فوتو: atr.kz
«بىلتىر مەنىڭ توراعالىعىممەن وتكەن ەلىمىزدىڭ الەۋمەتتىك-ەكونوميكالىق دامۋىنا ارنالعان كەڭەيتىلگەن كەڭەسكە كوپتەگەن دەپۋتات قاتىستى. مۇنداي جيىن الداعى ۋاقىتتا دا ءوتىپ تۇرادى. سەبەبى رەفورمالاردى وڭىرلەردە ىسكە اسىرۋدا ءماسليحاتتاردىڭ ورنى ايرىقشا. ءماسليحاتتاردىڭ مەملەكەتتىك جانە قوعامدىق مىندەتتەردى جۇزەگە اسىرۋعا ەتەنە ارالاسۋى, وزدەرى ءتۇرلى باستاما كوتەرۋى ماڭىزدى. وسى ورايدا Amanat پارتياسىنىڭ قوعامداعى وزەكتى ماسەلەلەردى شەشۋگە باعىتتالعان جوبالارىن ەرەكشە اتاپ وتكىم كەلەدى», دەدى پرەزيدەنت.
وسىلاي دەگەن مەملەكەت باسشىسى وزەكتى ماسەلەلەردى اتاپ ءوتتى.
«سوندىقتان جاستارعا, ايەلدەرگە, كاسىپكەرلەرگە, زەينەتكەرلەرگە, ەرەكشە قاجەتتىلىكتەرى بار ادامدارعا قولداۋ كورسەتۋ, حالىقتىڭ قارىز جۇكتەمەسىن ازايتۋ, اۋىل تۇرعىندارىنىڭ كىرىسىن ارتتىرۋ, پايدالانىلماي جاتقان جانە زاڭسىز بەرىلگەن جەرلەردى قايتارۋ, ەكولوگيالىق, قارجىلىق ساۋاتتىلىقتى جەتىلدىرۋ, سونداي-اق قوعامداعى وقۋ مادەنيەتىن قالىپتاستىرۋ سياقتى جوبالار – ايرىقشا نازار اۋدارۋدى قاجەت ەتەتىن وزەكتى ماسەلەلەر. مەن ۇكىمەتكە «قارىزسىز قوعام» جانە «اۋىل اماناتى» سەكىلدى پارتيالىق جوبالاردىڭ اۋقىمىن كەڭەيتۋگە كومەكتەسۋدى تاپسىردىم», دەدى پرەزيدەنت.
قاسىم-جومارت توقاەۆ قوعامدا ەڭبەك قۇندىلىعى مەن كاسىبي بىلىكتىلىكتىڭ ورنىعۋى تۋرالى دا ءسوز قوزعادى.
«مەملەكەت ادال ەڭبەگىمەن تۇرمىسىن جاقسارتۋعا دايىن جاندارعا ارقاشان قولداۋ كورسەتەدى. بۇل «ادال ەڭبەك – ادال تابىس» قاعيداسىنا تولىق سايكەس كەلەدى جانە ادىلەتتى قازاقستان قۇرۋدىڭ نەگىزگى فاكتورلارىنىڭ ءبىرى. سوندىقتان كەلەسى جىلدى جۇمىسشى ماماندىقتار جىلى دەپ جاريالادىم. وسى ارقىلى قوعامدا ەڭبەك قۇندىلىعى مەن كاسىبي بىلىكتىلىكتىڭ ورنىعۋىنا ىقپال ەتەمىز دەپ سەنەمىن» دەدى مەملەكەت باسشىسى.
