جاقسىلاردىڭ ىزىندەي كيەلى شاڭىراق

حح عاسىردىڭ باسىندا ەلىمىز پات­شالىق رەسەيدىڭ شەتكەرى وتار ولكەسى سانالسا دا, سول كەزدەگى الەمدىك قارقىندى دامۋ ۇدەرىسىنەن تىس قالمادى. اسىرەسە كاپيتاليستىك نارىق قاتىناسىنىڭ وزىندىك زاڭى وسى ءۇردىستى جەدەلدەتتى. سونىمەن قاتار بۇل وزگەرىس قوعامدىق دامۋدىڭ ءتۇرلى سالاسىنا, ونىڭ ىشىندە ءبىلىمدى مامان مەن كاسىپكەرلىككە سۇرانىس تۋعىزدى.

العاش رەت دالالىق ولكەگە عانا ەمەس, باتىس ءسىبىردىڭ كوپتەگەن ايماعىنا باس­تاۋىش مەكتەپ وقىتۋشىلارىن دايار­لاۋ ماقساتىندا سەمەي قالاسىندا مۇعا­لىمدەر سەمينارياسىن اشۋ تۋرالى ما­سەلەنى باتىس ءسىبىر وقۋ وكرۋگىنىڭ قام­قورشىسى پ.لاۆرەنتەۆ كوتەردى.

1903 جىلى 23 قىركۇيەكتە سەمەيدە مۇعالىمدەر سەمينارياسى اشىلدى. بۇل رەسمي تۇردە – «باستاۋىش سىنىپ وقىتۋشىلارىن دايارلاۋعا ارنالعان مۇعالىمدەر سەمينارياسى» دەپ اتالدى. اتى ايتىپ تۇرعانداي, بۇل سەميناريا باستاۋىش ۋچيليششەلەر مەن باستاۋىش ورىس-قازاق مەكتەپتەرىنە جانە اۋىلداعى قازاق مەكتەپتەرىنە مۇ­عالىمدەر دايارلادى. سەمەي مۇعالىمدەر سەمينارياسىنىڭ تۇڭعىش ديرەكتورى بولىپ سانكت-پەتەربور ۋنيۆەرسيتەتىنىڭ تۇلەگى الەكساندر ۆلاديميروۆيچ بەلىي تاعايىندالدى. ول وقۋ ورنىن 1906 جىلدىڭ 1 تامىزىنا دەيىن باسقارىپ, سەميناريانىڭ قالىپتاسۋىنا زور ۇلەس قوستى. سودان بەرى ساقتالعان قۇجاتتارعا زەر سالساق, سەميناريا العاش اشىلعاندا وقۋعا تۇسۋگە تالاپكەرلەر توم, توبىل, ۆورونەج, ورەل گۋبەرنيالارى مەن سەمەي, جەتىسۋ وبلىستارىنان ءوتىنىش بەرگەن.

ا.بەلىيدىڭ كەيىن سانكت-پەتەربور تاريح-فيلولوگيا ينستيتۋتىنىڭ تۇلەگى ميحايل نيكولاەۆيچ بەرەزنيكوۆ 12 جىل ديرەكتور بولدى. سونىمەن قاتار مۇندا تاڭداۋلى جوعارى وقۋ ورىندارىن بىتىرگەن وزىق ويلى پەداگوگتەر ەڭبەك ەتتى. 1905 جىلى 1 شىلدەدە سەمەي مۇعالىمدەر سەمينارياسىنا قىرعىز (قازاق) ءتىلى وقىتۋشىسىنىڭ قىزمەتى ەنگىزىلىپ, بۇعان نۇرعالي قۇلجانوۆ قابىلداندى. 1906 جىلى ماۋسىمدا مۇعالىمدەر سەمينارياسىنىڭ العاشقى 15 تۇلەگى ءبىتىرىپ, ولارعا باستاۋىش ۋچيليششەنىڭ مۇعالىمى كۋالىگى تابىس ەتىلدى. 1914 جىلى وقۋ ورنىنا يمپەراتوردىڭ تاق مۇراگەرى الەكسەي نيكولاەۆيچتىڭ ەسىمى بەرىلدى. سونداي-اق مۇندا وقۋشىلارعا ەرلى-زايىپتى نۇرعالي, ءنازيپا قۇل­جانوۆتار, اعايىندى ن.بەلوسليۋدوۆ, ا.بەلوسليۋدوۆ, ي.مالاحوۆ, ۆ.پوپوۆ سياقتى بىلىكتى ۇستازدار ساباق بەردى.

قازاقتىڭ دارىندى جاستارى وقىعان سەمەي مۇعالىمدەر سەمينارياسى شاكىرت­تەرىنە جان-جاقتى ءبىلىم بەرۋمەن بىرگە ولاردىڭ رۋحاني-ەستەتيكالىق دامۋى­نا دا ەرەكشە كوڭىل اۋداردى. ولار قالادا ءتۇرلى مادەني ءىس-شارا مەن ۇلتتىق ويىن-ساۋىق كەشىن ۇيىمداستىردى. 1914 جىلى سەمەيدە ابايدىڭ قايتىس بولۋى­نا 10 جىل تولۋىنا ارنالعان ادەبي-ەتنوگرافيالىق, مۋزىكالىق ونەر كەشىن وتكىزۋگە ەرلى-زايىپتى قۇلجانوۆتارمەن بىرگە سەميناريادا وقيتىن قازاق جاس­تارى ۇيىتقى بولدى. بۇل تۋرالى «اي­قاپ» جۋرنالىنىڭ 1914 جىلعى № 4 سا­­­نىندا ماقالا جاريالانعان. سەمەي وب­لى­سىنىڭ سول كەزدەگى اسكەري گۋبەرناتورى ف.چەرنتسوۆ پەن قالا جۇرتشىلىعى قاتىس­قان وسى كەشتە ءنازيپا قۇلجانوۆا گۋبەر­ناتوردىڭ ءوزىن تاڭعالدىرىپ, تازا ورىس تىلىندە ابايدىڭ ءومىرى تۋرالى بايانداما جاساعان. وسىدان-اق ەلىمىزدىڭ قانشاما بۋىنىن تاربيەلەگەن وقۋ ورنىنىڭ ەل تاريحىنداعى الاتىن ورنى زور ەكەنىن كورەمىز.

مۇعالىمدەر سەمينارياسىندا ءا.سات­­باەۆ, ق.ساتباەۆ, م.اۋەزوۆ, ج.اي­­ماۋىت­ ۇلى, ق.نۇرمۇحامەدوۆ, ب.سار­سەنوۆ, ءا.مارعۇلان سەكىلدى ايتۋلى ۇلت زيا­لى­لارىنىڭ العاشقى اعارتۋشىلىق, قايرات­كەرلىك, جازۋشىلىق جولى قا­لىپتاستى.

قازاق ادەبيەتىنىڭ كلاسسيگى, وقۋ ور­نىنىڭ تۇلەگى مۇحتار اۋەزوۆ 1915-1920 جىلدارى مۇعالىمدەر سەميناريا­سىندا وقىپ ءجۇرىپ, العاشقى شىعارمالارىن جازدى. سونىمەن بىرگە بولاشاق داڭق­تى جازۋشى «يارىش» فۋتبول كومان­داسىنىڭ بەلسەندى مۇشەسى بولىپ قانا قويماي, ج.ايماۋىت ۇلىمەن بىرگە 1918 جىلى «اباي» جۋرنالىن شىعاردى. حالقىمىزدىڭ ۇلتتىق ساناسىن وياتاتىن ماقالالارى «سارىارقا», «قازاق ءتىلى» گازەتتەرىندە ءجيى جاريالاندى.

1914-1919 جىلدارى سەميناريا شا­كىرتى جۇسىپبەك ايماۋىت ۇلىنىڭ شىعار­ماشىلىق تالانتى جارقىراپ كورىندى. 1915 جىلدىڭ 13 اقپانىندا سەمەيدە وتكەن تاريحي كەشتە ء«بىرجان مەن سارا» ايتىسىنىڭ ساحنالىق نۇسقاسىن جاساپ, ونى قويعان جۇسىپبەك بولاتىن. 1916-1917 جىلدارى جازۋشىنىڭ «ەسكى تارتىپپەن بالا وقىتۋ», «رابيعا» سىندى پەسالارى جارىق كوردى.

سونداي-اق وقۋ ورنىنىڭ تاريحى – عىلىم اكادەمياسىنىڭ تۇڭعىش پرەزيدەنتى, اسا كورنەكتى اكادەميك قانىش ساتباەۆتىڭ ەسىمىمەن دە تىكەلەي بايلانىستى. مۇندا 1914-1919 جىلدارى سەميناريا ديرەكتورىنىڭ 14 سەميناريسكە ستيپەنديا تاعايىنداۋ تۋرالى سەمەي وبلىستىق باسقارماسىنا جازعان قاتىناس-حاتى ساقتالعان. سونىڭ ىشىندە ايتۋلى عالىمنىڭ دا ەسىمى بار. وقۋىن تامامداعاننان كەيىن ق.ساتباەۆ مۇعالىمدەر سەمينارياسى جانىنداعى قازاق مۇعالىمدەرىنە ارنالعان ەكى جىل­دىق پەدكۋرستا جاراتىلىستانۋ پانى­نەن ساباق بەرگەن. تاعى دا بەلگىلى تۇل­عانىڭ ءبىرى – سەمەيدەگى الاش ميليتسيا­سىن قۇرىپ, ونىڭ العاشقى كومانديرى بولعان, 1918 جىلى 6 ناۋرىزدا سوۆدەپتىڭ قىزىلگۆاردياشىلارى اتىپ ولتىرگەن, سەميناريست قازى نۇرمۇحامەت ۇلى.

مۇعالىمدەر سەمينارياسىندا وقىعان ساناۋلى قازاق جاستارى وزگە ۇلت وكىلدەرى اراسىندا وقۋعا دەگەن زور ىنتالارىمەن ەرەكشەلەنگەن. سەميناريادا 1903-1920 جىلدارى ارالىعىندا قۇرمانباي مۇزدىباەۆ, ابىكەي ساتباەۆ, احمەتوللا بارلىباەۆ, قاسىمبەك اۋەزوۆ, احمەتبەك سەيسەمباەۆ, تاۋەكەل نۋركين, ءابىش حاسەنوۆ, اعايىندى بياحمەت جانە جاناح­مەت سارسەنوۆتەر, راقىمباي ساپاقوۆ, يماماعزام الىم­بەكوۆ, مۇستافا شان­تين, ابدىكارىم دۇيسەباەۆ, قاسىمحان بە­كە­ناەۆ سياقتى قازاق جاستارى ءبىلىم العان.

1919 جىلى كەڭەس وكىمەتى ورناعاننان كەيىن جاڭا بيلىك وكىلدەرى ءبىلىم بەرۋ ىسىنە دە باسا نازار اۋداردى. الدىمەن ولار حالىقتىڭ ءارتۇرلى توبى ارا­سىنداعى ساۋاتسىزدىقتى جويۋدى كۇن تارتىبىنە قويدى. وسى ماڭىزدى ىستە سە­مەي مۇعالىمدەر سەمينارياسىنا ۇلكەن مىندەتتەر جۇكتەلدى.

اتالعان سەميناريا 1920 جىلدىڭ قىركۇيەگىنەن باستاپ, «سەمەي حالىققا ءبىلىم بەرۋ پراكتيكالىق ينستيتۋتى» دەگەن جاڭا اتاۋمەن قىزمەتىن باستادى. ال 1922 جىلى اتالعان وقۋ ورنىنىڭ نەگىزىندە ەكى پەداگوگيكالىق تەحنيكۋم (قازاق, ورىس) اشىلدى. 1922 جىل­دىڭ 1 جەلتوقسانىندا سەمەي قازاق پە­داگوگيكالىق تەحنيكۋمىنىڭ ديرەك­تورلىعىنا ءا.ساتباەۆ تاعايىن­دالدى. ابىكەي زەيىن ۇلى بۇل قىزمەتتى 1927 جىلدىڭ شىلدەسىنە دەيىن اتقاردى. قازاق پەدتەحنيكۋمىندا وسى كەزەڭدە بەلگىلى الاش قايراتكەرلەرى – ءالىمحان ەرمەكوۆ, حالەل عابباسوۆ, سەيتباتتال مۇستافين, تايىر جومارتباەۆ, عالياقپار تورەباەۆ, ءماننان تۇرعانباەۆ ساباق بەردى. سونىمەن قاتار ب.گەراسيموۆ, ن.بەلوسليۋدوۆ, ە.مەرتۆەتسوۆ سەكىلدى بىلىكتى ۇستازدار قىزمەت ىستەدى. ءا.ساتباەۆتان كەيىن سەمەي­دەگى قازاق پەدتەحنيكۋمى مەن ۋچيليششەسىن 1930-1940 جىلدارى ا.جيەنعاليەۆ, ش.مۇ­حامەتوۆ, ك.حاميتوۆ, ت.جايىقباەۆ, ت.مۋسين, م.مۋرتازين سياقتى ازامات­تار باسقاردى. وسى قازاق پەدتەحنيكۋمىندا وقىپ, ءبىلىم العان تانىمال تۇل­عالاردان: اكادەميك الكەي مارعۇلاندى, تاريح عىلىمدارىنىڭ دوكتورى, پروفەسسور مۇساتاي اقىنجانوۆتى, قازاق كسر وقۋ ءمينيسترى, پەداگوگيكا عىلىمدا­رىنىڭ دوكتورى, پروفەسسور ءابدىحاميت سەمباەۆتى, قازاق كسر ىشكى ىستەر ءمي­نيسترى شىراقبەك قابىلباەۆتى, پە­داگوگ, اقىن احات قۇدايبەرديەۆتى, سو­تسيا­­ليستىك ەڭبەك ەرى, ۇلاعاتتى ۇستاز جا­­قيا ءشايجۇنىسوۆتى, ساياسي قۋعىن-سۇر­گىن قۇر­بانى, اقىن, جۋرناليست, پەداگوگ تۇر­لىحان قاسەندى ەرەكشە ايتۋعا بو­لادى.

ورىس پەداگوگيكالىق تەحنيكۋمى مەن ۋچيليششەسىن 1922-1950 جىلدارى ا.ميحايلوۆ, ۆ.بوبوشكين, ن.چۋرسين, ا.ميكەشين, پ.حومۋتوۆ, ل.تيۋرين سىندى قابىلەتتى ديرەكتورلار باسقارىپ, وقۋ ورنىنىڭ ماتەريالدىق-تەحنيكالىق بازاسىن نىعايتتى. سونداي-اق وقۋ ورنىندا ا.مالاحوۆ, ا.چۋرسينا, ت.ستيۋحين, ل.ۋساچەۆا, پ.پوپوۆ سىندى تاجىريبەلى ۇستاز­دار ەڭبەك ەتتى. ال ورىس پەدتەحنيكۋ­مىن بىتىرگەن تۇلەكتەر اراسىنان عالىم, ۇستاز ل.پەرەلىگين, سوتسياليستىك ەڭبەك ەرلەرى م.نوسوۆا, د.پاري, كەڭەس وداعىنىڭ باتىرلارى ۆ.بۋنتوۆسكيح, ۆ.شۋلياتنيكوۆ سەكىلدى تۇلعالار شىقتى. 1937 جىلى ەكى پەدتەحنيكۋم نەگىزىندە قازاق جانە پەداگوگيكالىق ۋچيليششەسى قۇرىلدى. قازاق پەدۋچيليششەسىنەاباي قۇنانباي ۇلىنىڭ, ورىس پەدۋچيليششەسىنە ك.ۋشينسكيدىڭ اتى بەرىلدى. 1953 جىلى اتالعان ەكى وقۋ ورنى بىرىكتىرىلىپ, ك.د.ۋشينسكي اتىنداعى پەداگوگيكالىق ۋچيليششە دەپ اتالدى. 1953 جىلى پەداگو­گيكالىق ۋچيليششەنىڭ 50 جىلدىعى كەڭ كولەمە اتاپ ءوتىلدى. قازاق كسر حا­لىق اعارتۋ مينيسترلىگىنىڭ 1953 جىل­عى 10 قىركۇيەكتەگى بۇيرىعىمەن ا.كرا­سيلنيكوۆا, ن.گەچەللو, ن.بەلسكايا, م.شاياحمەتوۆا, ز.حومۋتوۆا, ۆ. نازيروۆا, ا.تسيكۋنوۆا سىندى ۇستازدار مەملەكەتتىك ناگرادامەن ماراپاتتالدى. 1950-1960 جىلدارى وقۋ ورنىن گ.ۋرازالين, ت.اقا­جانوۆ, ا.بارتىكوۆ, ۋ.ابىشەۆ, ج.داۋكەەۆ سەكىلدى ىسكەر ديرەكتورلار باسقاردى.

1957 جىلى قازاق كسر حالىق اعار­تۋ مينيسترلىگىنىڭ «پەداگوگيكالىق ۋچيليششەلەردى تاراتۋ تۋرالى» بۇيرىعىنا سايكەس سەمەيدەگى پەداگوگيكالىق ۋچيليششە قىزمەتىن توقتاتىپ, ونىڭ ماتەريالدىق قۇندىلىقتارى ن.ك.كرۋپسكايا اتىنداعى سەمەي پەداگوگيكالىق ينستيتۋتىنا بەرىلدى. بىراق پەدۋچيليششەنى جابۋدىڭ قاتەلىگىن ۋاقىتتىڭ ءوزى دالەلدەدى. 1963 جىلى سەمەي پەداگوگيكالىق ۋچي­ليششەسى قايتادان اشىلدى. ونىڭ ديرەك­تورلىعىنا ىسكەر باسشى, بىلىكتى پەداگوگ ا.بەكباەۆ تاعايىندالدى.

ا.بەكباەۆتىڭ باستاماسىمەن مۇحتار اۋەزوۆتىڭ تۋعانىنا 70 جىل تولۋ قۇرمە­تىنە وراي ۇكىمەتتەن وقۋ ورنىنا اسا كورنەكتى جازۋشىنىڭ اتىن بەرۋ تۋرالى ۇسىنىس جاسالدى. 1967 جىلى 6 جەل­­توقساندا قازاق كسر مينيسترلەر كەڭە­­سى توراعاسىنىڭ № 628 بۇيرىعىمەن ءبىلىم ورداسىنا زاڭعار سۋرەتكەردىڭ ەسىمى بەرىلدى. ۋچيليششە 1970 جىلى ناۋرىزدا ش.ءۋاليحانوۆ كوشەسىندەگى بۇرىنعى عيماراتىنا ورالىپ, وقۋ ورنىنا ارنايى 400 ورىندىق جاتاقحانا سالىندى. 1987 جى­لى م.اۋەزوۆتىڭ 90 جىلدىق مەرەي­­تويى قارساڭىندا بايىرعى عيماراتقا جاپسارلاس جاڭا وقۋ كورپۋسى پايدالانۋعا بەرىلدى. وسى جۇمىستاردىڭ ءبارى سول كەزدەگى ۇلىلاردىڭ ءىزى قالعان شاڭىراقتى باسقارعان اسىلحان تابىلدى ۇلىنىڭ كەزىندە جۇزەگە استى.

1992 جىلى وقۋ ورنى پەداگوگيكالىق كوللەدج بولىپ قايتا قۇرىلىپ, باسشى­لىعىنا فيلوسوفيا عىلىمدا­رىنىڭ كانديداتى ن.قاليەۆ كەلدى. ول قازاق تىلىندە وقيتىن توپتاردى اشۋعا كوپ كوڭىل ءبولدى.

بۇگىندە مۇحتار اۋەزوۆ اتىنداعى پەداگوگيكالىق كوللەدج – قازىرگى زاماناۋي يننوۆاتسيالىق تەحنولوگيالارعا سايكەس قۇرىلعان, داعدى مەن قۇزىرەتتىڭ كەڭ ءتۇرىن مەڭگەرگەن بىلىكتى مامانداردى دايارلايتىن وقۋ ورنى. پەداگوگيكالىق ۇجىم بولاشاق مامانداردىڭ ساپالى ءبىلىم الۋىمەن قاتار ولاردىڭ ازاماتتىق جاۋاپكەرشىلىگىن, وتانشىلدىق رۋحىن, ەلدىك قاسيەتى مەن ۇلتتىق ار-ۇجدانىن تاربيەلەۋگە باسا نازار اۋدارادى.

كوللەدجدىڭ كىرسە شىققىسىز وقۋ عيماراتتارى, ونداعى باي كىتاپحانا, ەلەكتروندى وقۋ زالى, كومپيۋتەرلىك, مۋلتيمەديالىق-لين­گوفوندىق, ين­تەراكتيۆتى وقۋ كابينەتتەرى ينتەراكتيۆتى پانەلمەن, «smart» تاقتا جانە زاماناۋي موديفيكاتسياداعى جيھازدارمەن جابدىقتالعان, سپورت زالدارى تالاپقا ساي. ەرگونوميكالىق ينتەرەرمەن ەرەكشەلەنەتىن دالىزدەر, كوۆوركينگ ورتالىعى, ستۋدەنتتەر جاتاقحاناسى – ءبىلىم الۋشىلاردىڭ ساپالى ءبىلىم الۋى مەن دەمالۋىنا قولايلى ورتا. وسىنىڭ ءبارى كەلگەن ادامدى تاڭعالدىرماي قوي­مايدى. كوللەدج اۋلاسىنداعى قابىرعاعا وقۋ ورنىن ءار كەزەڭدەردە بىتىرگەن, تاريحتا اتتارىن قالدىرعان تۇلعالارعا ارنالعان تاعزىم تاقتالار ىلىنگەن.

حالقىمىزدا «جاقسىنىڭ جاقسىلى­عىن ايت, نۇرى تاسىسىن» دەگەن ءبىر تاماشا اتالى ءسوز بار. ونداي ءتامسىل, ءوزىنىڭ سانالى عۇمىرىندا حالقىنىڭ يگىلىگى ءۇشىن كۇش-جىگەرىن اياماعان, سونىڭ جاقسىسىنا قۋانعان, جامانىنا كۇيىنگەن, قالدىرعان ىزدەرى سايىن دالانىڭ توسىندە, قوڭىر جوتالاردا سايراپ جاتىر دەيتىندەي جاندارعا ايتىلاتىنى ايان. جۇرتشىلىق سونداي جاننىڭ ءبىرى دەپ, قاسيەتتى قارا شاڭىراق – م.اۋەزوۆ اتىنداعى پەداگوگيكالىق كوللەدجدىڭ ديرەكتورى, فيلولوگيا عىلىمدارىنىڭ كانديداتى شاعانگۇل الدامجارقىزى جاناەۆانى اتايدى.

قازىر باعانالى ءبىلىم ورداسىن­دا وقىپ, قىزمەت جاساعان, ەلدىڭ ەر­تەڭىنە تەمىرقازىقتاي باعىت بەرگەن تاۋ تۇلعالارعا ارنالعان 38 اتاۋلى ءدا­رىس­حانا, ەلەكتروندى-اقپاراتتىق زال, ينتەرنەت زال جۇمىس ىستەيدى, سونىڭ 20-سى ۇلتجاندى ازاماتتاردىڭ, بەلگىلى مەتسەناتتاردىڭ قارجىلاندىرۋىمەن جابدىقتالعان. 2013 جىلى وقۋ ورنىنىڭ تاريحى جايىنداعى تۇڭعىش كىتاپ – «الاشتىڭ ءبىلىم ورداسى» اتتى تانىمدىق-عىلىمي سيپاتتاعى جيناعى, 2018 جىلى وقۋ ورنىنىڭ 115 جىلدىعىنا وراي «الاشتىڭ ءبىلىم ورداسى» تومدىعىنىڭ 2-كىتابى, بيىل «الاشتىڭ تۇڭعىش ءبىلىم ورداسى» كىتابىنىڭ ءىىى تومدىعى جارىق كوردى. بيىلعى وقۋ جىلىندا كوللەدجدىڭ 120 جىلدىق مەرەيتويىنا تارتۋ رەتىندە «ەس-ايماق» جاستار رۋحاني ورتالىعى اشىلدى.

سونداي-اق وقۋ ورنىندا ءار پەداگوگ­تىڭ قىزمەت جاعىنان كەمەلدەنىپ, جوعار­لاۋىنا مۇمكىندىكتەر جاسالعان. ماسەلەن, «جالپى بيولوگيا» وقۋ قۇرالدارىنىڭ اۆتورى ب.قالكەنوۆا رەسپۋبليكالىق «ۇزدىك پەداگوگ-2019» بايقاۋىنىڭ جەڭىم­پازى اتانعان. سونىمەن بىرگە 4 وقى­­تۋ­شى «تالاپ» كەاق شتاتتان تىس ترە­نەرى, 9 وقىتۋشى جببم شەڭبەرىندە جببپ وقىتۋ باعدارلاماسى بويىنشا شتاتتان تىس ايماقتىق ترەنەر. ال پەدا­گوگ-شەبەر ز.القانوۆا كانديداتۋ­راسى «كىشى سى­نىپتاردا وقىتۋ» قۇزى­رەت­تىلىگى بويىنشا «WorldSkills» ۇلت­تىق چەمپيو­ناتىنىڭ باس ساراپشىسى رە­تىندە ۇسى­نىلدى. وقىتۋشىلار ۇزدىك­سىز كاسىبي شىعارماشىلىعىن دامىتۋمەن قاتار ستۋدەنتتەردىڭ زياتكەرلىك الەۋەتى­نىڭ وسۋى­نە ىقپال جاساپ, عىلىمي-پراكتي­كالىق كون­فەرەنتسيالار, پاندىك وليمپيادا­لار مەن كاسىپتىك بايقاۋلار ءجيى وتەدى. ايتالىق, كوللەدج ستۋدەنتتەرى «WorldSkills Kazakhstan» رەسپۋبليكالىق چەم­پيوناتىندا ەكى دۇركىن جەڭىمپاز بولدى.

2022 جىلى اباي وبلىسىنا كەلگەن ساپارىندا مەملەكەت باسشىسى قاسىم-جومارت توقاەۆ م.اۋەزوۆ اتىنداعى كوللەدجدىڭ جۇمىسىمەن تانىسىپ, جەتىستىكتەرىن كوردى. ۇجىممەن ەركىن اڭگىمەلەسىپ, ريزاشىلىعىن ءبىلدىردى.

باسەكەگە قابىلەتتى, تەرەڭ ءبىلىمدى, بيىك رۋحتى, كاسىبي شەبەرلىكتى شىڭداي بىلەتىن مامانداردى دايارلاۋدا كوللەدج ۇجىمىنىڭ اتقارىپ جاتقان قىزمەتىنىڭ اۋقىمى بارىنشا كەڭ. تاريحي تاعىلىمى مول ەلىمىزدەگى پەداگوگيكالىق ارنايى وقۋ ورىندارىنىڭ تۇڭعىشى – م.اۋەزوۆ اتىنداعى پەداگوگيكالىق كوللەدجىنىڭ ىرگەسى بيىك, تۇعىرى مىعىم.

مۇحتاربەك كارىموۆ,

شاكارىم ۋنيۆەرسيتەتىنىڭ پروفەسسورى