فوتو اشىق دەرەككوز
اقب ۇلىم اۋىلىنىڭ تۇرعىنى 20 جىلدان استام ۋاقىت بوكس جاتتىقتىرۋشىسى بولعان جانە بىرنەشە رەت رەسپۋبليكالىق, حالىقارالىق تۋرنيرلەردىڭ جەڭىمپازدارىن تاربيەلەپ شىعارعان. دەنە شىنىقتىرۋ جانە سپورت باسقارماسىنىڭ تاپسىرماسىنا سايكەس قىزمەتكەرلەردى تەكسەرۋ كەزىندە, ونىڭ 1987 جىلى دەنساۋلىققا قاساقانا اۋىر زيان كەلتىرگەنى ءۇشىن سوتتى بولعانى انىقتالعان (قازاق كسر قك-ءنىڭ 93-بابىنىڭ 2-بولىگى بويىنشا). وسىدان كەيىن ول 2024 جىلى ناۋرىزدا جۇمىستان بوساتىلعان.
جاتتىقتىرۋشى سپورت مەكتەبىنىڭ ۇستىنەن جۇمىستان بوساتۋ, جۇمىسقا قايتا الۋ جانە ءماجبۇرلى تۇردە جۇمىسقا كەلمەگەن ۋاقىتىنىڭ جالاقىسىن ءوندىرۋ تۋرالى بۇيرىقتىڭ كۇشىن جويۋدى سۇراپ سوتقا جۇگىنەدى.
«جامبىل اۋداندىق سوتى ءىستى قاراپ 1987 جىلعى قازاق كسر جوعارعى سوتىنىڭ شەشىمىندە جاتتىقتىرۋشىنىڭ جاساعان ارەكەتىن دەنساۋلىققا قاساقانا اۋىر زيان كەلتىرۋدەن قاجەتتى قورعانىس شەگى بولعان كەزدە كەلتىرىلگەن دەنە جاراقاتىنا قايتا سارالانعانىن,تالاپ قويۋشى ادام ولتىرگەنى نەمەسە دەنساۋلىققا قاساقانا زيان كەلتىرگەنى ءۇشىن سوتتالعاندار ساناتىنا جاتپايتىنىن جانە قىلمىستىق قۋدالاۋعا تارتىلماعانىن انىقتادى. قازاق كسر قك-ءنىڭ 96-بابىنىڭ 1-بولىگىندە ءىس-ارەكەتتىڭ قاساقانالىعى كوزدەلمەگەندىكتەن, جۇمىستان بوساتۋ نەگىزدەرى جارامسىز بولىپ تابىلادى», دەلىنگەن جامبىل وبلىستىق سوتىنىڭ حابارلاماسىندا.
سوت تالاپ قويۋدى تولىعىمەن قاناعاتتاندىرىپ, جۇمىستان بوساتۋ تۋرالى بۇيرىق زاڭسىز دەپ تانىلىپ, كۇشى جويىلدى.
تالاپ قويۋشى قىزمەتىنە قايتا ورنالاسىپ, ونىڭ پايداسىنا ءماجبۇرلى تۇردە جۇمىستا بولماعان ۋاقىتى ءۇشىن 781 مىڭ تەڭگە جالاقىسى ءوندىرىلدى.
شەشىم زاڭدى كۇشىنە ەندى.
