ءيا, بۇل – تۇسىنىكسىز پارادوكس ەمەس. سەبەبى مەن مۇنداي احۋالعا اسەر ەتۋشى فاكتورلاردى قوعامنىڭ بەت-بەينەسىنە قاراپ بولجاۋعا بولادى. ايتالىق, كوشەدە كەتىپ بارا جاتقان كەز كەلگەن ازاماتتى توقتاتىپ سۇرايىق.
– قازىر قانداي كىتاپ وقىپ جاتىرسىز؟
– شىنىمدى ايتسام, كىتاپ وقيتىن ۋاقىت جوق.
– ال تەاترعا بارىپ تۇراسىز با؟
– جو-ووق. وندايعا ۋاقىت تابۋ قيىن.
شىن مانىندە, ۋاقىت جوق پا, ق ۇلىق جوق پا – بەيمالىم.
جاھاندانعان قوعامنىڭ تاسقىن سۋداي قاپتاعان اقپاراتتار اعىنى ادام نازارىن ءتۇرلى باعىتقا الىپ كەتىپ جاتقانى دا راس. ەڭ قىمبات دۇنيەمىز ۋاقىت بولسا, سول ۋاقىتتى مادەني جۇمىسقا, رۋحاني دەمالىسقا ارناي المايمىز. سمارتفوندى جۇيەسىز پايدالانۋ باسىم. ويتكەنى تالعام جوق. ال بيىك تالعام قالاي قالىپتاسادى؟ كوركەم ونەرگە قۇشتارلىق ىشكى تالعامدى ءوسىرىپ, مادەني يممۋنيتەتتى قالىپتاستىراتىنى ءسوزسىز. سونداي-اق كوركەمدىكتى تۇسىنە الاتىن, ءتاۋىر شىعارماعا تەبىرەنىپ, جاقسى كارتينانى باعالاي الاتىن جان كۇندەلىكتى تۇرمىستىڭ يلەۋىنە تۇسپەسە كەرەك-ءتى. ياعني سۋىق قالانىڭ سۋىق ادامدارى سياقتى ءبىر ءتيپتى بولمايدى. ونداي ادامنىڭ سەزىمدەرى وياۋ بولادى: ءسال نارسەگە قۋانۋ, جىلاۋ, تامسانۋ, ارقاشان كوڭىل كۇيىن, ەموتسياسىن بىلدىرە الۋ.
سودان بولار, ادامداردىڭ گازەت-جۋرنال, ياكي كىتاپ وقۋى دا بۇگىندە تاڭعالاتىن قۇبىلىسقا اينالعان. قاراپايىم حالىقتىڭ مۇنداي دەڭگەيسىز تاڭعالىسىنا قازىر تاڭعالمايتىن دا بولدىق. بالكي, بۇل تاڭعالىستىڭ ءبىر سەبەبى عالامتور (بىراق وعان يلانۋ قيىن), بالكي بىلىمسىزدىك, «جوعالعان وقىرمان», جازىلماعان كلاسسيكا, يدەولوگيا, تۇرمىس...
ءيا, «سانانى تۇرمىس بيلەيدى» دەگەن ناق وسى زامان با دەيسىز... ارينە, حالىقتىڭ كلاسسيكالىق ونەردەن جىراق كەتۋىنە الەۋمەتتىك-تۇرمىستىق سەبەبىنەن بولەك مەملەكەتتىك يدەولوگيا دا ۇلكەن ءرول وينايدى. قوعام ازىق-ت ۇلىككە قالاي مۇقتاج بولسا, جاڭا كىتاپ پەن پرەمەراعا بيلەتتى دە سولاي ىزدەۋى ءۇشىن نە ىستەۋگە بولادى؟ دۇكەندەگى نان سورەسىنىڭ قاسىندا كىتاپتى دا ساتۋ كەرەك شىعار...
مادەنيەت جانە اقپارات مينيسترلىگىنىڭ مالىمەتىنشە, بىلتىر ەلىمىزدەگى كوپشىلىك كىتاپحانالارداعى وقىرمان سانى – 5 123 227 بولسا, ولار 51 921 261 مارتە كىتاپ قورىن پايدالانعان. ال بيىلعى ەسەپ بويىنشا, جىل باسىنان بەرى وقىرمان سانى – 4 935 911, ولار 37 555 206 رەت كىتاپحانا يگىلىگىن كادەسىنە جاراتقان. سونداي-اق جالپى سانى 57 مەملەكەتتىك تەاترعا جىل باسىنان بەرى 1 501 418 كورەرمەن بارعان. بۇل سالىستىرمالى تۇردە از با, كوپ پە, باعامداي بەرىڭىز.
قوعامنىڭ كوركەم ادەبيەتكە قىزىعاتىن, ونەرگە قۇشتار ءبىر بولىگى تۇتاس ۇلتتىڭ مادەني دەڭگەيىن كورسەتە المايدى. حالىقتىڭ رۋحاني جاڭعىرۋى – ازداعان توپتىڭ ادەبي-مادەني ساۋاتىمەن ولشەنبەيدى. قازىرگى ادەبيەتتەن, گازەت-جۋرنال وقۋدان, جالپى جازۋ-سىزۋدان كوپشىلىكتىڭ حابارى جوقتىعىنان, جازىپ جۇرگەن ءبارىمىزدىڭ ءوز الەمىمىز, ال رۋحاني ومىردەن تىم الىس قاراپايىم جۇرتتىڭ ءوز الەمى قالىپتاسقان سىڭايلى. سانى از كىشكەنتاي ۇلت بولا تۇرا ەكى ارادا تاس قامال پايدا بولعانداي. زامان العا جىلجىعان سايىن قاراپايىم حالىق رۋحانياتتان الىستاپ بارا جاتۋىنىڭ سالدارى قانداي بولماق؟ اقىننىڭ ولەڭىن ادەبي ورتاداعى قاۋىمنان باسقا جۇرت وقىمايدى. ارينە, سالىستىرمالى تۇردە العاندا. جازۋشىنىڭ جان ازابىنان تۋعان شىعارماسىنىڭ دا ءحالى وسىنداي. ال تەاترلار كىم ءۇشىن جۇمىس ىستەيدى؟..
