شارا سپورتسۇيەر قاۋىمدى جانە سالاۋاتتى ءومىر سالتىن ۇستاناتىن 400 ادامنىڭ باسىن قوستى. ولاردىڭ باسىم كوپشىلىگى – مەملەكەتتىك قىزمەتشىلەر. ورتالىق مەملەكەتتىك ورگانداردىڭ باسشىلارى, قىزمەتشىلەرى جۇگىرۋ مادەنيەتىن قالىپتاستىرۋ يدەياسىن قولداپ, قايىرىمدىلىق شاراسىنا بەلسەندى تۇردە اتسالىستى.
قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل شارا ەلىمىزدە العاش رەت وتكىزىلگەنىن جانە الداعى ۋاقىتتا جالعاسىن تاباتىنىن ايتتى.
«بۇگىن ءبىز سالاۋاتتى ءومىر سالتىن جانە جۇگىرۋدى ناسيحاتتاپ قانا قويماي, تاريحي ءساتتىڭ كۋاسى بولىپ تۇرمىز. قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى, قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى جانە پرەزيدەنتتىك اكادەميا تۇلەكتەرىنىڭ اليانسى مۇنداي اۋقىمدى سپورتتىق جۇگىرۋ شاراسىن العاش رەت ۇيىمداستىردى. بۇل شارا الداعى ۋاقىتتا ەلوردامىزدا جىل سايىن ءداستۇرلى تۇردە وتەتىن سپورتتىق شاراعا اينالادى دەگەن ۇمىتتەمىن. سەرىكتەستەرىمىزگە, مەملەكەتتىك قىزمەتشىلەرگە جانە قالا تۇرعىندارىنا العىس بىلدىرەمىن», – دەدى ەرلان قۋانىش ۇلى.
اكادەميا ماگيسترانتى, مەملەكەتتىك قىزمەتشى ارسەن گۋباشەۆ شاراعا قاتىسۋعا ءبىراز ۋاقىت دايىندالعان.
«بۇگىنگى ELGE QYZMET RUN سپورتتىق جۇگىرۋ جارىسىنا اكادەميا ماگيسترانتتارى تۇگەل قولداپ قاتىستى. جۇگىرۋگە وتەتىنى تۋرالى بىلگەن كۇننەن باستاپ دايىندالدىم. بۇل شارا ءبىرىنشى كەزەكتە سالاۋاتتى ءومىر سالتىن ناسيحاتتاۋعا باعىتتالعان. باتىس قازاقستان وبلىسى, ورال شاھارىندا كوپ جىلدان بەرى جۇگىرۋمەن اينالىسىپ, سپورتتى ناسيحاتتاپ ءجۇرمىن», – دەدى ول.
قاتىسۋشىلار 10 كم, 5 كم جانە 2,5 كم اراقاشىقتىق بويىنشا جۇگىردى. ءابسوليۋتتى جەڭىمپازدارعا ءى, ءىى, ءىىى دارەجەلى ديپلوم مەن سىيلىقتار تابىستالدى. سونداي-اق جاس ەرەكشەلىكتەرىنە بايلانىستى ءارتۇرلى ساناتتا جاقسى ناتيجە كورسەتكەن قاتىسۋشىلار دا جۇلدەلى ورىندار يەلەنىپ, سىيلىقتارمەن ماراپاتتالدى. بارلىعى 90 قاتىسۋشى سىيلىقتارعا يە بولدى.
