سۋرەتتى تۇسىرگەن – اۆتور
جىل سايىن قىركۇيەكتىڭ شۋاقتى كۇنى ايماقتىڭ اقىن-جازۋشىلارى مارە-سارە بولىسىپ, ورالحان بوكەي اتىنداعى كىتاپحانادا باس قوسادى. بايقاۋدا توپ جارعان قالامگەرلەرگە قۇرمەت كورسەتەدى. سالتاناتتى جيىننان سوڭ, جۇلدەگەرلەر ادەتتەگىدەي جازۋشىنىڭ تۋعان جەرى شىڭعىستايعا ساپارلايدى. بۇل جولى دا «قايداسىڭ, شىڭعىستاي؟» دەپ جولعا شىققان.
ماراپاتتاۋ ءراسىمى باستالماس بۇرىن جينالعان قاۋىم جازۋشى تۋرالى دەرەكتى ءفيلمدى تاماشالادى. ەكراننان 37 جىل بۇرىن دراماتۋرگيا تۋرالى ايتقان ءسوزىن تىڭدادى. جازۋشى الىبەك قاڭتارباەۆ ءسوز سويلەپ, دراماتۋرگياعا قالام سىلتەپ جۇرگەن جاستارعا ريزاشىلىعىن ءبىلدىردى. ورالحان تۋرالى ەستەلىك ايتا كەلە, كەلەسى جىلى قاليحان ىسقاقتىڭ 90 جىلدىعىنا دايىندالۋىمىز كەرەك دەپ, باسشىلاردىڭ ەسىنە سالعانداي بولدى. باسشى دەمەكشى, ورالحان بوكەي اتىنداعى بايقاۋعا جىل سايىن قولداۋ كورسەتىپ, جوعارى دەڭگەيدە ۇيىمداستىرۋعا تىكەلەي ۇلەس قوسىپ وتىرعان وسكەمەن قالاسىنىڭ اكىمى جاقسىلىق ومار ماراپاتتاۋ راسىمىنە ارنايى كەلدى.
«ورالحان بوكەي – الەمدىك ادەبيەتتە ويىپ تۇرىپ ورىن العان قالامگەر. جازۋشىنىڭ اتىندا ۇيىمداستىرىلىپ جاتقان بايقاۋعا قاتىسقان قالامگەرلەردىڭ بارلىعىنا شىن ريزاشىلىعىمدى بىلدىرەمىن. ال جۇلدە العان جازۋشى-دراماتۋرگتەردى قۇتتىقتايمىن!» دەدى قالا باسشىسى جاقسىلىق مۇقاش ۇلى.
ەستەلىك, لەبىزدەردەن سوڭ, ماراپاتتاۋ ءراسىمى باستالدى. وسكەمەندىك جۋرناليست ءادىل اۋەزحان «قىلبۇراۋ» اتتى ەكى ءبولىمدى دراما-ديالوگى, ايدانا يماشپاەۆا ء«ومىرىمنىڭ نۇرى» دراماسى, اباي اتىنداعى قازاق ۇلتتىق پەداگوگيكالىق ۋنيۆەرسيتەتى قازاق فيلولوگياسى فاكۋلتەتىنىڭ ستۋدەنتى ايسۇلۋ ادىلبەك «ارمانسىزدىڭ اھ ۇرۋى» دراماسى ءۇشىن وسكەمەن قالاسى اكىمىنىڭ العىس حاتى جانە ىنتالاندىرۋ سىيلىعى – 200 000 تەڭگەنىڭ سەرتيفيكاتىمەن ماراپاتتالدى.
ءىىى ورىندى ولجالاعان الماتىلىق الىبەك بايبولدىڭ «بالا. وتباسى. ۇشەۋ» دراماسى وسكەمەن قالاسى اكىمىنىڭ ديپلومى جانە 700 000 تەڭگە سەرتيفيكاتقا يە بولدى. ءىى ورىن «جالعىزدىق سەرتى» اتتى دراما جازعان ايزات راقىشقا بۇيىردى. سونىمەن قاتار 500 000 تەڭگەنىڭ سەرتيفيكاتى بەرىلدى. ال ءى ورىندى پاۆلودار قالاسىنان كەلگەن جانتاس ەركىن ۇلى ەنشىلەدى. ونىڭ جۇلدە قورى 800 000 تەڭگە. باس جۇلدە – 1 ميلليون تەڭگە اقتوبەلىك قالامگەر باقىت جاليەۆاعا بۇيىردى. «مارياننا» دەپ دراما جازعان قالامگەرگە ورالحان بوكەيدىڭ بەينەسى بەدەرلەنگەن ەسكەرتكىش تابىس ەتىلدى.
«باس جۇلدە بۇيىرادى دەپ ويلاماعان ەدىم. قازىلاردىڭ كوڭىلىنەن شىعىپ, جوعارى باعا بەرگەندەرىنە العىسىم شەكسىز. شىنىمدى ايتسام, ورالحان بوكەي اتىنداعى بايقاۋعا شىڭعىستايعا بارۋ ءۇشىن قاتىستىم», دەيدى اقتوبەلىك جازۋشى باقىت جاليەۆا.
ءيا, شىڭعىستايدى اڭساپ كەلەتىندەر كوپ. ونداعىسى, ورالحاننىڭ ۇيىنە بارىپ, جازۋشى جۇرگەن جەردى باسساق دەيدى. ايتىپ وتكەنىمىزدەي, بۇل جولى دا ءبىر توپ قالامگەر جازۋشىنىڭ تۋعان كۇنى قارساڭىندا اۋىلىنا, التايعا اتتاندى. شىڭعىستايعا جەتەبەرىستەگى ورالحاننىڭ تالاي شىعارماسىنا ارقاۋ بولعان كۇركىرەمە وزەنىنە توقتاپ, بەتى-قولدارىن شايادى. باس شايقاپ وتىرىپ, «ۇيقىم كەلمەيدى», «سايتان كوپىر», «قاسقىر ۇلىعان تۇندە» سىندى شىعارمالارىن تالدايدى. شىڭعىستايعا كىرگەندە ورالحان الەمىنە ەنگەندەي كۇي كەشەدى. مۋزەيىن ارالاپ, قالامگەردىڭ شىعارماشىلىعىمەن ەتەنە تانىسا تۇسەدى. ءسويتىپ, شىڭعىستايدان شابىتپەن قايتادى. دەمەك ءۇيدى-ۇيىنە جەتە سالا قولىنا قايتا قالام الارى انىق.
شىعىس قازاقستان وبلىسى
