قاراعاندىدا پوليتسەي اتىن جامىلعان كۇدىكتى توپ ۇستالدى

استانا. 15 ماۋسىم. قاراعاندىدا ءوزىن پوليتسيا قىزمەتكەرى دەپ تانىستىرىپ, اقشا بوپسالاۋمەن اينالىسقان 29 جاستاعى ەر ادام مەن ونىڭ سىبايلاستارى ۇستالدى. بۇل تۋرالى «قازاقپارات» حابارلادى. جەدەل-ىزدەۋ شارالارىنىڭ بارىسىندا وبلىستىق ىشكى ىستەر دەپارتامەنتىنىڭ جەكە قاۋىپسىزدىك باسقارماسىنىڭ قىزمەتكەرلەرى اقشا بوپسالاۋمەن اينالىسقان جالعان پوليتسەيدى, سونداي-اق ونىڭ سىبايلاستارىن ۇستادى. توپ باسشىسى بۇرىن سوتتالعان 29 جاستاعى ازامات بولىپ شىقتى. ول الدىن – الا جۇرتتان اقشا بوپسالاۋ كەستەسىن قۇرىپ وتىرعان. تارقاتا ايتقاندا ول سىبايلاستارىنىڭ كومەگىمەن الەۋمەتتىك جەلىلەردىڭ بىرىندە بويجەتكەننىڭ اتىنان پاراقشا قۇرىپ, وندا ەر ادامدارمەن حات الماسىپ, جىنىستىق قاتىناستارعا ءتۇسۋدى ۇسىنعان. وبلىستىق ىشكى ىستەر دەپارتامەنتى ءباسپاسوز قىزمەتىنىڭ مالىمەتىنشە, بوپسالاۋشىلاردىڭ قارماعىنا تەمىرتاۋ قالاسىنىڭ 38 جاستاعى تۇرعىنى تۇسكەن. ول جاڭادان تانىسقان بويجەتكەنمەن كەزدەسۋ ءۇشىن جالدامالى پاتەرگە كەلگەن. ءدال سول مەزەتتە پاتەرگە وزدەرىن قۇقىق قورعاۋ قىزمەتكەرىمىز دەپ تانىستىرىپ, جالعان قىزمەتتىك كاۋلىك كورسەتۋ ارقىلى, ونى كامەلەتتىك جاسقا تولماعان قىزعا ازعىندىق ارەكەت جاسادى دەپ ايىپتاعان. ءتىپتى ۇيىمداسقان توپ جالعان كۋاگەرلەردىڭ كوزىنشە پاتەرگە ءتىنتۋ جۇرگىزىپ, جابىرلەنۋشىنى قىلمىستىق جاۋاپكەرشىلىكتەن بوساتۋ ءۇشىن قوماقتى قارجى تالاپ ەتكەن. بوپسالاۋشىلاردىڭ الداۋىنا كونىپ قالعان ول 60 مىڭ تەڭگە بەرگەن. الايدا, كۇدىكتىلەر بۇل قاراجاتقا قاناعاتتانباي تاعى 5 مىڭ دوللار سۇراعان. ايتا كەتەيىك, جابىرلەنۋشى وبلىستىق ىشكى ىستەر دەپارتامەنتىنىڭ جەكە قاۋىپسىزدىك باسقارماسىنا ءوتىنىش جازعان. «كۇدىكتى اقشانى بەرۋ كەزىندە ۇستالدى. قازىرگى ۋاقىتتا ءبىر توپ ادامدارعا قاتىستى قىلمىستىق ءىس قوزعالدى. قازىر تەرگەۋ امالدارى جۇرگىزىلىپ جاتىر. ۇستالعانداردىڭ بارلىعى ۋاقىتشا قاماۋعا الىندى», – دەپ وبلىستىق ىشكى ىستەر دەپارتامەنتىنىڭ ءباسپاسوز قىزمەتى مالىمەت تاراتتى. تالعات رايىمبەك. دەرەك, سۋرەت: «قازاقپارات».