فوتو سەناتتىڭ ءباسپاسوز قىزمەتى
سەناتورلار اتوم ەلەكتر ستانتسياسىن سالۋ قاجەتتىگىنىڭ نەگىزگى سەبەپتەرىنە توقتالا كەلىپ, ەلەكتر ەنەرگياسىنا دەگەن سۇرانىستىڭ كوبەيىپ كەلە جاتقانىن اتاپ ءوتتى. اتوم ەنەرگەتيكاسى ءداستۇرلى قۋات كوزدەرمەن سالىستىرعاندا ەنەرگيا جۇيەسىن جاڭعىرتۋعا, حالىقارالىق ىنتىماقتاستىقتى تەرەڭدەتۋگە زور مۇمكىندىك بەرەدى.
نۇرلان بەكنازاروۆ اتوم ەلەكتر ستانتسياسىنىڭ قۇرىلىسى ۇزاق مەرزىمدى ەكونوميكالىق دامۋ تۇرعىسىنان قازاقستانعا ەڭ ۇتىمدى تاڭداۋ بولىپ تابىلاتىنىن ايتتى.
«ەلىمىزدە ەنەرگيا تاپشىلىعى جىل سايىن ارتىپ كەلەدى. ەگەر بۇل ماسەلەنى بۇگىن شەشپەسەك, بولاشاقتا ودان دا كۇردەلى جاعدايعا تاپ بولۋىمىز مۇمكىن. اتوم ەنەرگەتيكاسى ۇزاق مەرزىمدى كەلەشەكتە ەلەكتر ەنەرگياسى ءتاريفىنىڭ تۇراقتىلىعىن قامتاماسىز ەتەدى. ول اسىرەسە ونەركاسىپتى دامىتۋ جانە قازاقستاندىق ەكونوميكانىڭ باسەكەگە قابىلەتتىلىگىن ارتتىرۋدا اسا ماڭىزدى. سونىمەن قاتار, اەس قۇرىلىسىنىڭ جوباسى جاڭا جۇمىس ورىندارىن اشادى جانە وڭىردە ينفراقۇرىلىمدى دامىتۋعا ىقپال ەتەدى», دەدى نۇرلان بەكنازاروۆ.
نۇرتورە ءجۇسىپ ءوز كەزەگىندە اتوم ەلەكتر ستانتسياسىن سالۋ قازاقستاننىڭ ەنەرگەتيكالىق قاۋىپسىزدىگىن نىعايتا تۇسەتىنىن, شىعارىندىنى ازايتۋ ەسەبىنەن ەكولوگيالىق جاعداي جاقسارتاتىنىن جانە تەحنولوگيا مەن ونەركاسىپتى دامىتۋ جولىنداعى نەگىزگى قادام بولاتىنىن جەتكىزدى.
«اتوم ەلەكتر ستانتسيالارى قازىرگى الەمدەگى ەلەكتر ەنەرگياسىنىڭ نەگىزگى كوزىنىڭ ءبىرى بولىپ تابىلادى, بىرقاتار ەلدەردە ەنەرگەتيكالىق قاۋىپسىزدىك پەن ەكونوميكالىق ءوسۋدى قامتاماسىز ەتەدى. ولار كومىرقىشقىل گازىنىڭ از شىعارىندىسىمەن اۋقىمدى كولەمدە ەلەكتر ەنەرگياسىن وندىرۋگە مۇمكىندىك بەرەدى. ەنەرگياعا سۇرانىس قارقىندى ءوسىپ كەلە جاتقان جاعدايدا جانە كليماتتىڭ وزگەرۋىنە قارسى كۇرەس جاپپاي بەلەڭ العاندا اتوم ەنەرگەتيكاسى ەلدەرگە جاھاندىق باسەكەلەستىككە ىلەسۋ, تۇراقتى ەكونوميكالىق ءوسۋدى قولداۋ جانە حالىقتىڭ ءال-اۋقاتىن جاقسارتۋ مۇمكىندىگىن بەرە وتىرىپ, سەنىمدى جانە كەلەشەگى زور سالا بولىپ قالا بەرەدى», دەدى نۇرتورە ءجۇسىپ.
ايگۇل قاپباروۆا قازاقستاندا ەلەكتر ەنەرگياسىن وندىرەتىن ستانتسيالاردىڭ 70%-عا توزعانىن اتاپ ءوتتى. ول اتوم ەلەكتر ستانتسياسىنىڭ قۇرىلىسى ۇيلەردەگى جىلۋدى قامتاماسىز ەتۋ مەن ەكولوگيانى جاقسارتۋدان باستاپ بيزنەستى دامىتۋعا جانە جاڭا كاسىپورىندار اشۋعا دەيىنگى كوپتەگەن سالالارعا ىقپال ەتەتىن مۋلتيپليكاتيۆتى اسەرى بار اۋقىمدى جوبا ەكەنىن جەتكىزدى. بۇل تۇرعىدا اتوم ەلەكتر ستانتسياسىن سالۋ اتالعان ماسەلەلەردى شەشۋدە نەگىزگى قادام بولىپ تابىلادى.
«قازاقستاننىڭ حالىقارالىق ەكولوگيالىق مىندەتتەمەسى بار, وعان سايكەس ەلىمىز 2060 جىلعا قاراي كومىرتەگىنەن بەيتاراپ بولۋعا قول جەتكىزۋى ءتيىس. وسى تۇرعىدا ەۋروپالىق وداق كومىر ەنەرگياسىن پايدالانىپ وندىرگەن ونىمگە سالىق سالۋ ماسەلەسىن تالقىلاي باستادى. اتوم ەلەكتر ستانتسياسى بولاشاقتا تۇراقتى جانە ورنىقتى ەنەرگەتيكانى قامتاماسىز ەتۋدىڭ نەگىزگى شەشىمىنىڭ ءبىرى بولا الاتىنىن اتاپ ءوتۋ كەرەك», دەدى ايگۇل قاپباروۆا.
دەپۋتاتتار كەزدەسۋ سوڭىندا اتوم ەلەكتر ستانتسياسىنىڭ قۇرىلىسى ۇرپاق بولاشاعىنا دەگەن قامقورلىقتى كورسەتەتىن سالماقتى شەشىم ەكەنىن اتاپ ءوتتى. وسىعان بايلانىستى ءاربىر قازاقستاندىقتىڭ الداعى رەفەرەندۋمعا قاتىسۋى جانە ەلىمىزدىڭ دامۋىنا ءوز ۇلەسىن قوسۋى ماڭىزدى ەكەنى داۋسىز.
