فوتو: سەناتتىڭ ءباسپاسوز قىزمەتى
«قازاقستاننىڭ ەنەرگەتيكا سالاسىن دامىتۋ شۇعىل شەشىمدەردى تالاپ ەتىپ وتىر. اتوم ەنەرگەتيكاسى - ەلىمىزدى ەنەرگيامەن قامتاماسىز ەتۋ جانە ونىڭ ەكونوميكالىق تۇراقتىلىعىن قامتاماسىز ەتۋ جولىنداعى باستى قادام. قازاقستاننىڭ دامىعان ەلدەر قاتارىنا قوسىلۋى ءۇشىن اەس قاجەت. اەس الەمدە قارقىندى تۇردە پايدالانىلىپ كەلەدى جانە ەلىمىز ءۇشىن ەڭ جاقسى نۇسقانى تاڭداۋ – ءبىزدىڭ مىندەتىمىز», دەدى دەپۋتات ن.بايقاداموۆ.
ارداگەرلەر مەن اۋدان تۇرعىندارى پرەزيدەنت جولداۋىندا ايتىلعان باستاماعا قولداۋ ءبىلدىرىپ, وزدەرىن تولعاندىرعان ساۋالدارىن قويدى. سەناتورلار اقساقالدارمەن كەزدەسۋدەن كەيىن تۇران اۋىلدىق وكرۋگىنىڭ تۇرعىندارىمەن پىكىرلەستى.
رۋسلان رۇستەموۆ تابيعي گازدى جەتكىزۋدەگى تۇراقسىزدىق پەن ونى ءوندىرۋدىڭ قىسقارۋى جاعدايىندا اتوم ەنەرگەتيكاسى ەل ەكونوميكاسىن دامىتۋدىڭ سەنىمدى كوزىنە اينالاتىنىن جەتكىزدى.
«اەس قۇرىلىسى دا جۇمىس ورىندارىن اشۋعا, جاڭا تەحنولوگيانى دامىتۋعا جانە ەلىمىزدىڭ تۇراقتى ەنەرگەتيكالىق بولاشاعىن قامتاماسىز ەتۋگە سەپتىگىن تيگىزەدى. بۇل ەكونوميكانى نىعايتىپ قانا قويماي, ەلەكتر قۋاتىنىڭ تاپشىلىعىن شەشۋدىڭ ءبىر جولى بولماق», دەيدى سەناتور ر. رۇستەموۆ.
