سۋرەتتى تۇسىرگەن – دميتري ەروفەەۆ
وبلىستا مۇگەدەكتىگى بار ادامداردىڭ مەكەمەلەرگە كىرىپ-شىعۋ مۇمكىندىگىن قامتاماسىز ەتۋ ءۇشىن 5 جىلدا مىڭنان استام نىساننىڭ كىرەبەرىسىنە بەيىمدەۋ جۇمىستارى جۇرگىزىلدى. وتكەن 2021–2023 جىلدارى الەۋمەتتىك ينفراقۇرىلىم نىساندارىنىڭ قولجەتىمدىلىگىن قامتاماسىز ەتۋ ماقساتىندا بارلىعى 460 نىسان تەكسەرىلدى. سونىڭ ناتيجەسىندە, نىساندارعا 2021 جىلى 148, 2022 جىلى 144, ال 2023 جىلى 168 پاندۋس قويىلعان. بۇگىندە اۋدان, قالالارداعى 168 نىساننىڭ 63-ىنە جۇرگىزىلگەن بەيىمدەۋ جۇمىستارى اياقتالدى. ودان بولەك, 17 نىساندا بەيىمدەۋ جۇمىسىن جۇرگىزۋ ءۇشىن مەملەكەتتىك ساتىپ الۋ كونكۋرسى جاريالاندى. تاعى 2 نىسانعا كىرىپ-شىعۋ جولىن سالۋ ءۇشىن كونكۋرس جاريالاۋعا قۇجاتتار ازىرلەنىپ جاتىر.
«وبلىس باسشىسى بەيبىت يساباەۆتىڭ تاپسىرماسىنا سايكەس وڭىردە مۇگەدەك جاندار ءۇشىن الەۋمەتتىك ينفراقۇرىلىمداردى قولجەتىمدى ەتۋ باعىتىندا كەشەندى جۇمىس جۇرگىزىلىپ جاتىر. بيىل 168 الەۋمەتتىك ينفراقۇرىلىم نىسانى بەيىمدەلدى, وعان جەرگىلىكتى بيۋدجەتتەن 591,8 ملن تەڭگە ءبولىندى. جول كارتاسى اياسىندا بارلىعى 1 119 نىساندى بەيىمدەۋ جوسپارلانسا, بۇگىنگى كۇنگە سونىڭ 628-ءى بەيىمدەلدى. قالعان 491 نىساندا بۇل جۇمىستار كەزەڭ-كەزەڭىمەن اتقارىلادى. وسىلايشا, 2027 جىلعا قاراي ءوڭىردىڭ الەۋمەتتىك ينفراقۇرىلىم نىساندارىن بەيىمدەۋ بويىنشا جوسپارلانعان جۇمىستاردىڭ كولەمى تولىعىمەن اياقتالادى», دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆ.
بۇدان بولەك, حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتى جەتىسۋ وبلىسى بويىنشا دەپارتامەنتىنىڭ ماماندارى مۇگەدەكتىگى بار ازاماتتار ءۇشىن وبەكتىلەردىڭ قولجەتىمدىلىگىن قامتاماسىز ەتۋدى مەملەكەتتىك باقىلاۋ شەڭبەرىندە بيىل وڭىردە 95 تەكسەرۋ جۇرگىزىپ, سونىڭ قورىتىندىسىندا 70 سۋبەكت جالپى سوماسى 9,6 ملن تەڭگەدەن استام اكىمشىلىك جاۋاپقا تارتىلدى.
ء«بىز تالدىقورعاندىق كاسىپكەرلەر اراسىندا ءتۇسىندىرۋ جۇمىستارىن جۇرگىزىپ كەلەمىز. ساۋدا ۇيلەرىنىڭ باسشىلارىنا دا ءجيى قۇلاققاعىس ەتەمىز. ماسەلەن, «شاپاعات» ساۋدا ءۇيىنىڭ ەكىنشى قاباتىنا جانە «Zeta» دۇكەنىنىڭ كىرەبەرىسىنە ەكى كوتەرگىش ورناتىلعانىن وسىنداي جۇمىستاردىڭ وڭ ناتيجەسى دەۋگە بولادى, وعان قوسا پاندۋسى دا بار. ەندى باياۋ قوزعالاتىن جانە مۇگەدەكتەر ارباسىندا جۇرەتىن ادامدار ساۋدا ۇيىنە قينالماي كىرە الادى. «شاپاعات» ساۋدا ءۇيىنىڭ باسشىلىعىنا وسىنداي شارالاردى قولعا العانى ءۇشىن العىسىمدى بىلدىرەمىن. ساۋدا وبەكتىلەرى مەن وزگە دە مەكەمەلەردىڭ قۇرىلتايشىلارىنان مۇگەدەكتىگى جانە ەرەكشە قاجەتتىلىكتەرى بار جانداردىڭ نىسانعا كىرىپ-شىعۋىنا قولايلى جاعداي جاساۋدى سۇرايمىز. بارشا ازاماتتار ءۇشىن كەدەرگىسىز ورتا قۇرۋ – ءبىزدىڭ ورتاق مىندەتىمىز», دەيدى «ELSTAR» مۇگەدەكتەر قوعامدىق بىرلەستىگىنىڭ باسشىسى, تالدىقورعان قالاسى اكىمىنىڭ مۇگەدەكتەردىڭ قۇقىقتارى جونىندەگى كەڭەسشىسى, مۇگەدەك ادامداردىڭ ينفراقۇرىلىمعا قولجەتىمدىلىكتى قامتاماسىز ەتۋ جونىندەگى مونيتورينگ توبىنىڭ مۇشەسى ۆاديم درۋزين.
سونداي-اق وبلىستا «ينۆاتاكسي» قىزمەتى جولعا قويىلعانىن اتاپ وتكەن ءجون. بۇگىنگى تاڭدا وسىنداي 34 ارنايى اۆتوكولىك بار, جىل باسىنان بەرى وبلىس بويىنشا اتالمىش كولىك قىزمەتىنە 60 مىڭنان استام ءوتىنىم كەلىپ تۇسكەن.
جالپى, وڭىردە قولجەتىمدىلىكتى كەشەندى تۇردە قامتاماسىز ەتۋگە جانە كەدەرگىسىز ورتا قۇرۋعا ەرەكشە كوڭىل بولىنەدى. بۇل رەتتە جاڭا نىسانداردى سالۋ كەزىندە مەردىگەر ۇيىمدارعا قولجەتىمدى ورتانى قامتاماسىز ەتۋ قاعيدالارىن ساقتاۋ بويىنشا ناقتى تالاپتار قويىلادى. «قازاقستان رەسپۋبليكاسىندا مۇگەدەكتەردى الەۋمەتتىك قورعاۋ تۋرالى» زاڭنىڭ 25-بابىندا كاسىپكەرلىك قىزمەتتى جۇزەگە اسىراتىن جەكە تۇلعالار, سونداي-اق زاڭدى تۇلعالار ۇلتتىق ستاندارتتارعا سايكەس مۇگەدەكتەردىڭ ورتاق پايدالانىلاتىن كولiك قۇرالدارىنا, تۇرعىن ۇيلەرگە, قوعامدىق جانە وندىرىستiك ۇيلەرگە, عيماراتتار مەن ءۇي-جايلارعا كەدەرگiسiز كiرiپ-شىعۋىنا, اۋەجايلاردا, تەمiرجول بەكەتتەرىندە, اۆتوبەكەتتەر مەن تۇراقتاردا, تەڭiز جانە وزەن پورتتارىندا ەركiن باعدار ۇستانۋى مەن ءجۇرiپ-تۇرۋىنا جاعداي جاساۋعا مiندەتتەلگەن.
تاعدىر تاۋقىمەتىن تارتىپ جۇرگەن مۇمكىندىگى شەكتەۋلى جاننىڭ الدىنان كەزدەسەتىن ماسەلە از ەمەس. كەدەرگىسىز قوزعالىس ارقىلى ولاردىڭ قاجەتتىلىگىنە جاعداي جاساۋ – سول ماسەلەلەردىڭ ىشىندەگى ماڭىزدىسى. سوعان ساي ءبىلىم سالاسى بويىنشا 94, دەنساۋلىق ساقتاۋ سالاسى بويىنشا 37, وكرۋگ اكىمدىكتەرى 18, سپورت سالاسى بويىنشا 6, مادەنيەتتە 9, الەۋمەتتىك سالا بويىنشا 2 نىسانعا بەيىمدەۋ جۇمىستارى جۇرگىزىلدى.
جەتىسۋ وبلىسى
