ىلە اۋدانىندا ورنالاسقان وتاندىق «بەنت» كومپانياسى وسىعان دەيىن تەمىرجول رەلسى مەن بەتون توسەنىش شىعارىپ كەلگەن ەدى. جۋىردا كومپانيا جاڭا كەزەڭگە قادام باستى. ولار بۇل جولى سالادا تاجىريبەسى مول قىتايلىق كاسىپورىنمەن بىرلەسىپ, رەلس بەكىتۋگە ارنالعان 5 بىردەي قوسالقى بولشەكتى ءوندىرۋدى باستادى. بۇدان بىلاي قازاق تەمىرجولى سىرتتان كەلەتىن رەلس بولشەكتەرىنە تاۋەلدى بولمايدى. جوبانىڭ جالپى قۇنى – 6 ملن دوللار. زاۋىت سوڭعى ۇلگىدەگى قوندىرعىلارمەن جابدىقتالعان. مۇندا ءتىپتى بولات كلەمالاردى ادامنىڭ ارالاسۋىنسىز روبوتتار جاسايدى. روبوتتار تەحنيكالىق جاعىنان كۇردەلى جانە قاۋىپتى بارلىق ۇدەرىستى جۇرگىزەدى. ءبىر روبوت 3 ادامنىڭ جۇمىسىن ورىندايتىن كورىنەدى.
ء«بىزدىڭ ونەركاسىپتىك كومپانيالار بىرلەستىگى بۇگىندە تەمىربەتون شپالدارىنان باسقا رەلس بەكىتپەلەرىنىڭ تولىق كەشەنىن شىعارۋدى يگەردى. سونىڭ ناتيجەسىندە, جىلىنا 800 مىڭ دانا رەلس شپالى مەن 1 ملن 200 مىڭ دانادان اسا بەكىتكىشى بار رەلس جيىنتىعىن شىعارۋعا مۇمكىندىك الىپ وتىرمىز. كەيىنگى 5 جىلداعى ينۆەستيتسيانىڭ بارلىق كولەمى 7 ملرد تەڭگەدەن استى. وزىق تەحنولوگيالار مەن ءوندىرىستى روبوتتاندىرۋعا باسىمدىق بەرىپ وتىرمىز», دەيدى كومپانيا پرەزيدەنتى دىنمۇحامەد كۋزيەۆ.
ايتۋىنشا, وندىرىستە روبوتتاردى پايدالانۋ قاۋىپسىزدىكپەن قاتار جوعارعى دالدىكتى قامتاماسىز ەتەدى جانە ەڭبەك ونىمدىلىگىن ەسەلەپ ارتتىرادى.
سوڭعى ۇلگىمەن جابدىقتالعان جەكە زەرتحانادا ءونىمنىڭ بارلىق ساپا ستاندارتىنا سايكەستىگىن قامتاماسىز ەتۋگە 400-دەن استام سىناق ءتۇرى جۇرگىزىلەدى.
«بىزدەن شىققان ماتەريالدار بارلىق نورماتيۆتىك قۇجات پەن تەحنيكالىق سيپاتتاماعا ساي بولۋعا ءتيىس. سونداي-اق ءبىز مەملەكەتتىك ستاندارت پەن تەحنيكالىق رەگلامەنتتەرگە سايكەس كەلەتىن جوعارى ساپالى ءونىم شىعارۋدى قامتاماسىز ەتەمىز», دەيدى سەرتيفيكاتتاۋ ورتالىعىنىڭ باس ديرەكتورى حادجياكبار شيرحانوۆ.
قازىر كومپانيالار توبىنىڭ كاسىپورىندارىندا 600-دەن اسا ادام تۇراقتى جۇمىس ىستەيدى. ولاردىڭ ەڭبەك جاعدايى مەن كاسىبي ءوسۋ مۇمكىندىگى الدىڭعى ورىنعا قويىلعان.
«وسىنداي زاماناۋي كاسىپورىندا جۇمىس ىستەپ جاتقانىما ماقتانامىن. ءبىزدىڭ كاسىپورىندا تەك ەلىمىزدە ەمەس, شەتەلدە دە سۇرانىسقا يە ءونىم شىعارىلادى. مۇندا قاراپايىم ەڭبەك ادامىنا قاجەتتىنىڭ ءبارى بار. ەڭبەكاقىمىز دا جامان ەمەس. ەڭ باستىسى – ەل ەكونوميكاسىنىڭ ىلگەرىلەۋى جولىندا تەر توگىپ جاتىرمىز», دەيدى تاجىريبەلى سلەسار ءادىلحان سادىقاەۆ.
كاسىپورىننىڭ جاڭا اشىلعان قوسالقى تسەحىندا 100 ادام تۇراقتى جۇمىسپەن قامتىلعان. ونىمدەرى ىشكى نارىقپەن قاتار, رەسەي, قىرعىزستان نارىعىنا ەكسپورتتالادى.
الماتى وبلىسى
