ەلوردامىزداعى جاستار سارايىندا مەرزىمدى اسكەري قىزمەتكە الىنعان جاستاردى سالتاناتتى جاعدايدا شىعارىپ سالۋ ءراسىمى ءوتتى. «كۇز-2024» ناۋقانى اياسىندا ۇيىمداستىرىلعان ءىس-شاراعا ۇلتتىق قاۋىپسىزدىك كوميتەتىنىڭ شەكارا قىزمەتى اسكەري بولىمدەرىنە اتتاناتىن جاس ورەندەر قاتىستى. ونى وتكىزۋگە شەكارا قىزمەتىمەن قاتار, استانا قالاسى قورعانىس ىستەرى دەپارتامەنتى, قالالىق ءبىلىم باسقارماسى اتسالىستى.
بۇل ءىس-شارانىڭ ەرەكشەلىگى – وعان ەلوردامىزدىڭ 800-دەي مەكتەپ وقۋشىسى شاقىرىلىپ, ولارعا ارنايى قارۋ-جاراق, بايلانىس قۇرالدارى, شەكارا باقىلاۋ قىزمەتىندە قولدانىلاتىن تەحنيكا, قىزمەتتىك يتتەر كورسەتىلىپ, تولىق اقپارات بەرىلدى. ماقسات – جاس جەتكىنشەكتەرگە اسكەري ءومىردىڭ قىر-سىرىن تانىستىرۋ, ءيميدجىن ارتتىرۋ, سونداي-اق بولاشاق وتان قورعاۋشىلاردىڭ مەرزىمدى اسكەري قىزمەتكە دەگەن قىزىعۋشىلىعىن وياتۋ.
وقۋشىلارمەن كەزدەسۋدە استانا قالاسى اكىمىنىڭ ورىنباسارى ەرىك مەيىرحانوۆ, ۇلتتىق قاۋىپسىزدىك كوميتەتىنە قاراستى قۇرىلىمداردىڭ لاۋازىمدى تۇلعالارى, سونداي-اق اسكەرگە شاقىرىلعان جاستاردىڭ اتا-انالارى ءسوز سويلەپ, ويىمەن ءبولىستى. ءىس-شارا اياسىندا كونتسەرتتىك باعدارلاما ۇيىمداستىرىلدى.
كەزدەسۋ سوڭىندا اسكەرگە شاقىرىلعان 24 جاس ۇقك شەكارا قىزمەتى شىعىس قازاقستان وبلىستىق دەپارتامەنتىنە جىبەرىلدى. سول جاقتان الداعى ءبىر جىلدىق وتان الدىنداعى بورىشىن وتەيتىن اسكەري بولىمدەرگە اتتانباق.
ءىس-شارا بارىسىندا اسكەرگە الىنعان جاستار مەن وقۋشىلارعا قورعانىس مينيسترلىگى تاراپىنان قولعا الىنعان «سروچنيك 2.0» باعدارلاماسى تانىستىرىلدى. بۇل – اسكەري قىزمەتتىڭ ءيميدجى مەن تارتىمدىلىعىن ارتتىرۋعا باعىتتالعان ارنايى جوبا. ونىڭ اياسىندا مەرزىمدى قىزمەت بارىسىندا ەرەكشەلەنگەن اسكەري قىزمەتشىلەر ەلىمىزدىڭ اسكەري جانە ازاماتتىق جوعارى وقۋ ورىندارىنا ۇبت ناتيجەلەرىنسىز وقۋعا تۇسە الادى. مۇندا اسكەري بولىمدەردىڭ كومانديرلەرى ساربازداردىڭ جەتىستىكتەرىن «سروچنيك 2.0» ونلاين-پلاتفورماسىندا تىركەپ وتىرادى. سول ارقىلى ولاردىڭ ۇزدىكتەرى انىقتالىپ, جاۋىنگەرلىك دايىندىقتا جاقسى ناتيجە كورسەتكەن ازاماتتارعا جوعارى وقۋ ورنى ەسەبىنەن تەگىن جوعارى ءبىلىم الۋ مۇمكىندىگى بەرىلمەك.
سونىمەن قاتار ءىس-شارا بارىسىندا مەرزىمدى اسكەري قىزمەتتەگى جاستارعا «نەسيەلىك دەمالىس» بەرىلەتىنى تۋرالى دا ايتىلدى. قازىر باسىندا نەسيەسى جوق ادامدى تابۋ قيىن. ءتىپتى مەكتەپتى ەندى بىتىرگەن جاستاردىڭ دا بانككە بەرەشەگى بولۋى عاجاپ ەمەس. سونداي جاعدايدا ونىڭ نەسيەنى وتەۋ مەرزىمى اسكەردەن قايتىپ كەلگەنشە شەگەرىلەدى.
