فوتو: بايان سۇلەيمەنقىزى
وتاندىق مەديايندۋستريانى دامىتۋ جانە ىسكەرلىك قاتىناستاردى كۇشەيتۋ باعىتىنداعى اپتالىقتىڭ اشىلۋ سالتاناتىندا قر مادەنيەت جانە اقپارات ۆيتسە-ءمينيسترى قانات ىسقاقوۆ مينيستر ايدا بالاەۆانىڭ اتىنان قاتىسۋشىلاردى قۇتتىقتادى.
ۆيتسە-مينيستر Astana Media Week ەلىمىزدە عانا ەمەس, جالپى مەديا كەڭىستىكتە ماڭىزى زور ءىس-شارا ەكەندىگىن, ءداستۇرلى ءىس-شارانىڭ وتكىزىلۋىمەن وتاندىق مەديايندۋستريا جاڭا قارقىن الىپ جاتقاندىعىن اتاپ ءوتتى.
Astana Media Week-ءتىڭ ءبىرىنشى كۇنى «قازاقستان الەمدىك اقپاراتتىق الاڭدا» پانەلدىك سەسسياسىمەن اشىلدى. تاقىرىپقا وراي العاشقى بولىپ پىكىر بىلدىرگەن ۆيتسە-مينيستر قانات ىسقاقوۆ قازاقستان الەمدىك اقپارات سالاسىندا ءوز ورنىن ايقىنداۋى كەرەكتىگىن ايتتى.
«وسى باعىتتا ەلىمىزدە اقپاراتتىق دوكترينا ازىرلەندى. ونىڭ ەڭ باستى قاعيداتى - اقپاراتتىق ەگەمەندىگىمىزدى ساقتاۋ, باق سالاسىنىڭ باسەكەگە قابىلەتتىلىگىن ارتتىرۋ, شەتەلدىك نەمەسە سىرتقى تاۋەكەلدەرگە توتەپ بەرۋ. سونىمەن قاتار ونلاين پلاتفورما جانە ماسس-مەديا تۋرالى زاڭ جوباسى قابىلداندى. ەڭ ءبىرىنشى ماقساتىمىز - وتاندىق كونتەنتتى ارتتىرۋ جانە ونىڭ ساپاسىن كوتەرۋ», دەدى ۆيتسە-مينيستر.
قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ ەلىمىزدەگى تسيفرلاندىرۋدىڭ ارتىقشىلىعى مەن كەمشىلىگىنە توقتالدى.
«قازاقستان تسيفرلاندىرۋ بويىنشا الدىڭعى ورىندا كەلە جاتىر. اسىرەسە پاندەميا كەزىندە ەلىمىزدە ونلاين جۇمىستار كوبەيدى. Kaspi bank-ءتىڭ ونلاين قىزمەتى دە حالىقتىڭ ءومىرىن ايتارلىقتاي جەڭىلدەتتى. الايدا, تسيفرلاندىرۋ دامىعان سايىن الاياقتار دا كوبەيىپ كەلەدى. باتىس ەلدەرى نەگە تسيفرلاندىرۋعا تۇبەگەيلى كوشكىسى كەلمەيدى؟ سەبەبى وزدەرى تۋرالى اقپاراتتىڭ الاياقتاردىڭ قولىنا تۇسكەنىن قالامايدى», دەدى سپيكەر.
پانەلدىك سەسسيا بارىسىندا تاجىكستان رەسپۋبليكاسىنىڭ «دجاحوننامو» مەملەكەتتىك اقپاراتتىق تەلەارناسىنىڭ ديرەكتورى سادريدين شامسۋددينزودا تاجىكستانداعى تەلەارنالاردىڭ جۇمىسى تۋرالى باياندادى.
Jibek Joly/Silk Way تەلەارناسىنىڭ باسقارۋشى ديرەكتورى ەركەجان كۇنتۋعان تەلەارنانىڭ باستى ۇستانىمى - قانداي اقپارات تاراتسا دا الەمگە ءوزىنىڭ كوزقاراسىن ءبىلدىرۋ ەكەنىن ايتتى.
ء«بىز الەمگە ءوزىمىز تۋرالى ايتامىز جانە كەز كەلگەن ساياسي وقيعاعا كوزقاراسىمىزدى بىلدىرەمىز. شەتەلدىك ارنالار ءبىزدى قارايدى جانە ءبىز جاريالاعان ساراپشىلاردىڭ پىكىرلەرىن سۇراپ الىپ بولىسەدى. العا قويىپ وتىرعان ماقساتىمىزدىڭ ءبىرى - ورتالىق ازيانىڭ داۋىسىنا اينالۋ. ورتا ازيا ەلدەرىنىڭ ەكولوگيالىق, گەندەر, بالا قۇقىعى سەكىلدى ورتاق ماسەلەلەرىن كوتەرەتىن بولامىز», دەدى تەلەارنا ديرەكتورى.
م.س.نارىكباەۆ اتىنداعى كازگيۋ ۋنيۆەرسيتەتى اق باسقارما توراعاسىنىڭ ورىنباسارى ەربولات مۇحامەدجانوۆ تاۋەلسىزدىك العانىمىزعا 30 جىلدان اسسا دا, قازاقستاننىڭ الەمدىك دەڭگەيدە اقپارات تاراتا الاتىن جۋرناليستەردى دايىنداي الماۋىنىڭ سەبەبىن اتادى.
«كوڭىلدى دە, قارجىنى دا جەتكىلىكتى دەڭگەيدە ءبولىپ, الەمگە مىقتى اقپارات تاراتا الاتىن جۋرناليسترەدى قالىپتاستىرۋىمىز كەرەك», دەدى ەربولات مۇحامەدجانوۆ.
قازاقستانداعى Euronews وكىلى اسەل قوجاقوۆا دا ءوز پرەزەنتاتسياسىن ۇسىندى.
Astana Media Week-2024 اپتالىعىنىڭ ءبىرىنشى كۇنىندە ودان ءارى «مەديانىڭ رەنوۆاتسياسى (جاڭارۋ): زاڭ, قاۋىپسىزدىك جانە ترانسفورماتسيا»», «مەديا ترەندتەر: كلاسسيكالىق پلاتفورمادان تسيفرلىق مەديا-ەكوجۇيەگە دەيىن», «ينتەراكتيۆ: كۇيزەلىس: جۋرناليستەر ءۇشىن پسيحولوگيالىق تاجىريبە جيىنتىعى», «تولاسسىز اقپارات ايماقتىق باق جۇمىسىن قالاي وزگەرتىپ جاتىر؟ مەدياەتيكا جانە جۋرناليست مارتەبەسى», ۆيزيونەرلىك لەكتسيا «Superconnected:جي, تسيفرلىق مەديا جانە تەحنو-الەۋمەتتىك ءومىردىڭ بولاشاعى» تاقىرىپتارىندا پانەلدىك سەسسيالار وتەدى.
وتاندىق جانە شەتەلدىك جەتەكشى مەديامەنەدجەرلەر, مەملەكەتتىك قۇرىلىمداردىڭ وكىلدەرى, اقپاراتتىق پلاتفورمالاردىڭ باسشىلارى جانە تاۋەلسىز ساراپشىلار تاجىريبە الماسىپ, ءتۇرلى تالقىلاۋلار وتكىزەدى.
سونداي-اق اپتالىقتىڭ ءبىرىنشى كۇنى Selfie Travel حالىقارالىق تۋروپەراتورىنىڭ كامبودجاعا تۋريستىك ساپارى ۇتىس ويىنى جەڭىمپازىن جاريالاۋمەن اياقتالادى.
ەستەرىڭىزگە سالا كەتەيىك, مەديااپتالىق 25-27 قىركۇيەك ارالىعىندا قازمەديا ورتالىعىندا وتەدى.
