پوليتسيا دەپارتامەنتى ءباسپاسوز قىزمەتىنىڭ مالىمەتىنشە, 27 قىركۇيەك كۇنى اقجار اۋدانىنىڭ ورتالىعى تالشىق اۋىلىنداعى مەكتەپتە وقۋشىلاردىڭ ەسىنەن تانىپ قۇلاپ جاتقانى تۋرالى اقپارات تۇسكەن.
حابارلاسقان ادام دالىزدە وتكىر ءيىستىڭ تۇرعانى تۋرالى ايتقان. وقيعا ورنىنا كەلگەن جەدەل-تەرگەۋ توبىنىڭ قىزمەتكەرلەرى مەن ۋچاسكەلىك پوليتسيا ينسپەكتورى مەكتەپتەن وقۋشىلاردى, ۇستازدار مەن جۇمىسشىلاردى ەۆاكۋاتسيالاپ, ءمان-جايدى انىقتادى.
وسى مەكتەپتىڭ ەكى مۇعالىمى بۇرىش باللونىن تەكسەرمەك بولعان. ولاردىڭ بىرەۋى مۇنىڭ سالدارى قانداي بولۋى مۇمكىن ەكەنىن ويلاماستان, باللوننىڭ ىشىندەگىسىن شاشىپ جىبەرگەن. سالدارىنان قاۋىپتى ءيىس مەكتەپ ىشىنە تاراپ كەتكەن.
سالدارىنان اۋداندىق اۋرۋحاناعا 11 مەن 9 جاستاعى ەكى وقۋشى, سونداي-اق 53 جاستاعى ايەل جۇگىندى. ولارعا مەديتسينالىق كومەك كورسەتىلگەن سوڭ ۇيلەرىنە جىبەرىلدى. بۇرىش باللونىن شاشقان مۇعالىمدەر اكىمشىلىك جاۋاپكەرشىلىككە تارتىلدى.
سولتۇستىك قازاقستان وبلىسى ءبىلىم باسقارماسى ءباسپاسوز قىزمەتى دە وسى وقيعاعا قاتىستى تۇسىنىك بەردى.
- مەكتەپتىڭ ءبىرىنشى قاباتىندا وتكىر ءيىس شىعىسىمەن بارلىق وقۋشىلار مەن قىزمەتكەرلەر دالاعا شىعارىلدى. مەديتسينالىق قىزمەتكەر بارلىعىن تەكسەرىپ شىقتى. وقيعا ورنىنا كەلگەن پوليتسيا قىزمەتكەرلەرى ءمان-جايدى انىقتادى. مەكتەپتىڭ دەنە شىنىقتىرۋ ءپانىنىڭ مۇعالىمى ارىپتەسىنە بۇرىش باللونىن كورسەتپەك بولعان. قازىرگى ۋاقىتتا تەرگەۋ ءجۇرىپ جاتىر. بالالار مەن ۇستازداردىڭ جاعدايى قالىپتى. سوتتىڭ شەشىمىمەن ۇستازدارعا شارا قولدانىلاتىن بولادى, – دەدى ءباسپاسوز حاتشىسى اسەل ورازباەۆا.
