سۋرەت: gov.kz
وتىرىس جۇمىسىنا ازەربايجان, ارمەنيا, بەلارۋس, قازاقستان, قىرعىزستان, رەسەي, تاجىكستان, وزبەكستان, تمد اتقارۋشى كوميتەتى مەن تەرروريزمگە قارسى ورتالىعىنىڭ دەلەگاتسيالارى قاتىستى.
قوبك وتىرىسى بارىسىندا سوڭعى وتىرىستان باستاپ وتكەن كەزەڭدەگى ءوزارا ءىس-قيمىل جاساۋ ناتيجەلەرى قارالدى. ارناۋلى قىزمەتتەردىڭ حالىقارالىق تەرروريزم, زاڭسىز كوشى-قون, ترانسۇلتتىق قىلمىس, كيبەرقىلمىس جانە ەسىرتكى بيزنەسى سالاسىنداعى قاتەرلەرگە قارسى ءىس-قيمىل جونىندەگى ىنتىماقتاستىعىنىڭ وزەكتى ماسەلەلەرى تالقىلاندى.
قوبك وتىرىسىندا ۇلتتىق قاۋىپسىزدىك كوميتەتىنىڭ توراعاسى, ۇلتتىق قاۋىپسىزدىك گەنەرال-لەيتەنانتى ەرمەك ساعىمباەۆ ءسوز سويلەپ, مەملەكەتكە سىرتتان تونەتىن قاۋىپ-قاتەرلەرگە توقتالدى.
– ءبىزدىڭ مامىر ايىندا بولعان بىشكەكتەگى سوڭعى كەزدەسۋىمىزدەن بەرى سالىستىرمالى تۇردە كوپ ۋاقىت وتە قويعان جوق. دەسە دە وسى كەزەڭ ىشىندە تمد-دا, جالپى الەمدە بولعان وقيعالار ءبىزدىڭ ەلدەگى وپەراتيۆتى جاعدايعا ايتارلىقتاي اسەرىن تيگىزىپ وتىر. حالىقارالىق تەرروريزمگە قارسى بەلسەندى ارەكەت ەتۋمەن بايلانىستى مىندەتتەر ءالى دە ءبىرىنشى ورىندا. ترانسشەكارالىق قىلمىستاردىڭ, زاڭسىز كوشى-قون مەن قارۋ-جاراق كونترابانداسىنىڭ قاتەرى ارتىپ تۇر. ەسىرتكى ترافيگىنە, اسىرەسە «سينتەتيكا» دەلىنىپ جۇرگەن ەسىرتكى ءتۇرىنىڭ تارالۋى ءبىزدىڭ مۇقيات نازار اۋدارۋىمىزدى قاجەت ەتەدى, – دەدى ۇقك باسشىسى ە.ساعىمباەۆ.
سونداي-اق ول ۇيىم ەلدەرى سينتەتيكالىق ەسىرتكى ساۋداسىنا كوبىرەك ءمان بەرۋ كەرەكتىگىن اتاپ ءوتتى. ونىڭ ايتۋىنشا, سان الۋان سىن-قاتەرلەردىڭ ارتۋى قاۋىپسىزدىك ورگاندارى باسشىلارى كەڭەسىنەن ىنتىماقتاستىقتى نىعايتۋدى تالاپ ەتەدى.
ال وسى وتىرىستا نەگىزگى بايانداما جاساعان تمد-عا قاتىسۋشى مەملەكەتتەردىڭ قاۋىپسىزدىك ورگاندارى مەن ارناۋلى قىزمەتتەرى باسشىلارى كەڭەسىنىڭ توراعاسى الەكساندر بورتنيكوۆ تا ءسوز سويلەپ, تەرروريزمگە قارسى ءىس-قيمىلدىڭ باسىمدىعىنا توقتالدى.
– كەيىنگى كەزدەسۋدە ءبىز «تاليباننىڭ» ناقتى بيلىككە يە ەكەنىن, اۋماقتى باقىلاپ وتىرعانىن اتاپ وتتىك. ولاردىڭ ارەكەتتەرى ءتارتىپ ورناتۋعا جانە تۇراقتىلىقتى ساقتاۋعا باعىتتالعان. بارلاۋ ورگاندارى اراسىندا پراگماتيكالىق ىنتىماقتاستىق ورناتۋ ەكى جاققا دا ءتيىمدى بولادى دەپ ويلايمىز. بۇل, اسىرەسە حالىقارالىق لاڭكەستىك ۇيىمدارمەن, ەسىرتكى جانە قارۋ-جاراق كونترابانداسىمەن كۇرەس اياسىندا وزەكتى بولىپ وتىر, – دەدى ا.بورتنيكوۆ.
سونىمەن قاتار ول «تاليبان» اۋعانستانداعى دايش-ءتىڭ ەڭ قاۋىپتى تارماقتارىنىڭ ءبىرى سانالاتىن «ۆيلايات حوراسان» توبىنا قارسى تۇرۋعا دايىن ەكەنىن اتاپ ءوتتى.
وتىرىس قورىتىندىلارى بويىنشا ارناۋلى ۆەدومستۆولاردىڭ باسشىلارى ىنتىماقتاستىقتىڭ نىساندارى مەن باعىتتارىن كەڭەيتۋ, سونداي-اق تمد مەملەكەتتەرىنىڭ قاۋىپسىزدىگىن قامتاماسىز ەتۋ جونىندەگى جۇمىستاعى ءوزارا ءىس-قيمىلدى نىعايتۋ قاجەتتىلىگى تۋرالى ورتاق پىكىرگە كەلدى.
جالپى, تمد-عا قاتىسۋشى مەملەكەتتەردىڭ قاۋىپسىزدىك ورگاندارى مەن ارناۋلى قىزمەتتەرى باسشىلارىنىڭ كەڭەسى حالىقارالىق سيپاتتاعى ۇيىمداسقان قىلمىسقا قارسى كۇرەس سالاسىنداعى جانە قىزمەتتىڭ باسقا دا كەلىسىلگەن سالالارىنداعى ارناۋلى قىزمەتتەردىڭ ءوزارا ءىس-قيمىل جاساۋى ءارى ولاردىڭ ءىس-ارەكەتىن ۇيلەستىرۋ ءۇشىن 1997 جىلعى 28 ناۋرىزدا تمد مەملەكەتتەرى باسشىلارى كەڭەسىنىڭ شەشىمىمەن قۇرىلعان.
