پەتروپاۆلدا ءماۋلىت كۇنى اتاپ ءوتىلدى

پەتروپاۆل. 27 قاڭتار. ەكى دۇنيەنىڭ ساردارى, ادامزاتتىڭ ارداقتىسى, سوڭعى پايعامبار مۇحاممەدكە (س.ع.س.) ارنالعان ءماۋلىت مەرەكەسىن اتاۋ ءۇشىن ن.پوگودين اتىنداعى سولتۇستىك قازاقستان وبلىستىق ورىس دراما تەاترىنا جينالعانداردىڭ قاراسى قالىڭ بولدى. بۇل تۋرالى «قىزىلجار» مەشىتىنىڭ ءباسپاسوز قىزمەتى حابارلادى. مەرەيلى شارا شىمىلدىعى قاسيەتتى قۇران كارىم اياتتارىمەن اشىلدى. سالاۋات ايتىپ, ساۋاپ جيناۋعا كەلگەن جاماعاتتى قىزىلجار ءوڭىرىنىڭ باس يمامى كەنجەتاي قاجى بايكەمەل ۇلى, وبلىس اكىمىنىڭ ورىنباسارى انارحان دۇيسەنوۆا قۇتتىقتادى. «مۇحاممەد پايعامباردىڭ (س.ع.س.) جىبەكتەي جۇمساق, سۇتتەي اق, سۋداي ءمولدىر باعا جەتپەس مىنەز-قۇلقى, تەڭىزدەي تەرەڭ اقىلدىلىعى عاسىرلار بويى ءتانتى ەتىپ كەلەدى. ۇلتتىڭ ۇلى ۇستازى احمەت بايتۇرسىنوۆ حالىقتىڭ باعىن اشار قۇندىلىقتاردىڭ قاتارىنا ءدىندى دە قوسقان. يسلام ءدىنىنىڭ ۋاعىزدايتىنى – يماندىلىق, ادامگەرشىلىك, ادالدىق جانە تازالىق. كوزدەيتىن ماقساتى – ەلدىڭ تىنىشتىعى, حالىقتىڭ بىرلىگى. ەلباسىمىز قازاقستاننىڭ شىققان شىڭى مەن باعىندىرعان بيىكتەرىنىڭ ەڭ باستى سەبەبى, بىرلىك دەپ اتاپ كورسەتتى. بارشامىزعا ءماۋلىت كۇنى اللانىڭ نۇرى جاۋسىن! جۇرەكتەرىمىزگە جىلىلىق پەن مەيىرباندىلىق ۇيالاپ, تۋعان ەلىمىز وركەندەپ, گۇلدەنۋ جولىنداعى تىلەكتەرىمىز قابىل بولسىن», دەدى انارحان قاليقىزى. ءماۋلىت مەرەكەسىنە ارنايى كەلگەن رەسەي فەدەراتسياسىنىڭ ءسىبىر وكرۋگى بويىنشا ءمۇفتيى, ومبى قالاسىنىڭ باس يمامى بوتا باكۋلين دە مۇسىلمان قاۋىمعا جىلى لەبىزىن ارنادى. سالتاناتتى شارانىڭ كونتسەرتتىك باعدارلاماسىندا ءدىني اندەر شىرقالىپ, تاربيەلىك ءمانى بار كورىنىستەر قويىلدى. ءماۋلىت سالاۋاتىن اق جاۋلىقتى اجەلەردەن قۇرالعان توپ ورىندادى. ماعىنالى حاديستەر مەن ولەڭدەر وقىلدى. ءومىر ەسقالي. دەرەك, سۋرەت: «قىزىلجار» مەشىتىنىڭ ءباسپاسوز قىزمەتى.