ەلىمىزدىڭ ساۋدا ساياساتىنا قاتىستى دسۇ-نىڭ 30-دان استام مۇشەسىنىڭ ەلشىلەرى ءسوز سويلەدى. ولاردىڭ بارلىعى دا ەلىمىزدىڭ كوپجاقتى ساۋدا جۇيەسىن نىعايتۋعا قوسقان ەلەۋلى ۇلەسىنە توقتالىپ, ەكونوميكانى ءارتاراپتاندىرۋ جانە ساۋدا-ەكونوميكالىق رەفورمالاردى جۇرگىزۋ, ونىڭ ىشىندە ساۋدا راسىمدەرىن وڭايلاتۋ, اشىقتىقتى ارتتىرۋ, سونداي-اق جالپى العاندا الەمدىك ساۋدانىڭ تۇراقتىلىعى مەن بولجامدىلىعىن قولداۋ جونىندەگى جۇمىسىنا باعا بەردى.
اتالعان ەلدەردىڭ تۇراقتى وكىلدەرى ساۋدا راسىمدەرىن جەڭىلدەتۋگە باعىتتالعان قازاقستاننىڭ رەفورمالارىن جوعارى باعالاپ, دسۇ-نىڭ ساۋدا راسىمدەرىن وڭايلاتۋ تۋرالى كەلىسىمى بويىنشا ءوز مىندەتتەمەلەرىن 100% ورىنداعانىن ايتتى. نەگىزگى جەتىستىكتەردىڭ ىشىندە بۇۇ-نىڭ اۆتوماتتاندىرىلعان كەدەندىك دەرەكتەر جۇيەسى (ASYCUDA) بازاسىندا يۋنكتاد-پەن سەرىكتەستىكتە ازىرلەنگەن ەكسپورتتىق-يمپورتتىق وپەراتسيالار ءۇشىن «بىرىڭعاي تەرەزە» جۇيەسىن جانە «استانا-1» پلاتفورماسىن ەنگىزۋدى قوسا العاندا, كەدەندىك پروتسەستەردى تولىق تسيفرلاندىرۋ ەرەكشە كوزگە تۇسەدى. قازاقستان سونداي-اق «كەدەن» جاڭا اقپاراتتىق پلاتفورماسىن ازىرلەي وتىرىپ, جاڭعىرتۋدىڭ كەلەسى كەزەڭىنە وتۋدە.
سونىمەن قاتار جەنەۆاداعى وكىلدىكتەردىڭ باسشىلارى قازاقستاننىڭ اگروونەركاسىپتىك كەشەندى جاڭعىرتۋعا, اسىرەسە قازاقستان رەسپۋبليكاسىنىڭ 2022-2026 جىلدارعا ارنالعان ينۆەستيتسيالىق ساياسات تۇجىرىمداماسىن ىسكە اسىرۋ شەڭبەرىندە قولايلى ينۆەستيتسيالىق احۋال جاساۋعا باعىتتالعان ستراتەگيالىق رەفورمالارىن اتاپ ءوتتى.
دسۇ-نىڭ كوپتەگەن مۇشەلەرى ەكىجاقتى ساۋدانى نىعايتۋدىڭ جانە ەكونوميكانىڭ ءتۇرلى سەكتورلارىنداعى ءوزارا ءىس-قيمىلدى كەڭەيتۋدىڭ ماڭىزدىلىعىن اتاپ ءوتىپ, قازاقستانمەن ودان ءارى ستراتەگيالىق ىنتىماقتاستىققا دايىن ەكەندىكتەرىن ءبىلدىردى. بۇل مالىمدەمەلەر الەمدىك ارەنادا سەنىمدى ساۋدا سەرىكتەسى رەتىندە قازاقستانعا دەگەن سەنىمنىڭ جوعارى ەكەنىن كورسەتتى.
