سولتۇستىك قازاقستاندا توتەنشە جاعدايلار جيىلەپ تۇر

پەتروپاۆل. 27 قاڭتار. پەتروپاۆل قالالىق مادەنيەت ۇيىندە توتەنشە جاعدايلار جونىندەگى كوميتەت توراعاسىنىڭ ورىنباسارى, ورتكە قارسى قىزمەت گەنەرال-مايورى سەرىك اۋباكىروۆتىڭ توراعالىعىمەن سولتۇستىك قازاقستان وبلىستىق دەپارتامەنتىنىڭ وتكەن جىلى اتقارعان جۇمىستارىنىڭ قورىتىندىسىنا جانە الدا تۇرعان مىندەتتەردى, سونىمەن بىرگە سىبايلاس جەمقورلىقتىڭ الدىن الۋ ماسەلەلەرىن تالقىلاۋعا ارنالعان كەڭەس بولىپ ءوتتى. اتالمىش شاراعا وبلىس اكىمىنىڭ ورىنباسارى ۆلاديمير بۋبەنكو قاتىستى. بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى. وبلىستىق توتەنشە جاعدايلار جونىندەگى دەپارتامەنت باستىعىنىڭ مىندەتىن اتقارۋشى, ورتكە قارسى قىزمەت پولكوۆنيگى اسەت ىسماعۇلوۆتىڭ ەسەبىنە قاراعاندا, بىلتىر 235 شارا وتكىزىلگەن. قارلى بۇرقاسىن قۇرساۋىنان 497 ادام مەن 98 تەحنيكا بوساتىلىپ, قاۋىپسىز جەرگە كوشىرىلگەن. وبلىس اۋماعىندا توتەنشە جاعدايلاردى جويۋ ءۇشىن قۇرامىندا 1 032 ادام مەن 440 تەحنيكا بار 14 شۇعىل قيمىل جاساعى قۇرىلىپ, جۇمىس ىستەۋدە. ءورت قاۋىپسىزدىگىن قامتاماسىز ەتۋ ءۇشىن بىرقاتار اۋىلداردا ءورت ءسوندىرۋ قوسىندارى قۇرىلعان. قازىرگى ۋاقىتتا اۋىلدىق ەلدى مەكەندەردە 157 ءورت ءسوندىرۋ ءاۆتوموبيلى جانە 1 017 بەيىمدەلگەن تەحنيكاسى بار 497 ەرىكتى ءورت ءسوندىرۋ قۇرىلىمى جۇمىس ىستەيدى. 123 زارداپ شەككەن ادامعا العاشقى مەديتسينالىق كومەك كورسەتىلگەن. دەپارتامەنت قىزمەتكەرلەرى توتەنشە جاعدايلاردىڭ الدىن الۋ ماقساتىندا وبلىستىڭ 505 نىسانىنا تەكسەرۋ جۇرگىزىپ, ءورت قاۋىپسىزدىگىن ساقتاۋعا سالعىرت قاراعان 546 ادامدى اكىمشىلىك جاۋاپكەرشىلىككە تارتتى. اتقارىلعان شارالدارعا قاراماستان وتكەن جىلى وبلىستا 155 توتەنشە جاعداي ورىن العان. 812 ءورت وقيعاسى تىركەلىپ, 119 ميلليون تەڭگە ماتەريالدىق شىعىن كەلگەن. 47 ادام قازا تاپقان. ءومىر ەسقالي. دەرەك: سولتۇستىك قازاقستان وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى. سۋرەت: news.nur.kz.