ناقتىراق ايتساق, كونفەرەنتسياعا ەلدەگى مەديتسينالىق ۇيىمداردىڭ جەتەكشى ماماندارى مەن اقش, قىتاي, سلوۆەنيا, كۋۆەيت, گەرمانيا, رەسەي, قىرعىزستان, وزبەكستان, تاجىكستاننىڭ دارىگەرلەرى قاتىستى. فورۋمعا كەلگەن مامانداردىڭ سانى ەكى كۇندە 2 000-عا جەتسە, تىكەلەي ترانسلياتسيانى 4 مىڭعا جۋىق ادام تاماشالاعان. بۇدان وزگە پرەزيدەنت ءىس باسقارماسى مەديتسينالىق ورتالىعىنىڭ اۋرۋحاناسىمەن قاتار, ءۇندىستان, تۇركيا اۋرۋحانالارىنىڭ وپەراتسيا زالدارىنان تىكەلەي ترانسلياتسيا تارادى. بۇل كۇندەرى دارىگەرلەر كارديوحيرۋرگيا, نەيروحيرۋرگيا جانە قانتامىر حيرۋرگياسى بويىنشا 6 پاتسيەنتكە تىكەلەي ەفيردە وپەراتسيا جاساسا, ونى فورۋمعا جيىلعان ماماندار بىرگە تالقىلادى.
كونفەرەنتسيانىڭ ءبىرىنشى كۇنىندە پرەزيدەنت ءىس باسقارماسى مەديتسينالىق ورتالىعى مەن قىتايدىڭ «Xuanwu Hospital» اۋرۋحاناسى ارىپتەستىك بايلانىس تۋرالى مەموراندۋمعا قول قويدى. «Xuanwu Hospital» – قىتايدا 1968 جىلى اشىلعان نەۆرولوگيا مەن نەيروحيرۋرگيا بويىنشا العاشقى عىلىمي-زەرتتەۋ ورتالىعى سانالادى. حالىقارالىق مادجيدا سامي نەيروحيرۋرگيا جانە نەيروبيولوگيا ينستيتۋتى قۇرامىنا كىرەتىن نەيروحيرۋرگيالىق كلينيكا. وسىعان قوسا كلينيكا ۇلتتىق دەڭگەيدە نەۆرولوگيالىق بۇزىلىستار مەن نەيروحيرۋرگيالىق اۋرۋلاردى ەمدەۋدە, زەرتتەۋدە جەتەكشى ورتالىق دەپ تانىلعان. مەموراندۋم اياسىندا ەكى ەلدىڭ كلينيكالارى تاجىريبە الماسىپ, بايلانىس ورناتادى. وسى قۇجاتتىڭ ارقاسىندا ەپيلەپسيا وشاعىن انىقتايتىن Remebot روبوتى ەندى ەلدىڭ بارلىق ءوڭىرى ءۇشىن قولجەتىمدى بولادى.
ءپىب مەديتسينالىق ورتالىعى اۋرۋحاناسى ديرەكتورىنىڭ حيرۋرگيا بويىنشا ورىنباسارى مىڭجىلقى بەردىقوجاەۆ جاڭا قۇرىلعىنىڭ ناۋقاستاردى ەمدەۋدە الەۋەتى زور ەكەنىن ايتتى.
«ارينە, وپەراتسيانى روبوتسىز دا جاساي بەرۋگە بولادى, بىراق ول ۇزاقتاۋ وتەدى. اتالعان ستەرەوتاكتيكالىق قۇرىلعى ادام باسىنا ورناتىلىپ, باس سۇيەگىندەگى 13 تەسىك ارقىلى ەلەكترودتاردى قوندىرىپ, 3-4 كۇندە ەپيلەپتيكالىق وشاقتىڭ قاي جەردە ەكەنىن انىقتاۋعا مۇمكىندىك بەرەدى. وسى ارقىلى تەك سول جەردى كۇيدىرىپ, ناۋقاستى ەمدەپ, ساۋىقتىرىپ جىبەرۋگە بولادى. بۇل تەحنولوگيا قازىر پرەزيدەنت ءىس باسقارماسى مەديتسينالىق ورتالىعى اۋرۋحاناسىنىڭ ەپيلەپتولوگيا ورتالىعىندا قولدانىلادى. كەلەر جىلدان باستاپ ءار اۋرۋحانا مۇمكىندىگى بولسا وسى روبوتتى ساتىپ الىپ, قولدانا الادى», دەيدى نەيروحيرۋرگ م.بەردىقوجاەۆ.
ەكى كۇندە حيرۋرگيانىڭ بارلىق باعىتى قامتىلدى. قوناقتار مەن جەرگىلىكتى دارىگەرلەر ەرەسەكتەر مەن بالالاردى ەمدەۋ ماسەلەلەرى بويىنشا بايانداما وقىدى. ونىڭ ىشىندە جالپى حيرۋرگيا, ۋرولوگيا, پروكتولوگيا, گينەكولوگيا, كارديوحيرۋرگيا, نەيروحيرۋرگيا, قانتامىر حيرۋرگياسى, ينتەرۆەنتسيالىق حيرۋرگيا, اريتمولوگيا, وتورينولارينگولوگيا, وفتالمولوگيا, ونكولوگيا سىندى بارلىق باعىت نازاردان تىس قالمادى.
فورۋمعا گەرمانيادان كەلگەن نەيروحيرۋرگ, پروفەسسور دانەل حەنگي كەلەشەكتە ەلدەگى بىلىكتى دارىگەرلەرمەن تىعىز ارىپتەستىك بايلانىس ورناتقىسى كەلەتىنىن مالىمدەدى.
«بۇگىن مەن نەيروحيرۋرگيالىق سەكتسياعا قاتىستىم. ءوز باسىم الەمنىڭ تۇكپىر-تۇكپىرىندەگى ارىپتەستەرمەن تىعىز بايلانىستا بولىپ, بىلگەنىمىزدى ءبولىسىپ وتىرۋ, تاجىريبە الماسۋ اسا ماڭىزدى دەپ ويلايمىن. بۇل عىلىم, نەيروعىلىم جانە يننوۆاتسيا ءۇشىن قاجەت. وسىنداي فورۋمدارعا كەلگەندە ارىپتەستەرىمدى, ولاردىڭ جۇمىسىنداعى قىزىقتى جاعدايلاردى, ساتتەردى ەستىگەن سايىن جاڭا نارسە ۇيرەنەمىن. بۇگىن دە سونداي تىڭ تاجىريبەگە قانىقتىق. بولاشاقتا ارىپتەستەرمەن تىعىز بايلانىستا بولعىمىز كەلەدى. ويتكەنى سالاداعى مامانداردىڭ بىرىنەن-ءبىرى ۇيرەنەرى كوپ», دەيدى پروفەسسور.
مىسىردىڭ نەيروراديولوگ-دارىگەرى احماد مىرزا ەلىمىزگە ەكىنشى مارتە كەلىپ تۇر ەكەن. ونىڭ سوزىنشە, 2019 جىلمەن سالىستىرعاندا ەلدەگى مەديتسينا الدەقايدا ىلگەرىلەگەن.
– مەنىڭ نەيروراديولوگيا سالاسىندا جۇرگەنىمە 20 جىل بولدى. كەشە كونفەرەنتسيادا «مەحانيكالىق تروبوەكتوميا دارەجەسى جانە اقش-تاعى جۇرەكتىڭ جەدەل يشەميالىق اۋرۋلارىن ەمدەۋ تاسىلدەرى» تاقىرىبىندا بايانداما جاسادىم. دارىگەرلەر يشەميالىق اۋرۋلاردى دەر كەزىندە انىقتاپ, ەمدەۋى ءۇشىن ءبىرىنشى كەزەكتە ونىڭ قانداي كۇردەلى اۋرۋ ەكەنىن ءتۇسىنۋى ماڭىزدى. وسى تۋرالى ايتتىم. 2019 جىلى مىڭجىلقى سايلاۋ ۇلىمەن بىرگە الماتىداعى ورتالىقتا بولعان ەدىم. سول كەزەڭمەن سالىستىرعاندا قازىر سىزدەردە مەديتسينا جوعارى دەڭگەيدە ەكەنىن, ءبىر ورىندا تۇرىپ قالماي, دامىپ جاتقانىن كوردىم, وزگەرىستى بايقادىم, – دەيدى نەيراراديولوگ.
كونفەرەنتسيادا ماماندار «ەندوسكوپيا», «وتورينولارينگولوگيا, وفتالمولوگيا», «ورتوپەديا», «ۋرولوگيا», «كارديوحيرۋرگيا» سەكىلدى بىرنەشە سەكتسياعا ءبولىنىپ, وپەراتسيا بارىسىنداعى ءتۇرلى توسىن جاعدايلاردا قالاي ارەكەت ەتۋ كەرەگىن بىرلەسىپ تالقىلادى.
