ءبىر ءۇمىت, ءبىر كۇدىك

الەم چەمپيونىنا نە بولعان؟ جەكسەنبى كۇنگى ويىندار تاعى دا سەنساتسيالىق جاعدايلارعا تولى بولدى. پاراگۆايدىڭ سلوۆاكيانى, الەم چەمپيونى يتاليانىڭ وسى توپتاعى ەڭ ءالسىز قۇراما سانالاتىن جاڭا زەلانديانى جەڭەتى­نىنە كۇمانداناتىندار از بولعان. پاراگۆاي سلوۆاكيا قۇراماسىن 2:0 ەسەبىمەن ۇتتى. وسىلاي بولۋى ءتيىس دەستى جانكۇيەرلەر. ويتكەنى, سلوۆاكتار ازۋسىز بولدى. ءتىپتى ولار, ويىننىڭ تەز اياقتالۋىن كۇتكەندەي دە اسەر قالدىردى. ال, جاڭا زەلانديا... ءيا, بۇل كوماندا ايدى اسپانعا شىعاردى! الەمدىك رەيتينگتە يتاليا قۇراماسى بەستىكتىڭ ىشىندە بولسا, جاڭا زەلانديا 78-ءشى ورىندا-تىن. مۇنداي جاعدايدا يتالياندىقتار قارسىلاستارىنىڭ قاقپاسىنىڭ اۋزىن قۇرعاتپاسا كەرەك ەدى. بىراق, ماقتاعان قۇرامامىز العاشقى كەزەڭدە بەلسەندىلىكتى قارسىلاس­تارىنا بەرىپ قويىپ, سونىڭ اششى جەمىسىن الدىمەن تاتتى. ستاندارتتان ۋينستون ريد قاقپاعا باعىتتاپ شىرەنە تەپكەن. قىرسىق شالعاندا دوپ الەمدەگى ەڭ ۇزدىك قورعاۋشىلاردىڭ ءبىرى كاننوۆارونىڭ دەنەسىنە ءتيىپ, قاقپا الدىندا قانكوبەلەك ويناپ قالدى. تەگىن ولجانى سمەلتس قاق­پاعا سۇڭگىتتى دە جىبەردى. بۇل ويىن­نىڭ بار بولعانى 7-ءشى مينۋتىن­داعى وقيعا ەدى. دزامبروتتا اياعىنا ىلىككەن دوپ­تى جاڭا زەلانديا قاقپاسى­نىڭ الدىنا تاستاۋعا تىرىستى. شابۋىل­شىلاردان قايران بول­ماعان­نان كەيىن ءوزى دە بەلسەنىپ ارەكەت جاساپ كورمەك ەدى. جان بەرمەك وڭاي ەمەس. يتالياندىقتار قۇرساۋداي قىسىپ بارا جاتقان سوڭ قورعاۋشى توممي سميت دە روسسي­دىڭ جەيدەسىنە جارماستى. مۇنداي جاعدايدا پەنالتي بەلگىلەنەدى. ياكۆينتا قاپىسىز سوقتى. ەسەپ ­–1:1. سوڭعى 15 مينۋتتا جاڭا زەلان­ديا قاقپاسىنىڭ الدىندا داۋىل تۇرعانىمەن, يتالياندىقتار جەڭىس­تى بوكتەرىپ كەتە المادى. ولار قاق­پانى 25 رەت كوزدەگەنىمەن, گولعا لايىق 7 دوپتى مارك پاستون قايتاردى. بۇعان يتاليان­دىق­تار­دىڭ تاعى دا 15 رەت بۇرىشتان دوپ تەپكەنىن قوسىڭىز. وسىنداي ءنوپىر شابۋىلعا توتەپ بەرىپ, ۇپاي بولىسكەن جاڭا زەلان­ديا فۋتبولشىلارىنىڭ ەرلىگىن با­عا­­لاۋ كەرەك. يتاليا العاشقى ويى­نىندا پاراگۆايمەن تەڭ وينا­دى, بۇل جولى دا تەڭ. سلوۆاكتار­مەن يتجىعىس تۇسكەن جاڭا زەلان­ديا نەگە ءوز توبىنان شىعىپ قالا­دى؟! ريكي حەربەرت باپكەر ءۇمىتتى. ال, يتالياندىق­تاردىڭ باپكەرى مار­چەللو ليپپي­دىڭ قاباعىنان قار ۇشقىنداپ, سىركەسى سۋ كوتەرمەي ءجۇر. الەم چەمپيونى جاعدايىن قيىنداتىپ الدى. برازيليالىقتار ايدارىنان جەل ەسەدى كاكاسى بار ەل باقىتتى عوي. قاي كلۋبتا ويناسا دا كاكانىڭ جانىنان تابىلۋعا شابۋىلشى بىتكەن قۇمار. اسىرەسە, ارگەنتينا­لىق يگۋاين. كاكاعا دوپ تيسە وكپە­سىن قولىنا الىپ, قاقپا الدىنا جەتەدى. ترانسفەردە ويىنشىلارى با­عا­لى بولعاندىقتان, افريكاداعى ەڭ قىمبات كوماندا اتان­عان كوت-د’ يۆۋار قۇراماسىمەن ءوت­كىز­گەن ويىن­دا دا قار­سىلاس قاقپانىڭ ال­دىنا قاربالاس تۋ­دىرعان وسى كاكا. العاشقى شا­بۋىل­دا ودان دوپ ال­عان رو­بينو قاقپا­نى كوز­دەي شىرەنە تارتقان. دوپ ماڭ­داي­شانى جالاپ ءوتتى. ويىننىڭ 25-ءشى مينۋتىندا لۋيس فا­­بيانو كوت-د‘يۆۋار قاقپاسىنا گول سوق­تى. قايران كاكا جان-جاعىنان قاۋ­سىر­مالاپ قىسقان قور­عاۋ­شىلاردىڭ ارا­سىنان ينەدەي ساڭلاۋ تاۋىپ, الا دوپتى العا اتىلعان فابيا­نونىڭ الدىنا سالدى دا بەردى. گول! 1:0. قارا مارجان ديدە دروگبانىڭ ءجۇزى وكىنىشتەن كۇرەڭىتىپ كەتتى دەيىن دەسەك, وتىرىك ايتقان بولار ەدىك. قاراقوشقىل وڭىنەن سەزىم اسەرى ارينە بىلىنبەيدى. بىراق, جۇرەگىنىڭ قان جىلاعانى انىق. ءبىرىنشى تايم اياقتالعاندا جەردەن ءبىر شوكىم ءشوپتى توپىراعىمەن ج ۇلىپ الىپ, ماڭدايىنا باستى. ءتاۋ ەتتى-اۋ. كومەكتەسپەدى. ىرىمىن ايتا­مىز دا. بىرىنەن ءبىرى وتكەن برازي­ليالىقتار قارسىلاستار الاڭىنان شىقپاي-اق قويدى. قاقپا الدىن­داعى قاربالاس. ءبىر قورعاۋشىنى الداپ ءوتىپ, ەكەۋىنىڭ ۇستىنەن دوپ اسىرعان فابيانو اۋەلەگەن دوپتى كەۋدەسىمەن قاعىپ, اياعىنا تۋرالاپ الدى دا قايقايتا تارتتى. بۋباكار بارري سوزىلا قارعىدى. ساۋساعى­نىڭ ۇشتارى ءتيىپ, شورشىعان دوپ قاقپانىڭ بۇرىشىندا اۋعا تۇسكەن الابۇعاداي بۇلقىندى. 2:0. ءبىر وكىنىشتىسى – فاتيانو دوپتى قولى­­مەن ىڭعايلاپ العان. تورە­شىلەر بايقامادى. ەۋروپانىڭ ەڭ ۇزدىك شابۋىل­شىسىنىڭ ءبىرى ديدە دروگبانىڭ دا گول سوعاتىن مۇمكىندىگى بولدى. بىراق, باسپەن ۇرعان دوبى قاقپادان ءسال قيىس كەتتى. ايىپ الاڭىندا جاسىنداي جارق ەتكەن كاكانىڭ زەڭبىرەكتەن اتقان­داي عىپ تەپكەن دوبىن بارري قاق­شىپ الدى. سابازىڭ مۇنىمەن دە تىن­بادى. سول جاق قاپتالدا قاۋما­لا­عان ءۇش قورعاۋشىنى تارىداي شاشىپ, سول كاكا قاقپا الدىنان كولدەنەڭدەتىپ تاعى ءبىر پاس جىبەردى. وعان الدىمەن ەلانۋ ۇلگەردى. 3:0!!! بىراق, الەمدەگى ۇزدىك سۇرمەر­گەن­نىڭ ءبىرى  دروگبانىڭ قايرات كورسەتپەي كەتۋى ادىلەتسىزدىك بولار ەدى. جيرۆينو كولو تۋرەگە ادەمى پاس بەردى. وسى ءسات­تە دروگبا لىپ ەتىپ, قاقپاعا قاراي ءوتتى دە وزىنە باعىتتالعان دوپتى باسپەن ۇرىپ, قاقپاعا كىر­گى­زىپ جىبەردى. برازيليا­لىق قاقپا­شى ورنىنان قوزعالىپ تا ۇلگەرگەن جوق. ويىننىڭ سوڭعى مينۋتتارى جۇيكەنى جۇندەي تۇتكەن. شابۋىل­شىنى شالىپ قۇلاتقان كاكا سارى قاعاز الدى. كوت-د يۆۋارلىق تيوتە ۇرىنار­عا قارا تاپپاي قويدى. سول ايقاسقا كىرگەن جەردەن شۋ شىعادى ايتەۋىر. برازيليالىق ويىنشىنى شالىپ جىعىپ, ويناقتاپ شىعا كەلگەن تيوتە قانعالاقتاپ كاكانىڭ جانى­نا كەلىپ قالدى. سابىرىنان اسا توگىلە قوي­مايتىن سىرباز كاكا بۇرىلىپ قارا­ماعان كۇيى شىن­تاعىن كوتەرىپ قالدى. ىڭق ەتە قالعان تيوتە ويبايلاپ قۇلادى. تورەشى اۋەلى سارى, سوسىن قىزىل قاعازدى كورسەتتى. كاكا الاڭ­نان كەتتى. كوت-د يۆۋارلىقتار كۇ­شەيدى. دوپتى تولىق باقىلاۋلارىنا الدى. گول سوعۋعا نيەتتەندى. بىراق, قوياننىڭ قۇيرىعىنداي شولتاڭ ەتە قالعان ۋاقىت دروگبا­نىڭ جىگىتتەرىنىڭ نيەتىن قۇپتاما­­دى. برازيليالىقتاردىڭ باس باپكەرى دۋنگا ءوز جىگىتتەرىنىڭ ءوز شە­بەرلىگىن قىزىقتاپ كەتپەي, ۇجىمدىق ويىن ويناعانىنا رازى. ال, كوت-د يۆۋاردىڭ باپكەرى, شۆەد ەريكسسون ءالى دە ءوز توبىنان شىعۋ­دان ءۇمىتىن ۇزگەن جوق.. باقتيار تايجان.