كوشباسشىلىق وقۋ كۋرسىنىڭ اشىلۋ سالتاناتىندا NU پرەزيدەنتى, پروفەسسور ۆاكار احماد اتالعان ۋنيۆەرسيتەتتىڭ ەلىمىزدەگى جوعارى ءبىلىمدى قولداۋ مەن دامىتۋ بويىنشا ءوز مىندەتىن بەلسەندى اتقارىپ وتىرعانىن جەتكىزدى.
«جوعارى ءبىلىم بەرۋ مەكتەبى (GSE) وسى مىندەتتى ويداعىداي ورىنداپ, 28 000-نان استام قاتىسۋشىعا بىرقاتار ءتيىمدى باعدارلاما ۇسىنادى. سونىڭ ىشىندە كوشباسشىلىق پەن كاسىبي دامۋ باعدارلاماسىن ەرەكشە ايتۋعا بولادى. بۇل جاڭا باستاما جوعارى وقۋ ورىندارىن ودان ءارى دامىتىپ, وعان قاجەتتى قۇرالدار مەن ءبىلىم بەرەدى», دەدى ول.
ءبىر جاعىنان, «دەكاندار مەكتەبى» باعدارلاماسىنا وڭىردەگى جوعارى وقۋ ورىندارى قىزىعۋشىلىق تانىتقان. ايتالىق, وعان قاتىسۋعا ەلىمىزدەگى پەداگوگيكالىق, تەحنيكالىق, مەديتسينالىق جانە جەكەمەنشىك ۋنيۆەرسيتەتتەرىمەن بىرگە قىرعىزستان جوعارى وقۋ ورىندارىن قوسقاندا 170-تەن استام ءوتىنىم تۇسكەن. بۇل باعدارلامانىڭ ايماقتىق دەڭگەيدەگى ماڭىزىن كورسەتەدى.
«باعدارلاما جان-جاقتى قاجەتتىلىكتەردى تالداۋ نەگىزىندە ازىرلەندى. سونىڭ اياسىندا وتاندىق جوعارى وقۋ ورىندارىنداعى دەكانداردىڭ لاۋازىمدىق سيپاتتاماسى مۇقيات باعالاندى. سونداي-اق «Kozybayev University», «Narxoz», «Kimep» جانە قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى سەكىلدى وقۋ ورىندارىنىڭ اكادەميالىق كوشباسشىلارىمەن فوكۋس-توپتىق تالقىلاۋ جۇرگىزىلدى. بۇل تالداۋلار باعدارلامانى قازىرگى دەكانداردىڭ الدىندا تۇرعان نەگىزگى ماسەلەلەردى شەشۋگە باعىتتاۋعا مۇمكىندىك بەردى», دەدى NU ۆيتسە-پروۆوستى, جوعارى ءبىلىم مەكتەبىنىڭ دەكانى, PhD ايدا ساعىنتاەۆا.
ايتا كەتەيىك, باعدارلاماعا قاتىسۋ تەگىن. عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى گۇلجان جاراسوۆانىڭ ايتۋىنشا, اتالعان كۋرس جۇمىس پەن باسقارۋ ءتاسىلىن قايتا قاراۋعا كومەكتەسپەك.
«جوعارى وقۋ ورىندارىنداعى دەكاندار مەن كافەدرا مەڭگەرۋشىلەرى ستۋدەنتتەرمەن تىعىز بايلانىستا جۇمىس ىستەپ, ولاردىڭ عىلىمي دامۋىنا جاعداي جاسايدى. سوندىقتان جوعارى ءبىلىمنىڭ ساپاسىن ارتتىرۋعا دەكان مەن دەكاناتقا باسا نازار اۋدارۋ كەرەك دەپ ەسەپتەيمىز. وسىنداي وزگەرىستەردى ۇتىمدى ۇيىمداستىرا الساق, جوعارى ءبىلىم ساپاسىنا اسەر ەتە الامىز», دەيدى گ.جاراسوۆا.
باعدارلاماداعى كوشباسشىلىق جانە مەنەدجمەنت ءمودۋلى اياسىندا «دەكان كۇنى» سەمينارى جوسپارلانعان. وندا قاتىسۋشىلار اكادەميالىق دەڭگەيىنە بايلانىستى توپتارعا ءبولىنىپ, NU فاكۋلتەتىن, مەكتەپ نەمەسە كافەدرا باسقارۋدىڭ پراكتيكالىق تاجىريبەسىن ۇيرەنەدى.
م.وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ جالپى مەديتسينا فاكۋلتەتىنىڭ دەكانى تالعار ءابىلوۆ باعدارلاماعا كوڭىلى تولاتىنىن ايتادى.
ءبىر سوزبەن ايتقاندا, «دەكاندار مەكتەبى» باعدارلاماسى ەلىمىزدەگى جوعارى ءبىلىم بەرۋ سالاسىنا ايتارلىقتاي وزگەرىس اكەلمەك.
