سۋرەت: gov.kz
بۇرىن سوت شەشىمىمەن ارەكەتكە قابىلەتسىز دەپ تانىلعان ون سەگىز جاستان اسقان ازاماتتاردىڭ قامقورشىلارى قۇجاتتاردى قاعاز تۇرىندە جيناپ, ارنايى وتىنىمدەردى راسىمدەۋ ءۇشىن كەزەككە تۇراتىن ەدى. جاڭارتىلعان قىزمەت قاجەتتى قۇجاتتاردى ونلاين تاپسىرۋعا مۇمكىندىك بەرىپ, ۋاقىت شىعىنىن ەداۋىر قىسقارتادى.
ەندى قامقورشىلار ءبىرىنشى توپتاعى ءجۇرىپ-تۇرۋى قيىن مۇگەدەكتەرگە جەكە كومەكشى قىزمەتتەرىن پايدالانۋ, ولاردى ارنايى ءجۇرىپ-تۇرۋ قۇرالدارىمەن قامتاماسىز ەتۋ, ەستۋ قابىلەتى ناشار مۇگەدەكتەرگە ىمداۋ ءتىلى مامانىنىڭ قىزمەتتەرىن پايدالانۋ (جىلىنا الپىس ساعات), ءۇي جاعدايىندا ارنايى الەۋمەتتىك قىزمەتتەر الۋ, پروتەزدىك-ورتوپەديالىق كومەكپەن قامتاماسىز ەتۋ, مەديتسينالىق-الەۋمەتتىك مەكەمەلەردە (ۇيىمداردا) ارنايى الەۋمەتتىك قىزمەتتەر الۋ, مۇمكىندىگى شەكتەۋلى بالالاردى ساناتورلىق-كۋرورتتىق ەمدەۋمەن قامتاماسىز ەتۋ سىندى مەملەكەتتىك قىزمەت تۇرلەرىنە ونلاين ءوتىنىم بەرە الادى.
قىزمەتتى الۋ ءۇشىن پايدالانۋشىعا eGov.kz پورتالىندا تىركەلىپ, «الەۋمەتتىك قامسىزداندىرۋ» بولىمىنە ءوتۋ قاجەت. ودان كەيىن «مۇگەدەكتەردى قولداۋ» بولىمىندە ۇسىنىلعان تىزىمنەن قاجەتتى قىزمەتتى تاڭدايدى. سوسىن ەتسق (ەلەكتروندىق تسيفرلىق قولتاڭبا) ارقىلى قول قويۋ قاجەت. قىزمەت ناتيجەسىمەن پايدالانۋشى جەكە كابينەتتە («قىزمەتتەر الۋ تاريحى» بولىمىندە) تانىسا الادى.
ايتا كەتەيىك, بۇل قىزمەتتى ەڭبەك جانە حالىقتى الەۋمەتتىك قورعاۋ مينيسترلىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ ازىرلەدى.
