ورالدىق ستۋدەنت ەلەكتروموبيل قۇراستىرىپ شىقتى

ورال. 15 ماۋسىم. باتىس قازاقستان وبلىسىنىڭ ورتالىعى – ورال قالاسىنداعى جوعارى وقۋ ورىندارىنىڭ بىرىندە ءبىلىم الاتىن ستۋدەنت ەلەكتروموبيل قۇراستىرىپ شىقتى. كولىك وتە ۇنەمدى جانە ەكولوگيالىق تازا. ول قۋات كوزىن وزدىگىنەن كۇن ەنەرگياسىن ەلەكتر ەنەرگياسىنا اينالدىراتىن قوندىرعىدان الادى. بۇل تۋرالى egemen.kz ءتىلشىسى حابرلادى. سەرگەي وفيتسەروۆ ەسىمدى ستۋدەنت ەلەكتروموبيلدى ەسكى «وكا» كولىگىنىڭ نەگىزىندە قۇراستىردى. ونەرتاپقىشقا جوعارى وقۋ ورنىنداعى ۇستازدارى مەن بىرگە وقيتىن دوستارى كومەكتەستى. كولىكتى قۋاتتاندىرۋ ءۇشىن توق كوزىنە قوسۋدى قاجەتى جوق. جانارماي ارقىلى جۇمىس ىستەيتىن قوزعالتقىشتىڭ ورنىندا ەلەكتروموتور ورناتىلعان. ول كولىكتىڭ توبەسىندەگى كۇن ەنەرگياسىنان قۋات الاتىن باتارەيا ارقىلى جۇمىس ىستەيدى. كولىك ساعاتىنا 100 شاقىرىم جول جۇرە الادى. قۋاتى 10 كيلوۆاتتىق ەلەكتروموتور جانارماي ارقىلى جۇمىس ىستەيتىن قوزعلتقىشتان ەش كەم ەمەس. ءتىپتى 500 كگ-دىق «وكا» سالماعى 4 توننا بولاتىن «حاممەر» جول تالعامايتىن كولىگىن دە سۇيرەپ شىعا الادى. سونىڭ وزىندە جىلدامدىعىن ساعاتىنا 30 شاقىرىمعا دەيىن كوبەيتۋگە مۇمكىندىگى بار. بۇل يننوۆاتسيالىق جاڭالىقتى تەك اۆتوكولىكتەرگە ەمەس, ۆەلوسيپەدكە دە قولدانۋعا بولادى. سەرگەي وفيتسەروۆ ونەرتۋىندىسىن رەسەيدىڭ ماسكەۋ وبلىسىنداعى دۋبنا قالاسىندا وتكەن عىلىمي-تاجىريبەلىك كونفەرەنتسيا كەزىندە كوپشىلىكتىڭ نازارىنا ۇسىندى. رەسەي عالىمدارى ورالدىق جاس عالىمنىڭ ەڭبەگىن جوعارى باعالاپ, وعان دۋبنا ۋنيۆەرسيتەتىندە ماگيستراتۋرادا تەگىن وقۋ ءۇشىن ءبىلىم گرانتىمەن ماراپاتتادى. ەندى سەرگەي الداعى قىركۇيەكتە اتالعان وقۋ ورنىندا ءبىلىمىن جالعاستىراتىن بولدى. تەمىر قۇسايىن. دەرەك: egemen.kz. سۋرەت: uralskweek.kz.