 183 ادام, 56 بىرلىك تەحنيكا جانە 4 تىكۇشاق. ءورتتىڭ الدىن الا اۋدانى 3000 گەكتاردان استى», دەپ مالىمدەدى مينيسترلىكتەن.
قاتتى ءارى ەكپىندى جەل, تاۋلى جەرلەر جانە ءورت وشاقتارىنا كىرمە جولداردىڭ بولماۋى ءورتتى ءسوندىرۋ جۇمىستارىن قيىنداتىپ وتىر.
«جەرگىلىكتى ورتكە قارسى قىزمەت پەن باياناۋىل ۇلتتىق پاركىنىڭ قىزمەتكەرلەرى جانە اۋىل ادامدارى ءتىلسىز جاۋمەن كۇرەسىپ جاتىر. جەلتاۋ اۋىلى مەن باينەكە قىستاعىنان جالپى سانى 14 ادام (9 بالا, 5 ايەل ادام) جۇمات شانين اۋىلىنا كوشىرىلىپ, تۋىستارىنىڭ ۇيىنە ورنالاستىرىلدى. قازىرگى ۋاقىتتا پاۆلودار قالاسىنان قوسىمشا 3 ءورت ءسوندىرۋ ماشيناسى كەلدى», دەپ مالىمدەدى اكىمدىكتەن.
اۋدان اكىمىنىڭ ورىنباسارى قينايات تاليپوۆ قازىر ءورت ءسوندىرۋ جۇمىستارىنا قاجەتتى جانار-جاعارماي ءبولىنىپ, جان-جاقتان تەحنيكالار كەلىپ جاتقانىن جەتكىزدى. ال قاراتومار اۋىلدىق وكرۋگىنىڭ ءورت سوندىرۋشىلەرى دالا ءورتىن ءوز اۋماقتارىنا كىرگىزبەي, ۋاقتىلى ءسوندىرىپ العان.
اتاپ ءوتۋ كەرەك, ءورت بولىپ جاتقان جەرلەردىڭ ءبىراز بولىگى باياناۋىل ۇلتتىق پاركىنىڭ اۋماعىنا قارايدى. بىراق ۇلتتىق پارك باسشىلىعى ناقتى اقاپارات ۇسىنباي وتىر.
پاۆلودار وبلىسى
باياناۋىل اۋدانى
كۇركەلى اۋىلدىق وكرۋگى
