ۇندەۋ ماتىنىندە تومەندەگىدەي وي-پىكىر جازىلعان:
«بۇل كۇن – ءبىزدىڭ اعا بۋىنعا ريزاشىلىعىمىزدى ءبىلدىرىپ, شىنايى كوڭىل بولۋىمىزگە مۇمكىندىك بەرىپ قانا قويماي, ولاردىڭ قاجەتتىلىكتەرىنە نازار اۋدارۋعا جاقسى سەبەپ. قاريالاردى قولداۋ, ولارعا قامقورلىق كورسەتۋ – اعا بۋىنعا كورسەتكەن پارىزىمىزدىڭ از عانا بولىگى. «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ باستاماسىمەن جىلدار بويى ەلىمىزدە قازان ايى «قارتتارىمىزدى قامقورلاي جۇرەيىك!» اكتسياسىنا ۇلاسىپ كەلەدى. قازاق حالقىنىڭ داستۇرىندە ۇلكەندى سىيلاپ, اقىلىن تىڭداپ, الدىنان كەسە-كولدەنەڭ وتپەگەن. ەلىمىزدە قارت ادامدارعا دەگەن قامقورلىق جىل سايىن ارتىپ كەلەدى. جاسىنىڭ ەگدە تارتۋىنا, دەنساۋلىعىنىڭ سىر بەرۋىنە بايلانىستى قارتتاردىڭ كوپتەگەن شەشىلمەگەن ماسەلەسى تۋىندايتىنىن بىلەسىزدەر, سوندىقتان ولارعا قولداۋ كورسەتۋ – تۋعان-تۋىستارى مەن بارشا قوعامنىڭ مىندەتى.
مەملەكەتىمىز قارتتارعا دەگەن قامقورلىقتى ەكونوميكالىق داعدارىس كەزىندە دە توقتاتقان ەمەس. دەگەنمەن ەلىمىزدە ءالى دە بولسا الەۋمەتتىك كومەككە مۇقتاج ەگدە ادامدار بار.
كەيبىر قاريالار جاسى ۇلعايعان شاعىندا جان جىلۋى مەن مەيىرىمگە ءزارۋ. بارلىق قازاقستاندىقتى, جۇمىس بەرۋشىلەردى, بيزنەس قۇرىلىم وكىلدەرىن, اعا بۋىننىڭ ەل يگىلىگىنە قوسقان ەسەلى ەڭبەگىن ۇلىقتاۋعا, «قارتتارىمىزدى قامقورلاي جۇرەيىك!» ايلىق اكتسياسىنا اتسالىسۋعا شاقىرامىز.
قاريالارعا ماتەريالدىق تۇرعىدان قولۇشىن سوزۋعا, الەۋمەتتىك-تۇرمىستىق جاعدايلارىنا قولداۋ كورسەتۋلەرىڭىزدى سۇرايمىز. ءوز ەلىنىڭ پاتريوتى رەتىندە اكتسياعا بەيجاي قارامايتىن ازاماتتار جەرگىلىكتى اكىمدىكتەرمەن, وڭىرلىك ارداگەرلەر كەڭەستەرىمەن بايلانىسقا شىعىپ ۇلەس قوسادى دەگەن ۇمىتتەمىز».
