فوتو: اقوردا
پرەزيدەنت قازاقستاندا جاڭا بيۋدجەت جانە سالىق كودەكستەرى ازىرلەنىپ جاتقانىن ەسكە سالدى. وندا جەرگىلىكتى ءوزىن-ءوزى باسقارۋعا قاتىستى رەفورمانىڭ ەرەكشەلىكتەرى ەسكەرىلۋگە ءتيىس. ال ۇكىمەت اۋىل اكىمدەرىنىڭ بيۋدجەتىن قالىپتاستىرۋ جانە ونى جۇمساۋ تاسىلدەرىن قايتا قاراۋى كەرەك.
«جەرگىلىكتى ءوزىن-ءوزى باسقارۋ جۇيەسىنىڭ قارجىلىق دەربەستىگىن ارتتىرۋ ءۇشىن ناقتى ۇسىنىستار ازىرلەۋى قاجەت. كودەكس جوبالارىن تالقىلاۋعا ءماسليحاتتار بەلسەنە قاتىسقانى ءجون. جەرگىلىكتى بيۋدجەت قارجىسىنىڭ دۇرىس ءارى ءتيىمدى ءبولىنۋى وتە ماڭىزدى. دەپۋتاتتار بۇل ماسەلەگە زور جاۋاپكەرشىلىكپەن قاراۋعا ءتيىس. ءماسليحاتتار بيۋدجەت ساياساتىن, ءتۇرلى تولەمدەردىڭ شەكتى مولشەرىن, ەلدى مەكەندەردى اباتتاندىرۋ جايىن, باسقا دا ماسەلەلەردى ۇدايى باقىلاۋدا ۇستاۋى قاجەت», دەدى مەملەكەت باسشىسى.
قاسىم-جومارت توقاەۆ قازىر رەسپۋبليكالىق بيۋدجەتتىڭ كىرىس بولىگى تولىق ورىندالماي جاتقانىنا نازار اۋداردى.
«مەن جولداۋدا ۇكىمەت پەن ۇلتتىق بانككە وسىعان قاتىستى ناقتى شارالار قابىلداۋدى تاپسىردىم. سەبەبى, بۇل – جالپىۇلتتىق مىندەت. وعان بارلىق دەڭگەيدەگى بيلىك تارماقتارى كۇش جۇمىلدىرۋعا ءتيىس. ءبىز «قۋاتتى ايماقتار – قۋاتتى ەل» قاعيداتىنا ساي جۇمىس ىستەۋىمىز كەرەك. سىزدەر مۇنىڭ ماڭىزى زور ەكەنىن جاقسى بىلەسىزدەر. سوندىقتان ءار دەپۋتات ءوز اۋدانىن وركەندەتۋگە اتسالىسادى دەپ سەنەمىن», دەپ تۇيىندەدى پرەزيدەنت.
