وش ءتۇيىنى شەشىلەر ەمەس

ەلباسى – قازاقستان رەسپۋبليكاسىنىڭ پرەزيدەنتى ن.ءا.نا­زار­باەۆتىڭ تاپسىرۋى بويىنشا مەملەكەتتىك حاتشى – سىرتقى ىستەر ءمينيسترى ق.ساۋداباەۆ قىرعىز رەسپۋبليكاسى ۋاقىتشا ۇكىمەتىنىڭ باسشىسى ر.وتۋنباەۆامەن تۋىسقان قىرعىزستان حالقىنا قاجەتتى كومەكتىڭ كولەمى مەن ءتۇر-تۇرلەرى بويىنشا تەلەفون ارقىلى كەلىسسوز جۇرگىزدى, دەپ حابارلادى قر ءسىم-ءىنىڭ ءباسپاسوز قىزمەتى. تاراپتار كورسەتىلەتىن كومەك­تىڭ قاۋىپسىزدىگىن, ساقتالۋىن جانە ونىڭ تىكەلەي مۇقتاج بولىپ وتىر­عان قىرعىزستان ازامات­تا­رىنا جەتكىزى­لۋىن تولىق قامتا­ماسىز ەتۋگە باسا نازار اۋداردى. قىرعىز رەسپۋبليكاسى ۋاقىتشا ۇكىمەتىنىڭ جەتەكشىسى وسىناۋ قيىن كەزەڭدە تۇراقتى دا دايەكتى قولداۋى ءۇشىن قازاقستان پرەزيدەنتىنە ريزا­شىلىعىن ءبىلدىرىپ, بۇگىن قاجەت بو­لىپ وتىرعان كومەك جانە ونى مۇقتاجدارعا جەتكىزۋدىڭ ءتۇرى ءجو­نىندەگى ءوز ۇسىنىس­تارىن جولداي­تى­نىن مالىمدەدى. سونىمەن قاتار, ر.وتۋنباەۆا ەقىۇ-نىڭ ءىس باسىنداعى ءتور­اعا­سىن تۇتاستاي قىرعىزستانداعى جانە اتاپ ايتقاندا, وش قالاسىنداعى احۋال تۋرالى حاباردار ەتىپ, ءوزىنىڭ جۋىردا عانا سول جاقتان كەلگەنىن ايتتى. ول بەلگىلى دارەجەدە شيە­لە­نىستىڭ بار ەكەنىن, تۇتاستاي العاندا, ۇلكەن قاۋىپ-قاتەر مەن پروبلەما ساقتالىپ وتىرعانىن جەتكىزدى. وسىعان بايلانىستى تاراپتار 27 ماۋسىمعا بەلگىلەنگەن رەفەرەندۋم­دى وتكىزۋ ءۇشىن بارىنشا قولايلى جاعدايلار تۋعىزۋ قاجەتتىگىن اتاپ كورسەتتى. ق.ساۋداباەۆ داعدارىستىڭ ال­عاش­قى كۇنىنەن باستاپ كورشى رەس­پۋبليكاعا جان-جاقتى كومەك كور­سە­تىپ كەلە جاتقان قازاقستان پرە­زي­دەنتىنىڭ ەقىۇ-عا توراعالىق ەتۋشى مەملەكەتتىڭ باسشىسى رەتىندە بۇدان بىلاي دا ەكى جاقتى نەگىزدە تۋىسقان قىرعىزستان حالقىنىڭ وسىناۋ اۋىر داعدارىستان شىعۋى ءۇشىن قاجەتتى كومەك كورسەتە بەرۋ نيەتىندە ەكەنىن قاداپ ايتتى.