اقتوبەدەن كوشىپ كەلگەن ايگۇل مەن قوجابەرگەن قوجامۇراتوۆتار بۇل وڭىردە نەندەي كاسىپتى قولعا الۋ كەرەك ەكەنىن ۇزاق زەردەلەيدى. قوجابەرگەن كەشەگى كەڭەس زامانىندا الماتىداعى «مەرەي» جيھاز فابريكاسىندا جۇمىس ىستەپ, باي تاجىريبە جيناعان. جاڭا قونىستا وسى بىلىگى كوپ-كورىم كادەگە استى.
تسەحتا جەتى ادام جۇمىس ىستەيدى. شەتەلدەن اكەلىنگەن ستانوكتار ورناتىلعان. ەتەك-جەڭى كەڭ پىشىلگەن سەلونىڭ ءاربىر تۇرعىنىنىڭ ۇيىندە جەرگىلىكتى تسەحتان شىققان جيھازدار تۇر. اجارلى ءارى ارزان جيھازدارى بىرەر جىلدىڭ ىشىندە اۋدان اسىپ, وبلىسقا تاراعان. ورناتىپ بەرۋ ءۇشىن تسەح شەبەرلەرى بىرگە بارادى. ولاردىڭ جولاقىسى, اس-سۋى تولەنەدى. ەڭبەكاقىلارى اتقارعان شارۋالارىنا وراي. ەڭ تومەنگى تابىس – 200 مىڭ تەڭگەنىڭ توڭىرەگىندە. اۋىل ادامدارى ءۇشىن از جالاقى ەمەس.
ء«بىز تاپسىرىس بويىنشا دا جيھازدىڭ كەز كەلگەن ءتۇرىن دايىندايمىز. الەۋمەتتىك جەلى ارقىلى دا جۇمىس ىستەيمىز. قازىر ساتىلىم جاعىنان الدىڭعى قاتاردامىز. جاساعان جيھازدارىمىز نارىق قۇنىنان 20-30 پايىزعا ارزان», دەيدى ايگۇل قوجامۇراتوۆا.
ايگۇلدىڭ ءوزى تسەحتىڭ ەسەپ-قيسابىنا يە, سونىمەن بىرگە, ارلەۋشى ديزاينەر. بۇل تاراپتاعى بار جاڭالىقتى, سۇرانىستى اقىل تارازىسىنا سالىپ, وزىق ۇلگىلەردى مۇقيات قاداعالاپ وتىرادى. سوندىقتان تۇتىنۋشىلار تاراپىنان وكپە-رەنىش تۋىنداعان ەمەس.
«جيھاز تسەحىنا جۇمىسقا ورنالاسقان كەزدە قوبالجىعانىم راس. قازىر كەز كەلگەن جۇمىستى ەركىن اتقارامىن. بريگاداداعى شەبەرلەردىڭ ءبارى وزدەرى جەتىلدىرىپ, شەبەرلىكتەرىن شىڭداپ كەلە جاتقان جىگىتتەر. جاستار جاعى قوعامعا پايدالى وسىنداي ءىستى مەڭگەرگەندەرى ءجون دەپ ەسەپتەيمىن», دەيدى تسەح شەبەرى ەلدار دۇزبەنبەتوۆ.
تاعى ءبىر ايتا كەتەر دۇنيە, جيھاز تسەحى العاشقى كۇننەن باستاپ ءۇزىلىسسىز جۇمىس ىستەيدى. كاسىپكەردىڭ ۇلى جانقوجا وتباسىلىق بيزنەستىڭ قىر-سىرىن مەڭگەرىپ, اتا-اناسى باستاعان ءىستى العا جىلجىتۋدا. تاياۋدا ءوندىرىستى كەڭەيتۋ ماقساتىندا «دامۋ» قورىنا ءوتىنىم تاپسىرىپتى. قولىنا قاراجات تيسە, جيھازدىڭ وزىندىك قۇنىن ارزانداتۋ باعىتىندا ۇمتىلىس جاساماق.
اقمولا وبلىسى,
جاقسى اۋدانى
