D توبىندا توپتىق كەزەڭ ماتچتارىن وتكىزگەن جىگىتتەر الدىمەن ەكى دۇركىن الەم چەمپيونى يسپانيا قۇراماسىمەن تەڭ ءتۇستى (1:1). ودان كەيىن ليۆيا قۇراماسىن 4:1 ەسەبىمەن ۇتتى. توپتاعى سوڭعى سايىستى جاڭا زەلانديا ويىنشىلارىنا قارسى وتكىزگەن جىگىتتەر ماچت بويى ەركىن قيمىلداپ, 10:0 ەسەبىمەن ايقىن باسىمدىلىقپەن جەڭدى. وسى ماتچتا ارنولد كناۋب ەنشىسىنە 5 گول جازىپ, الەم چەمپيوناتىنىڭ تاريحىندا سپورتشىلارىمىزدىڭ اراسىنان العاش بولىپ پەنتا-تريك ورىنداعان سۇرمەرگەن اتاندى. الەمدىك دودادا 2016 جىلدان بەرى پەنتا-تريك تىركەلمەگەن ەدى. ارنولد وسى ستاتيستيكانىڭ كوبەسىن سوگىپ, سەڭگە قوزعاۋ سالدى. ايتپاقشى, ۇلتتىق قۇراما ءدال مۇنداي ءىرى ەسەپپەن سوڭعى رەت 2016 جىلى سولومون ارالدارى قۇراماسىن (ەسەپ 10:0) ۇتقان-دى.
پورتۋگاليا قۇراماسىمەن ءبىزدىڭ ويىنشىلار بۇعان دەيىن الەم چەمپيوناتىنىڭ تارتىسىندا ەكى رەت كەزدەستى. 2000 جىلى وتكەن الەم چەمپيوناتىنىڭ توپتىق كەزەڭىندە ءبىزدىڭ قۇراما پورتۋگالدىقتارعا 2:6 ەسەبىمەن جول بەردى. ەكىنشى رەت 2021 جىلى وتكەن الەم چەمپيوناتىنىڭ جارتىلاي فينالىندا توقايلاستى. نەگىزگى ۋاقىتتا 1:1 ەسەبى تىركەلىپ, ەكسترا تايمدا دۋگلاستىڭ گولىنان كەيىن 2:1 ەسەبىمەن العا شىققان جىگىتتەر ماتچتىڭ تۇگەسىلۋىنە ەكى مينۋت ۋاقىت قالعاندا قورعانىستى بوساڭسىتىپ, پورتۋگالدىقتار تارازى باسىن تەڭەستىرىپ كەتتى. ودان كەيىن پەنالتي سەرياسىندا دا ولار 4:3 ەسەبىمەن ۇستەم ءتۇستى.
ەسە قايتاراتىن ءسات كەلدى. الەم چەمپيوناتىنىڭ تارتىسىندا ەكى رەت باسىم تۇسكەن پورتۋگاليا قۇراماسىن ءبىزدىڭ جىگىتتەر 2015 جىلى ەۋروپا چەمپيوناتىنا ىرىكتەۋ دوداسىندا 3:1 ەسەبىمەن جەڭگەن. ەندەشە, الەم چەمپيونى ەكەن دەپ, اتاعىنان قايمىعۋ ەش قيسىنسىز. ەگەر ريكاردو كاكا شاكىرتتەرى پورتۋگاليا قۇراماسىن جەڭسە, وندا شيرەك فينالدا ارگەنتينا – حورۆاتيا تارتىسىنىڭ جەڭىمپازىمەن شەبەرلىك سىناسادى.
2021 جىلى ليتۆادا وتكەن الەم چەمپيوناتىندا پورتۋگاليا قۇراماسى فينالدا ارگەنتينا ويىنشىلارىن 2:1 ەسەبىمەن ۇتقان ەدى. ءبىزدىڭ جىگىتتەر قولا جۇلدە ءۇشىن تارتىستا برازيليا قۇراماسىنان 4:2 ەسەبىمەن ۇتىلىپ, 4-ورىندى مىسە تۇتتى. «الەم چەمپيوناتىنا قاتىسۋشى بارلىق قۇراما دا تەگەۋرىندى. دەسە دە ولاردىڭ اتاعىن, ابىرويىن سالماقتاپ, قايمىعۋ بىزگە جات. ەلگە عالامدىق الاماننىڭ ءبىر جۇلدەسىن تارتۋ ەتۋگە بارىمىزدى سالامىز», دەدى باس باپكەر ريكاردو كاكا.
ۇستەل تەننيسى: ازيا الامانى استانادا وتەدى
استانادا 6-13 قازان ارالىعىندا ۇستەل تەننيسىنەن ءححVىى ازيا چەمپيوناتى وتەدى. قۇرلىقتىڭ تاڭداۋلى شەبەرلەرى باق سىنايتىن دوداعا 26 مەملەكەتتەن 210 سپورتشى قاتىسپاق. باحرەين, گونكونگ, ءۇندىستان, يوردانيا, يران, يەمەن, قاتار, قىتاي, تايپەي, كحدر, قىرعىزستان, مالايزيا, مالديۆ, موڭعوليا, نەپال, ومان, پاكىستان, ساۋد ارابياسى, سينگاپۋر, تايلاند, وزبەكستان, فيليپپين, شري-لانكا, وڭتۇستىك كورەيا, جاپونيا جانە قازاقستان تەننيسشىلەرى تارتىسقا تۇسەدى.
ەلوردا تورىندە قۇرلىق الامانىنا قاتىساتىن ساڭلاقتاردىڭ اراسىندا كوماندالىق سىندى وليمپيادا چەمپيونى اتانعان, الەم چەمپيوناتىندا ءتورت مارتە توپ جارعان قىتايلىق ۆان چۋتسين, وليمپيادا چەمپيونى سۋن ينشا كەلمەك. سونىمەن قاتار كوماندالىق تارتىستا جازعى وليمپيادانىڭ كۇمىس مەدالىن ولجالاعان ميۆا حاريموتو, ميۋ حيرانو, توموكازۋ حاريموتو قاتىسادى.
ازيا چەمپيوناتىندا ءبىز ريو – 2016, توكيو – 2020, بيىلعى پاريج وليمپاداسىنىڭ قاتىسۋشىسى كيريلل گەراسيمەنكو, توكيو وليمپياداسىندا (2020) سىنعا تۇسكەن اناستاسيا لاۆروۆا, جاستار اراسىندا الەم چەمپيونى اتانعان الان قۇرمانعاليەۆ, حالىقارالىق تۋرنيرلەردە ولجا سالعان سارۆيناز مىرقادىروۆا, زاۋرەش اقاشەۆا سىندى ۇزدىكتەرگە سەنىم ارتامىز.
