فوتو اشىق دەرەككوز
ء ىىم كريمينالدىق پوليتسيا دەپارتامەنتىنىڭ قىزمەتكەرلەرى كورشىلەس مەملەكەتتەردە ىزدەۋدە جۇرگەن قىلمىسكەرلەردى ۇستادى. بۇل تۋرالى قر ءىىم كريمينالدىق پوليتسيا دەپارتامەنتىنىڭ باستىعى قانات نۇرماعامبەتوۆ ايتتى.
تۇركىستان وبلىسىندا رەسەي فەدەراتسياسىنىڭ سامارا قالاسىندا 2023 جىلدىڭ ءساۋىر ايىندا ءوزىنىڭ تانىسىن ولتىرگەنى ءۇشىن ىزدەۋدە جۇرگەن تاجىكستان رەسپۋبليكاسىنىڭ ازاماتى ۇستالدى.
الماتى وبلىسى قاسكەلەن قالاسىندا 2023 جىلدىڭ قاراشا ايىنان بەرى ىزدەۋدە بولعان وزبەكستان رەسپۋبليكاسىنىڭ ازاماتى ۇستالدى. ول 2021-2023 جىلدار ارالىعىندا تاشكەنت وبلىسىندا كوپپاتەرلى ۇيلەردى جوندەۋ بارىسىندا جالعان قۇجاتتاردى ۇسىنۋ ارقىلى الاياقتىق جولمەن 180 ملن 476 مىڭ سوم قاراجاتىن يەمدەنگەن.
الماتى قالاسىندا بىشكەكتە ءوزىنىڭ وگەي قىزىن زورلاعانى ءۇشىن 47 جاستاعى تۇركيا رەسپۋبليكاسىنىڭ ازاماتى ۇستالدى. قىرعىز رەسپۋبليكاسىنىڭ قۇقىق قورعاۋ ورگاندارىمەن ىزدەۋدە بولعان.
قىزىلوردا قالاسىندا 2022 جىلى رەسەي فەدەراتسياسىنىڭ سوچي قالاسىنىڭ تۇرعىنىنان الداۋ ارقىلى 1 ملن رەسەي ءرۋبلىن الىپ, ءوز قاجەتتىلىگىنە جۇمساپ جىبەرگەن 30 جاستاعى رەسەي فەدەراتسياسىنىڭ ازاماتى ۇستالدى. وسى جىلدىڭ ءساۋىر ايىنان باستاپ ىزدەۋدە بولعان.
قابىلدانعان شارالار ناتيجەسىندە ءىىم قىزمەتكەرلەرى ىزدەۋدە جۇرگەن 1495 قىلمىسكەردى ۇستاپ, 1000-نان استام حابار وشارسىز كەتكەن ازاماتتىڭ جۇرگەن جەرلەرىن انىقتادى. سونداي-اق ەلىمىزدىڭ اۋماعىندا شەت ەلدەردە ىزدەۋدە جۇرگەن 642 قىلمىسكەر قۇرىقتالدى.
