فوتو: ەرلان ومار
قازاقستاندا اەس سالۋ جونىندەگى رەسپۋبليكالىق رەفەرەندۋمدا ەرتىس-بايان وڭىرىنەن 505 673 ادام داۋىس بەرۋ قۇقىعىنا يە. بۇل تۋرالى پاۆلودار وبلىستىق اۋماقتىق رەفەرەندۋم كوميسسياسىنىڭ توراعاسى گۇلنار امانجولوۆا حابارلادى.
«وبلىس بويىنشا رەفەرەندۋم ۋچاسكەلەرىندە داۋىس بەرۋگە جالپى سانى 505 673 ادام تىركەلگەن. پاۆلودار وبلىسىنىڭ اۋماعىندا 520 رەفەرەندۋم ۋچاسكەسى بار. ونىڭ بىرەۋى - وبلىستىق, 13-ءى - اۋماقتىق, وزگەسى - ۋچاسكەلىك كوميسسيالار. بۇل كوميسسيالار قۇرامىندا 3430 ادام قىزمەت ەتەدى. 30 ۋچاسكەدە كوزى ناشار كورەتىن 46 ادامنىڭ برايل ءشريفتىن قولدانۋىنا جاعداي جاسالعان», دەپ اتاپ ءوتتى گ.امانجولوۆا.
بۇعان قوسا, 21 ۋچاسكە ازاماتتاردىڭ ۋاقىتشا بولاتىن ورىندارىندا داۋىس بەرۋى ءۇشىن ۇيىمداستىرىلادى. كەي ازاماتتار دەنساۋلىعىنا بايلانىستى ۇيدەن داۋىس بەرۋدى قالاسا, ساعات 12.00-گە دەيىن ءتيىستى رەفەرەندۋم ۋچاسكەسىنە حابارلاسىپ, ءوتىنىش قالدىرا الادى. مۇنداي جاعدايدا كوميسسيا وكىلدەرى تۇرعىننىڭ ۇيىنە بيۋللەتەندى الىپ بارادى.
پاۆلودار وبلىسى
