قارۋسىزدانۋ سالاسىنداعى ىقپالداستىق

كەشە سىرتقى ىستەر مينيسترلىگىندە اتالعان ۆەدومستۆونىڭ رەسمي وكىلى اسقار ابدراحمانوۆتىڭ قاتىسۋىمەن ءداستۇرلى بريفينگ ءوتتى. رەسمي وكىل ءوز سوزىندە 23 جانە 24 ماۋسىمدا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءىس باسىنداعى توراعاسى, قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ تۇركىمەنستانعا رەسمي ساپارمەن باراتىنىن حابارلادى. بۇل ساپار بارىسىندا ق.ساۋدا­باەۆ­تىڭ تۇركى­مەن­ستان پرەزيدەنتى گۋربانگۋلى بەر­دىمۇحاممەدوۆپەن, مينيستر­لەر كابينەتى توراعا­سى­نىڭ ورىن­باسارى – سىرتقى ىستەر مي­نيسترى راشيد مەرەدوۆپەن, مەد­جليس­تىڭ ءتورايىمى اكدجا نۋر­بەردىەۆامەن كەزدەسۋلەرى كوز­دەل­گەن كورىنەدى. بۇل كەزدەسۋلەر بارىسىندا تاراپتار تۇركىمەنستان مەن ەۋروپا­داعى قاۋىپسىزدىك جانە ىن­تىماق­تاس­تىق ۇيىمى اراسىن­دا­عى ارەكەتتەستىك پەن قازاق-تۇركىمەن ەكىجاقتى قارىم-قاتىناستارىنىڭ وزەكتى ماسەلەلەرى جونىندە پىكىر الماسادى ەكەن. سونداي-اق, ق.ساۋ­داباەۆ ءوزى باسشى­لىق ەتەتىن حا­لىقارالىق ۇيىم­نىڭ اشعابادتاعى ورتالى­عى­نىڭ جۇمى­سىمەن تانى­سادى دەپ كۇتىلۋدە. تۇركىمەنستانعا ساپاردىڭ ەكىن­شى كۇنىندە, دەپ جالعادى ءسوزىن رەس­مي وكىل,  ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءىس باسىنداعى توراعاسى ورتالىق ازيا جانە كاسپي تەڭىزى ايماعىن­دا قارۋسىزدانۋ ماسەلەلەرى ءجو­نىن­دەگى حالىقارالىق كونفەرەنتسيا­نىڭ اشىلۋىندا ءسوز سويلەيدى. سونداي-اق, كاسپي ايماعىنداعى بار­لىق مەملەكەتتەردىڭ  سىرتقى ساياسي مەكەمەلەرى باسشىلارى قا­تى­ساتىن كونفەرەنتسيانىڭ “ورتا­لىق ازيا مەن كاسپي تەڭىزى ايماعىنداعى قارۋسىزدانۋ سالاسىنداعى احۋالعا شولۋ جانە تالداۋ جاساۋ” دەپ اتالاتىن ءبىرىنشى پلەنارلىق جينالىسىندا بايانداما جاسايدى. ءلايلا ەدىلقىزى.