اۆتوبۋس قۇراستىرۋ زاۋىتىنىڭ ءبىر بولىگىن «ونەركاسىپتى دامىتۋ قورى» اق قارجىلاندىردى. قۇنى 11,9 ملرد تەڭگە بولاتىن جوباعا قور 6,2 ملرد تەڭگە قۇيعان. 5 پايىزبەن بەرىلگەن نەسيە 10 جىل ىشىندە قايتۋعا ءتيىس. 5,7 ملرد تەڭگە – ينۆەستوردىڭ ۇلەسى. سەرىكتەسى – الەمدەگى ەڭ ءىرى اۆتوبۋس وندىرەتىن «Yutong» كومپانياسى.
باستاپقىدا قالا ءىشى, قالاارالىق مارشرۋتتار جانە بالالار اۆتوبۋسىن شىعاراتىن زاۋىت قازىر تۋريستەرگە ارنالعان اۆتوبۋستى, كەز كەلگەن جۇك كولىگىن قۇراستىرادى. تۇتىنۋشى تاپسىرىس بەرسە بولدى, قالاعانىنداي ازىرلەپ بەرەتىن وندىرىستىك قاۋقار بار. «قازاۆتوجول» قىستا قار تازالايتىن, قۇم توسەيتىن جۇك كولىكتەرىن دە دايىنداپ جاتىر. ءورت ءسوندىرۋ كولىكتەرى دە وسىندا قۇراستىرىلادى.زاۋىت 2021 جىلى – 165 اۆتوبۋس, 2022 جىلى – 568 تەحنيكا, بىلتىر 1 579 تەحنيكا قۇراستىرسا, بيىل بۇل مەجەنى 1 648-گە جەتكىزبەك.
تاپسىرىستىڭ ارتۋى – جۇمىس ورنىنىڭ كوبەيۋىنە سەبەپ. كەلەر جىلى مىڭ ادامعا جۇمىس بەرۋ كوزدەلىپ وتىر. سول كەزدە جىلىنا 1 200 اۆتوبۋس پەن 500 ارنايى تەحنيكا شىعارادى.
كاسىپورىن وقۋ جانە اعارتۋ مينيسترلىگىمەن شارتقا وتىرىپ, سونىڭ شەڭبەرىندە بالالاردى تاسىمالداۋعا ارنالعان اۆتوبۋستاردى جولعا سالىپ كەلەدى. ءوندىرىس ىسكە قوسىلعالى زاۋىتتان 428 بالالار اۆتوبۋسى شىققان.
مۇندا الدىمەن اۆتوبۋستىڭ قاڭقاسى دانەكەرلەنەدى. وسىنداي 18 بەكەت بار.
– دانەكەرلەۋ بارىسىندا مەتالدى قىزدىرىپ وتىرامىز. قىزعان مەتالدىڭ بەكىتپەسى ساپالى شىعادى. ايتپەسە, ءبىرازدان كەيىن سىنىپ كەتۋى مۇمكىن. ءبىزدىڭ تسەحتان شىققان قوراپ تەكسەرىلىپ, بوياۋ تسەحىنا جونەلتىلەدى, – دەيدى دانەكەرلەۋ تسەحىنىڭ شەبەرى ەۆگەني تەري.
بوياۋ تسەحىندا قۇرعاتۋ, بوياۋ جانە تەگىستەپ جىلتىراتۋ كامەرالارى بار. وسى ءبىر تسەحتان بويانىپ, سىرلانىپ ادەمى كەيىپكە ەنگەن قوراپ قۇراستىرۋ تسەحىنا بارادى. قوزعالتقىش بولىكتەرى مەن بارلىق بولشەگى وسىندا ورناتىلادى. ءرۋلى, ورىندىعى, جالپى ايتقاندا, ىشكى ينتەرەرى دە جابدىقتالادى.
– تولىق قۇراستىرىلعان اۆتوبۋس بىرنەشە تەكسەرىس تۇرىنەن وتەدى. بۇل ءۇشىن ارنايى جابدىقتالعان عيمارات قاراستىرىلعان. تەجەگىشى, جارىق شامدارى, بىلىككە تۇسەتىن قىسىم, اۋاعا شىعاراتىن گاز مولشەرى ءجىتى سىنالادى. جەلدىڭ, سۋدىڭ ىشكە وتپەۋىن تەكسەرەدى. ەدەننەن سۋ وتپەۋىن تەكسەرەتىن ارنايى حاۋىز قازىلعان. ىشىنە 40 سم
دەڭگەيىندە سۋ قۇيىلعان. اۆتوبۋس وسى سۋمەن ساعاتىنا 25 شاقىرىم جىلدامدىقپەن ءجۇرىپ وتەدى. ارعى جاعاعا شىققاندا زەرتحاناشىلار اۆتوبۋستىڭ ءىشى-سىرتىن تۇگەل قارايدى. جاڭبىرعا توزىمدىلىگى تەكسەرىلەدى. قوس قاپتالىنان, جوعارىدان سۋ شاشاتىن گاراجعا كىرگىزىلەدى. ابدەن تەكسەرىلىپ, وڭ باعا العان كولىك قانا تۇتىنۋشىعا جول تارتادى, – دەيدى «QazTehna» جشس ديرەكتورى ارعۇلان مايقونوۆ.
زاۋىتقا دانەكەرلەۋشى, اۆتوسلەسار ماماندىعى بويىنشا جۇمىسشىلار قاجەت. مۇندا مامان دايارلاۋعا ايرىقشا كوڭىل بولىنەدى. وبلىس بويىنشا بىرنەشە كوللەدجبەن دۋالدى ءبىلىم بەرۋ جونىندە كەلىسىم جاساعان. ستۋدەنتتەر زاۋىتقا كەلىپ, تەورياداعى ءبىلىمىن تاجىريبەمەن ۇشتاستىرادى. وندىرىستىك تاجىريبەدە ءوزىن ۇزدىك كورسەتكەن ستۋدەنتتەر جۇمىسقا الىنادى. مۇنىمەن قوسا, كاسىپورىننىڭ كورپوراتيۆتىك ۋنيۆەرسيتەتىندە قىزمەتكەرلەردىڭ ساناتىن كوتەرەدى. ءوندىرىس باسشىلارىن وقىتادى, وندىرىستىك باعىتتار بويىنشا كادرلار دايارلايدى.
– مەن زاۋىتقا قاتارداعى سلەسار رەتىندە قابىلداندىم. وندىرىسپەن قاتار ءوسىپ, وركەندەپ كەلەمىن. ۇتىمدى تاجىريبە جينادىم. زاۋىتتا جاڭادان كەلۋشىلەرگە كورپوراتيۆ ۋنيۆەرسيتەتى جۇمىس ىستەيدى. وندا ءبىلىمىڭدى تولىقتىرىپ قانا قويماي, ونەركاسىپتىڭ سان قىرلى قۇپياسىن ۇيرەنىپ, بىلۋگە بولادى. ءوزىمدى جەتىلدىرۋدىڭ ارقاسىندا جارتى جىل بويى ەلەكتر ماشيناسىن جۇرگىزۋدى قوسىمشا ۇيرەنىپ الدىم, – دەيدى جاس مامان, «QazTehna» جشس قۇراستىرۋ تسەحىنىڭ شەبەرى نياز تۇرسىنوۆ.
پرەزيدەنت جولداۋدا: «اۆتوكولىك قۇراستىرۋ ىسىندە وڭ ناتيجەلەر بار. وسى قارقىندى ساقتاپ, جەرگىلىكتى ءوندىرىس كولەمىن ۇدايى ارتتىرۋ كەرەك. مەملەكەتتىڭ اۆتوكولىك ونەركاسىبىنە كورسەتىپ جاتقان جان-جاقتى قولداۋى ءتۇپتىڭ تۇبىندە تولىققاندى اۆتوكولىك قۇراستىرۋ كلاستەرى رەتىندە ەلدىڭ يگىلىگىنە اينالۋى قاجەت», دەدى. زاۋىتتىڭ دا ماقساتى سول – وتاندىق اۆتوپاركتى تولىق جاڭارتىپ بولعان سوڭ, ەكسپورتقا شىعۋ.
قاراعاندى وبلىسى
