سۋرەت: instagram@mfa_kz
بۇل جاھاندىق ءىس-شارا بۇۇ باس حاتشىسى انتونيۋ گۋتەرريشتىڭ باستاماسىمەن وتكىزىلىپ, قازىرگى تاڭداعى جانە كەلەشەكتە تۋىندايتىن ماسەلەلەردىڭ بىرلەسكەن شەشىمدەرىن تابۋعا باعىتتالعان. سونداي-اق سامميت الەمدە بەيبىتشىلىك پەن وركەندەۋگە جول اشاتىن جانە حالىقارالىق ينستيتۋتتاردى زاڭدى ءارى ءتيىمدى ەتەتىن شەشىمدەر قابىلداۋدىڭ ماڭىزدى مۇمكىندىگىن اشۋعا ءتيىس.
ءسامميتتىڭ اشىلۋىندا بۇۇ باسشىسى ءححى عاسىردىڭ سىن-قاتەرلەرى ءححى عاسىردىڭ شەشىمدەرىن: جان-جاقتى جانە ينكليۋزيۆتى, سونداي-اق بۇكىل ادامزاتتىڭ تاجىريبەسىنە سۇيەنەتىن نەگىزدەمەلىك شەشىمدەردى تالاپ ەتەتىنىن مالىمدەدى.
«مەن بۇل سامميتتە بۇۇ جارعىسىنىڭ قۇندىلىقتارىنا نەگىزدەلگەن جاھاندىق ينستيتۋتتاردى زاڭدى, ءادىل ءارى ءتيىمدى ەتۋ ءۇشىن تەرەڭ رەفورمالاردى قاراستىرۋعا شاقىردىم. سونداي-اق بىزگە قايتادان جولعا ءتۇسۋ ءۇشىن قاتاڭ شەشىمدەر قاجەت. ويتكەنى ءبىزدىڭ الەم رەلستەن شىعىپ بارا جاتىر», دەدى باس حاتشى.
سامميتكە بۇۇ-عا مۇشە 130-دان اسا ەلدىڭ مەملەكەت جانە ۇكىمەت باسشىلارى, سىرتقى ىستەر مينيسترلەرى, سونداي-اق حالىقارالىق ۇيىمدار مەن ازاماتتىق قوعام وكىلدەرى قاتىستى.
ساپاردىڭ العاشقى كۇنى سىرتقى ىستەر ءمينيسترى مۇرات نۇرتىلەۋ سەربيانىڭ سىرتقى ىستەر ءمينيسترى ماركو دجۋريچپەن, البانيانىڭ سىرتقى ىستەر ءمينيسترى يگلي حاسانيمەن, انگولانىڭ سىرتقى ىستەر ءمينيسترى تەتە انتونيومەن, موڭعوليانىڭ سىرتقى ىستەر ءمينيسترى باتمۋنحين باتتسەتسەگپەن ەكىجاقتى كەزدەسۋلەر وتكىزدى. كەلىسسوزدەر بارىسىندا ساياسي, ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ قازىرگى جاعدايى مەن دامۋ كەلەشەگى تالقىلاندى. تاراپتار جاھاندىق جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى, سونداي-اق ءوزارا ءىس-قيمىلدىڭ بارلىق باعىتتارى بويىنشا سىندارلى ديالوگتى جالعاستىرۋعا ۋاعدالاستى.
جالپى, بولاشاق ءسامميتى – 22-23 قىركۇيەك كۇندەرى نيۋ-يوركتەگى بۇۇ شتاب-پاتەرىندە وتكەن جوعارى دەڭگەيدەگى ءىس-شارا. الەمدىك كوشباسشىلار جاھانعا ورتاق جارقىن بولاشاقتى قالاي قامتاماسىز ەتۋ كەرەكتىگى تۋرالى جاڭا حالىقارالىق كونسەنسۋس قۇرۋ ءۇشىن جينالىپ وتىر. ولار بولاشاق پاكتىسىن, جاھاندىق تسيفرلىق شارتتى جانە بولاشاق ۇرپاق تۋرالى دەكلاراتسيانى ءبىراۋىزدان قابىلدادى.
